ކޮމަންވެލްތު ޔޫތު ކައުންސިލަށް ކުރިމަތިލުމުގެ ފުރުޞަތު ހުޅުވާލައިފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ވިދާޅުވީ، ކޮމަންވެލްތުގެ ހުރިހާ ޤައުމެއް ހިމެނޭގޮތަށް އެކުލަވާލާ ކޮމަންވެލްތު ޔޫތު ކައުންސިލަށް ކުރިމަތިލުމުގެ ފުރުޞަތު ދިވެހިރާއްޖެއަށްވެސް ލިބިފައިވާކަމަށެވެ. އެގޮތުން ކޮމަންވެލްތު ޔޫތު ކައުންސިލުގެ ޗެއަރޕަރސަން ކަމުގެ މަޤާމުވެސް ހިމެނޭހެން 9 މަޤާމަކަށް ކުރިމަތިލުމުގެ ފުރުޞަތު މިހާރު ވަނީ ހުޅުވާލާފައެވެ.
ކޮމަންވެލްތު ޔޫތު ކައުންސިލަށް ޒުވާނުންގެ ތަރައްޤީއާއި ކުރިއެރުމަށް މަސައްކަތްކުރާ ޖަމިއްޔާއެއްގައި މަދުވެގެން 3 އަހަރު އުޅެ ތަޖުރިބާ ލިބިފައިވާ ފަރާތްތަކަށް ކުރިމަތިލެވޭނެކަމަށް ޔޫތު މިނިސްޓްރީން ވިދާޅުވެއެވެ. އަދި ޒުވާނުންގެ ޤައުމީ މަޖިލީހުގައި މަދުވެގެން 3 އަހަރު އުޅެ ތަޖުރިބާ ލިބިފައިވާ ފަރާތްތަކަށާއި އުމުރުން 15 އަހަރާއި 27 އަހަރާދެމެދުގެ ޒުވާނުންނަށް ކައުންސިލުގެ މަޤާމުތަކަށް ކުރިމަތިލެވޭނެކަމަށްވެސް އެ މިނިސްޓްރީން ވިދާޅުވެފައިވެއެވެ.
ޔޫތު މިނިސްޓްރީން ވިދާޅުވީ، ކޮމަންވެލްތު ޔޫތު ކައުންސިލުގެ މަޤާމުތަކަށް ކުރިމަތިލުމަށް ޝަޢުގުވެރިވާ ޒުވާނުންނަށް އެ ފުރުޞަތު މިފެށޭ މާރޗުމަހުގެ 10 ވަނަ ދުވަހުގެ ނިޔަލަށް ހުޅުވާލާފައިވާކަމަށެވެ. ކޮމަންވެލްތު ޔޫތު ކައުންސިލަށް ހޮވޭ ފަރާތްތަކުން ޖޫން 20 ން 23 އަށް ރުވާންޑާގެ ވެރިރަށް ކިގާލީގައި ބޭއްވުމަށް ހަމަޖެހިފައިވާ "ކޮމަންވެލްތު ޔޫތު ފޯރަމް، ސީ.ވައި.ސީ"ގައި ބައިވެރިވުމުގެ ފުރުޞަތު ލިބިގެން ދާނެއެވެ. އަދި ކޮމަންވެލްތު ޔޫތު ކައުންސިލްގެ އިންތިޚާބުވެސް މި ފޯރަމްގައި ކުރިއަށްގެންދިއުމަށް ހަމަޖެހިފައިވެއެވެ.
3 އަހަރު ދުވަހުގެ މެދުކެނޑުމަކަށްފަހު ދިވެހިރާއްޖެއަށް ކޮމަންވެލްތުގެ މެމްބަރުކަން އަލުން ލިބިފައިވަނީ މިއަހަރުގެ ފެބްރުއަރީމަހުގެ 1 ވަނަ ދުވަހުއެވެ. އަދި ކޮމަންވެލްތުގެ މެންބަރު ޤައުމަކަށް ރާއްޖެ އަލުން ހަމަޖެއްސުމުން، އެ ޖަމާއަތުގެ މައި އިދާރާގައި ދިވެހި ދިދަ ނަގާފައިވަނީ ފެބްރުއަރީމަހުގެ 6 ވަނަ ދުވަހުއެވެ.
ކޮމަންވެލްތުގެ 54 ވަނަ މެމްބަރު ޤައުމުގެ ގޮތުގައި ރާއްޖެ އަލުން އެޖަމްއިއްޔާގެ މެންބަރަކަށްވެފައިވާއިރު، މި އަހަރު ރުވާންޑާގެ ވެރިރަށް ކިގާލީގައި ބާއްވާ ކޮމަންވެލްތު ޤައުމުތަކުގެ އިސްވެރިންގެ ބައްދަލުވުމުގައި ދިވެހިރާއްޖެއިން ބައިވެރިވެ، ޖަމްއިއްޔާގެ ފުރިހަމަ މެމްބަރެއްގެ ގޮތުގައި ހަރަކާތްތެރިވާނެއެވެ. އަދި ކޮމަންވެލްތުގެ ސަބްސިޑަރީ ޖަމްއިއްޔާތަކުގައިވެސް ދިވެހިރާއްޖެއިން ބައިވެރިވެ، ބިނާކުރަނިވި މަސައްކަތްތަކެއް ކުރާނެކަމަށް ސަރުކާރުން ވަނީ ވިދާޅުވެފައެވެ.