މިއަހަރުގެ މިހާތަނަށް ބޯފެނަށް ޖެހިގެން 48 ރަށުން ރިޕޯޓުކޮށްފައިވާކަމަށް އެންވަޔަރަންމެންޓް މިނިސްޓްރީން ވިދާޅުވެއްޖެއެވެ. ކޮންމެ އަހަރެއްގެވެސް ހޫނު މޫސުމާ ދިމާކޮށް ބޯފެނަށްޖެހޭ މައްސަލައަކީ ރާއްޖޭގައި ދިމާވާ މައްސަލައެކެވެ.
މިއަހަރުގެ މިހާތަނަށް 48 ރަށަކުން މިމައްސަލަ ރިޕޯޓުކޮށްފައިވާއިރު، 27 ރަށަކަށް ފެން ފޯރުކޮށްދީފައިވާކަމަށް އެންވަޔަރަމަންޓް މިނިސްޓްރީން ވިދާޅުވެއެވެ. ފެނަށް ޖެހިގެން ރާއްޖޭގެ 15 އަތޮޅަކުންވަނީ ރިޕޯޓުކޮށްފައެވެ. މީގެތެރޭގައި ހއ، ހދ، ށ، ނ، ރ، ބ، ޅ، އއ، އދ، ވ، މ، ދ، ތ، ލ އަދި ގދ، އަތޮޅު ހިމެނޭހެން 48 ރަށަކުންވަނީ ރިޕޯޓުކޮށްފައެވެ.
މި ރަށްރަށް ފެން ގެންދިއުމުގެ މަސައްކަތް އެންވަޔަރަންމަންޓް މިނިސްޓްރީއާ ގުޅިގެން ފެނަކަ ކޯޕަރޭޝަނުން އަންނަނީ ކުރަމުންނެވެ. ފެން ފޯރުކޮށްދެނީ ކޮންމެ ސަރަޙައްދެއްގެވެސް ކައިރި ރަށްތަކުގައި ޤާއިމުކޮށްފައި ހުންނަ ފެނުގެ ނިޒާމުތައް މެދިވެރިކޮށެވެ.
އިރުވައި މޫސުމުގެ ހޫނު ދުވަސްތަކުގައި ރާއްޖޭގެ ބައެއް ރަށްރަށް ފެނަށްޖެހޭޖެހުން ކުޑަކުރުމަށް މިހާރުވެސް ދަނީ ބޮޑެތި މަސައްކަތްތަކެއް ފަށައިގެން ކުރިއަށެވެ. އެގޮތުން ގްރީން ކްލައިމެންޓް ފަންޑުގެ އެހީގައި ރަށްރަށުގައި ވާރެފެން ރައްކާކުރެވޭނެ ނިޒާމު ޤާއިމުކުރުމުގެ މަސައްކަތް މިހާރުވެސް ދަނީ ކުރަމުންނެވެ.
ކޮންމެ އަހަރެއްގެވެސް އިރުވައި މޫސުމުގެ ނޫނުގަދަ ދުވަސްވަރާ ދިމާކޮށް މިމައްސަލަ ރާއްޖޭގެ ބައެއް ރަށްރަށް ކުރިމަތިވެއެވެ. އެންވަޔަރަންމަންޓް މިނިސްޓްރީންދަނީ ރާއްޖޭގެ ހުރިހާ ރަށްރަށަށް މެދުކެނޑުމެއް ނެތި ސާފު ބޯފެން ލިބޭނެ އިންތިޒާމު ހަމަޖެއްސުމަށް މަސައްކަތްކުރަމުންނެވެ.