ތިމާއަށް ލިބޭ މޮޅާއި މަންފާ އަނެކުންނާއި ހިއްސާކުރާ ބަޔަކަށް ވާންޖެހޭ - ރައީސްގެ އަނބިކަނބަލުން

މުޖުތަމަޢުގެ ދުޅަހެޔޮކަން ދެމިއޮންނާނީ އެކަކު އަނެކަކަށް އެހީތެރިވެ ތިމާއަށް ލިބޭ މޮޅާއި މަންފާ އަނެކުންނާއި ހިއްސާކުރާ ބަޔަކަށް ވެގެންކަމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ ޤައުމީ ޔުނިވަރސިޓީގެ މުވައްޒަފުންނާއި ދަރިވަރުންގެ މެދުގައި ދަރުމައަށް މަސައްކަތް ކުރުމުގެ ރޫޙު އާލާކުރުމުގެ މަޤްޞަދުގައި ފެށި "ފުރާތަ" ޕްރޮގްރާމް އިފްތިތާޙްކޮށްދެއްވާ ވާހަކަފުޅުދައްކަވަމުންނެވެ.

"ފުރާތަ" ޕްރޮގްރާމަކީ މުޖުތަމަޢުގައި އެކި ގޮތްގޮތުން އެހީތެރިކަން ބޭނުންވެފައިވާ މީހުންނަށް އެހީތެރިކަން ފޯރުކޮށްދީ، ދިވެހިރާއްޖޭގެ ޤައުމީ ޔުނިވަރސިޓީގެ މުވައްޒަފުންނާއި ދަރިވަރުންގެ މެދުގައި އިޖްތިމާޢީ ގުޅުން ބަދަހިކޮށް އެކަކު އަނެކަކަށް އެހީތެރިވެދީ، ދަރުމައަށް މަސައްކަތް ކުރުން ޕްރޮމޯޓްކުރުމަށް އެ ޔުނިވަރސިޓީން ފެށި ޕްރޮގްރާމެކެވެ.

މި ޕްރޮގްރާމް އިފްތިތާޙްކޮށްދެއްވާ ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވީ، ކޮންމެ މީހަކީވެސް އެހެން މީހުންގެ އެހީތެރިކަމަށް ބޭނުންވާނެ މީހެއްކަމަށާއި، މުޖުތަމަޢުގެ ދުޅަހެޔޮކަން ދެމިއޮންނާނީ އެކަކު އަނެކަކަށް އަޅާލައި އެހީތެރިވެދީގެންކަމަށެވެ. ހެޔޮކަންކަން ކުރުމުގައި ވަގުތު ހޭދަކުރުމަކީ އަމިއްލަ ނަފްސަށްވެސް ލިބިގެންދާ ބޮޑު ހިތްހަމަޖެހުމެއްކަން ފާހަގަކުރައްވާ، އެކަމަނާ ވިދާޅުވީ، އެފަދަ ކަންކަމަށް ފާޑުކިޔާ، ހިތްވަރު އެލޭ ފަދަ ބަސްބަސް ރައްދުކުރާ މީހުން ތިބޭނެކަންވެސް ދަންނަންޖެހޭކަމަށެވެ. އެގޮތުން އަނެކުންނަށް އެހީވުމަކީ ކޮންމެހެން ކުރަންޖެހޭ ކަމެއްނޫންކަމަށް ބައެއް މީހުން ދެކޭކަމަށާއި، ނަމަވެސް އެއީ ގޯސް ވިސްނުމެއްކަމަށް އެކަމަނާ ވިދާޅުވިއެވެ.

ފަޒްނާ ވިދާޅުވީ، ކިތަންމެ ދަތިކަމަކަށްވިޔަސް އަމިއްލަ ބޭނުންތައް އެކަނި ފުއްދާލައިގެން ތިބެވެންނެތްކަން އެއީ މިއަދު ޤަބޫލުކުރަންޖެހިފައިވާ ހަޤީޤަތެއްކަމަށެވެ. އަދި ތިމާއަށް ލިބޭ މޮޅާއި މަންފާ ނިކަންމެތިންނާއި ހިއްސާކުރަންޖެހޭކަމަށް އެކަމަނާ ވިދާޅުވިއެވެ.

"ތިމާއަށް ލިބޭ މޮޅާއި މަންފާ ނިކަމެތިންނާއި ހިއްސާކުރާ ބަޔަކަށްވާންޖެހޭ. އެހެންނޫނަމަ އޭގެ ނޭދެވޭ އަސަރު މުޅި މުޖުތަމަޢުއަށްކުރާނެ. މިއީ އެންމެންގެވެސް ޒިންމާއެއް. ކޮންމެ މީހަކީވެސް ތަފާތު ހުނަރުތަކެއް ލިބިފައިވާ މީހެއް. އެކަން އެބަޖެހޭ އަނެކުންނާއި ހިއްސާކުރަން" ރައީސްގެ އަނބިކަނބަލުން ވިދާޅުވިއެވެ.

ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ދެއްކެވި ވާހަކަފުޅުގައި މަޢުނަވީ ބަދަލުތައް ގެނެސްދިނުމުގައި އެންމެ މުހިއްމު ދައުރެއް އަދާކުރާ އެއް ދާއިރާއަކީ ތަޢުލީމީ ދާއިރާކަން ފާހަގަކުރައްވާ، ދިވެހިރާއްޖޭގެ ޤައުމީ ޔުނިވަރސިޓީން މިފަދަ ހަރަކާތެއް އިސްނަގައިގެން ކުރިއަށްގެންދާކަމަށްޓަކާ އުފާކުރައްވާކަމަށް ވިދާޅުވިއެވެ. އަދި މިއީ ރަމްޒީކަމެއްގެ ގޮތުގައި ކުރުމުގެ ބަދަލުގައި ދެމެހެއްޓެނިވި ސިފައެއްގައި މި ހަރަކާތް ކުރިއަށްގެންދިއުމަށްވެސް އެކަމަނާ ވަނީ ގޮވާލައްވާފައެވެ.

ދިވެހިރާއްޖޭގެ ޤައުމީ ޔުނިވަރސިޓީން "މުޖުތަމަޢުއަށް އަނބުރާ ދިނުމަށް" އިފްތިތާޙްކުރި "ފުރާތަ" ޕްރޮގްރާމުގެ ފުރަތަމަ ހަރަކާތް ޚާއްސަކޮށްފައިވަނީ ދަޢުލަތުގެ ބެލުމުގެ ދަށުގައި ފިޔަވަތީގައި ތިބޭ ކުދިންނަށެވެ. އެގޮތުން މި ހަރަކާތުގެ ތެރެއިން އެ ކުދިންނާއެކު ފޮތްކިޔުމަށް 20 ގަޑިއިރު ޚާއްސަކުރުމަށް ޤައުމީ ޔުނިވަރސިޓީން ވަނީ ނިންމާފައެވެ. މީގެ އިތުރުން އެކި ރޮނގުރޮނގުން ބޭނުންވާ ފަންނީ މަޢުލޫމާތާއި ކައުންސިލިންގ ދިނުމުގެ ހަރަކާތްތަކާއި، މަސައްކަތްތެރިންނަށް ބޭނުންވާ އެކި ކަހަލަ ހުނަރު ތަރައްޤީ ކުރުމުގެ ޕްރޮގްރާމްތަކާއި، ގަސް އިންދުމާއި، ފުރަތަމަ އެހީގެ ހަރަކާތްތައް ޤައުމީ ޔުނިވަރސިޓީގެ ކެމްޕަސްތަކުގައި ކުރިއަށްގެންދިއުމަށް ވަނީ ހަމަޖެހިފައެވެ.

މީގެ އިތުރުން ދީނީގޮތުން އާއްމުން ހޭލުންތެރިކުރުމަށް ޕަބްލިކް ސަރވިސް މީޑިއާ، ޕީ.އެސް.އެމްއާއި ގުޅިގެން ޓީވީ ޕްރޮގްރާމްތަކެއް އުފެއްދުމާއި، ރާއްޖޭގައި ފާހަގަކުރާ އެކި ދުވަސްތައް ފާހަގަކުރުމުގައި ޔުނިވަރސިޓީގެ ބައިވެރިވުމާއި ދައުރު ފުޅާކުރުމަށްވެސް "ފުރާތަ ޕްރޮގްރާމް"ގެ ދަށުން ވަނީ ނިންމާފައެވެ.