އިތުރު ދިވެއްސަކު ކޯވިޑު-19 އަށް ޕޮޒިޓިވް ވެއްޖެއެވެ. މިއީ ކޯވިޑް-19 އަށް ޕޮޒިޓިވްވި ދެވަނަ ދިވެހި މީހާއެވެ. އެޗްޕީއޭއިން ވިދާޅުވީ، ކޯވިޑް-19 އަށް ޕޮޒިޓިވްވެފައިވަނީ އިނގިރޭސިވިލާތުން ރާއްޖެއައިސް ކަރަންޓީން ފެސިލިޓީގައި ރޯޔަލް އައިލެންޑް ރިޒޯޓްގައި ހުރިމީހެއްކަމަށެވެ.
މި ބައްޔަށް ރާއްޖެއިން އެންމެ ފުރަތަމަ ޕޮޒިޓިވްވި ދިވެހި މީހާއަކީވެސް އިނގިރޭސިވިލާތުން ރާއްޖެ އައި މީހެކެވެ. ރާއްޖެއިން މިހާތަނަށް މިބައްޔަށް 17 މީހަކު ޕޮޒިޓިވްވެފައިވާއިރު 11 މީހަކު ވަނީ މިބަލިން ރަނގަޅުވެފައެވެ. އަދި އޭގެ ތެރެއިން ދެ މީހުންނަކީ ރާއްޖެ ދޫކޮށް ދިޔަފަހުން މިބައްޔަށް ޕޮޒިޓިވްކަން އެނގުނު ދެމީހުންނެވެ. އެމީހުންނަށް މި ބަލި ޖެހިފައިވާކަން އެނގުނީ ދިރާސާއަކަށް ނެގި ސާމްޕަލްތަކަކުންކަމަށްވެސް ސަރުކާރުން ވަނީ ހާމަކޮށްފައެވެ.
މި ބަލި ޖެހުނު މީހުންގެ ތެރެއިން މިވަގުތު ދެ ދިވެހިންނާއެކު ޖުމްލަ 4 މީހަކަށް ފަރުވާދެމުން އަންނަ ކަމަށް އެޗްޕީއޭއިން ވިދާޅުވެއެވެ. އަދި ފަރުވާދެމުން އަންނަ ހުރިހާ އެންމެންގެ ހާލުވެސް ރަނގަޅުކަމަށް އެޗްޕީއޭއިން ވިދާޅުވެއެވެ.