ކުޅުދުއްފުށީގައި އަޅާފައިވާ ރޯހައުސްތަކުގެ ޔޫޓިލިޓީ މަސައްކަތް ނިންމުމަށް ސަބްކޮންޓްރެކްޓް އުސޫލުން ފެނަކައިން ކުންފުންޏަކާ ހަވާލުކޮށްފިއެވެ. ކުޅުދުއްފުށީގައި އަޅާފައިވާ ރޯހައުސްތަކުގައި ނުނިމިހުރި މަސައްކަތް ނިންމުމަށް ހައުސިންގ މިނިސްޓްރީން ފެނަކައާ ހަވާލުކޮށްފައިވަނީ މިދިޔަ އަހަރުގެ ނޮވެމްބަރުމަހުއެވެ.
އެރަށުގައި އަޅާފައިވާ ރޯހައުސްތަކުގެ ތެރެއިން ދިރިއުޅެން ފެށިފައިނުވާ މި 40 ރޯހައުސްތަކުގެ ޔޫޓިލިޓީ މަސައްކަތް ނިމިފައި ނުވާތީ ދިރިއުޅުން ބަދަލު ނުކުރެވިފައި ހުރި އިމާރާތްތަކެކެވެ. 2018ވަނަ އަހަރު ގެތައް ލިބުނު މީހުންގެ ލިސްޓް އިޢުލާންކުރިނަމަވެސް މި ގެތަކުގެ ފެނާއި، ނަރުދަމާއާއި، ކަރަންޓުގެ މަސައްކަތް ހުރީ ނުނިމިއެވެ. އަދި ބައެއް ގެތަކުގެ ސީލިންގެ މަސައްކަތްވެސް ނިމިފައި ނުވާކަމަށް ފެނަކައިން ބުނެއެވެ.
ފެނަކައިން ސަބްކޮންޓްރެކްޓް އުސޫލުން މި މަސައްކަތް ހަވާލުކުރީ ޓިކްޓެކް އިންވެސްޓްމަންޓްސްއާއެވެ. މިކަމުގެ އެއްބަސްވުމުގައި ފެނަކައިގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދުއެވެ. އަދި ޓިކްޓެކް އިންވެސްޓްމަންޓްސްގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޕަރޓްނަރ މުޙައްމަދު އަސްލަމްއެވެ.
40 ރޯހައުސްތަކުގެ ނުނިމިހުރި މަރާމާތުގެ މަސައްކަތް ކުރުމަށް 11.5 މިލިއަން ރުފިޔާ ޚަރަދުވާނެކަމަށް ފެނަކައިން ބުނެއެވެ. މި އެއްބަސްވުމުގެދަށުން މި މަސައްކަތްތައް މިއަހަރުގެ ޖޫން މަހުގެތެރޭގައި ނިންމުމަށްވަނީ އެއްބަސްވެފައެވެ.
ކުޅުދުއްފުށީގައި އިމާރާތްކޮށްފައިވާ ރޯހައުސްތަކަކީ 2012 ވަނަ އަހަރު އެރަށުގައި އިމާރާތްކޮށްފައިވާ ރޯހައުސްތަކެކެވެ.