ގޭގެއަށް ގޮސް ސްޕެޝަލިސްޓް ޚިދުމަތްތަކާއި، ލެބޯޓްރީ ސާމްޕަލް ނެގުމުގެ ޚިދުމަތް ދޭން އޭޑީކޭއިން ފަށަފިއެވެ. މިޚިދުމަތުގެދަށުން ސުޕަރ ސްޕެޝަލިސްޓް، ސްޕެޝަލިސްޓް ކޮންސަލްޓޭޝަން އަދި ސާމްޕަލް ކަލެކްޝަންގެ ޚިދުމަތްދޭނެކަމަށް އޭޑީކޭއިން ބުނެއެވެ.
ގޭގެއަށްގޮސް ސްޕެޝަލިސްޓް ޚިދުމަތް ދޭނީ އޮންލައިން ކްލިނިކް މެދުވެރިކޮށް ޑޮކްޓަރު ބަލިމީހާ ބެލުމަށްފަހު، އިތުރަށް ޗެކްކުރަންޖެހޭ ޙާލަތްތަކުގައެވެ. މިފަދަ ހާލަތްތަކުގައި ސްޕެޝަލިސްޓް ޑޮކްޓަރެއް ބަލިމީހާގެ ގެއަށް ގޮސް ބަލިމީހާގެ ބަލީގެ އަލާމާތްތައް އިތުރަށް ބަލާނެއެވެ. އަދި ލެބް ޓެސްޓެއް ހަދަން ފެންނަ ބަލިމީހެއް ނަމަ، ސާމްޕަލް ނެގުމަށް ލެބޯޓްރީ މުއައްޒަފެއް ބަލިމީހާގެ ގެއަށް ދާނެއެވެ.
މި ޚިދުމަތް ހޯދަން ބޭނުންވާ މީހުން 1440 އަށް ގުޅައިގެން އެޕޮއިންޓްމަންޓް ހެއްދޭނެ ކަމަށް އެޑީކޭއިން މަޢުލޫމާތުދެއެވެ.
މި ޚިދުމަތް ޚާއްސަކުރަނީ ހޮސްޕިޓަލަށް ގޮސް ޑޮކްޓަރަށް ދެއްކުމަށް ދަތިވާ މީހުންނަށާއި، އަދި ބޮޑެތި ބަލިތަކުގައި އުޅޭ މީހުންނަށް ކަމަށްވެސް އޭޑީކޭއިން މަޢުލޫމާތުދެއެވެ.
އޭޑީކޭއިންވަނީ އޮންލައިން ފްލޫ ކްލިނިކްގެ ޚިދުމަތްވެސް ފަށާފައެވެ. މިއީ ހުމާއި ރޯގާގެ އަލާމާތްތައް ހުންނަ ނަމަ ގޭގައި ހުރެގެން ޑޮކްޓަރުގެ ލަފާ ހޯދުމުގެ ޚިދުމަތް ދިނުމަށް ފަށާފައިވާ ކްލިނިކެކެވެ. މި ޚިދުމަތް ފެށިތާ 2 ހަފްތާގެ ތެރޭގައި އޮންލައިން ކްލިނިކަށް 700 އާއި ގާތްކުރާ އަދަދަކަށް މީހުން ޑޮކްޓަރަށް ދައްކާފައިވެއވެެ. އޮންލައިން ފްލޫ ކްލިނިކުން ދޫކުރާ ބޭސް ސިޓީއަށް އާސަންދަ ލިބޭނެ އިންތިޒާމްވެސް އޭޑީކޭއިން ވަނީ ހަމަޖައްސާފައެވެ.
އޭޑީކޭއިންވަނީ އެ ހޮސްޕިޓަލްގެ ލެބް ޓެސްޓް ރިޕޯޓާއި ސީޓީ ސްކޭން ރިޕޯޓް ފޯނަށް ލިބޭގޮތްވެސް ހަމަޖައްސާފައެވެ.