"ޤައުމީ ޒުވާނުންގެ ދުވަސް" ރަސްމީކޮށް ފާހަގަކުރާ ރަށް ކަނޑައެޅުމަށް، އެކަމަށް ޝަޢުގުވެރިވާ ރަށްތަކުން ޕްރޮޕޯސަލް ހުށައެޅުމުގެ ފުރުސަތު މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓުން ހުޅުވާލުމަށް ނިންމައިފިއެވެ.
ޕްރޮޕޯސަލް ހުށައެޅުމާއި ގުޅޭގޮތުން މަޢުލޫމާތު ދިނުން އޮންނާނީ މާޗު 10ވާ އަންގާރަދުވަހު ސޯޝަލް ސެންޓަރުގައެވެ.
ގައުމީ ޒުވާނުންގެ ދުވަހުގެ ގޮތުގައި ރަސްމީކޮށް ފާހަގަކުރުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ކަނޑައަޅުއްވާފައިވަނީ ކޮންމެ އަހަރެއްގެ އޮކްޓޯބަރުމަހުގެ 22ވަނަ ދުވަހެވެ.
މިދުވަސް މިއަހަރު ފާހަގަކުރުމަށް ނިންމާފައިވަނީ ޒުވާނުންގެ ޢީދެއްގެ ގޮތުގައެވެ. އަދި ޒުވާނުންގެ ދުވަހަކީ ރާއްޖޭގެ އެކި ކަންކޮޅުތަކުގައި ދިރިއުޅޭ ޒުވާނުންނަށް ބައިވެރިވެވޭ އީދެއްގެ ގޮތުގައި ހެދުމަށް މި ދުވަސް ފާހަގަކުރުމަށް ނިންމާފައިވަނީ، އަތޮޅުތެރޭގެ ރަށެއްގައެވެ.
މިނިސްޓްރީއިން އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓުން މިހާރުވަނީ މިދުވަހަށް ތައްޔާރުވުމުގެ މަސައްކަތްތައް ފަށާފައެވެ.
އެގޮތުން މިނިސްޓްރީއިންވަނީ ދުވަހުގެ ރަސްމީ ޖަލްސާއާއި، އަދި ޒުވާނުންގެ ދުވަހުގެ ހަރަކާތްތައް ބާއްވަން ބޭނުންވާ ރަށެއް ކަނޑައެޅުމަށް ހުޅުވާލާފައެވެ.
ހަރަކާތްތައް ކުރިއަށްގެންދާ ރަށް ކަޑައަޅަނީ ރަށްތަކުން ހުށައަޅާ ޕްރޮޕޯސަލްތަކުގެ ތެރެއިން އެންމެ ރަނގަޅު ޕްރޮޕޯސަލެއް ހުށައަޅާ ރަށެއްގައެވެ.
މިނިސްޓްރީން ކޮށްފައިވާ އިޢުލާނެއްގައި ބުނެފައިވަނީ ޕްރޮޕޯސަލް ތައްޔާރުކުރުމަށް ބޭނުންވާ މަޢުލޫމާތު ދިނުމަށް ބާއްވާ ބައްދަލުވުން މާޗު 10ވާ އަންގާރަދުވަހު ސޯޝަލް ސެންޓަރުގައި އޮންނާނެކަމަށެވެ. މި ސެޝަންގައި ޒުވާނުންގެ ދުވަސް ކުރިއަށްގެންދިއުމަށް ރާވަފައިވާ ހަރަކާތްތަކާއި، ޕްރޮޕޯސަލް ހުށައަޅާއިރު ހިމަނަންވީ ކަންކަމުގެ މަޢުލޫމާތުދޭނެއެވެ.
ޒުވާނުންގެ ދުވަހުގެ ހަރަކާތްތައް ކުރިއަށްގެންދިއުމަށް އެދި ރަށްރަށުން ޕްރޮޕޯސަލް ހުށައެޅުމުގެ އެންމެ ފަހު ތާރީޚަކީ އޭޕްރިމް މަހުގެ 30ވަނަ ދުވަހުގެ 13:00ގެ ކުރިންނެވެ.
ޕްރޮޕޯސަލް މާފަންނު ސޯޝަލް ސެންޓަރު ކައުންޓަރަށާއި، ޔޫތް މިނިސްޓްރީގެ އީމެއިން މެދުވެރިކޮށްވެސް ހުށައެޅޭނެއެވެ..
މީގެކުރިން ޒުވާނުންގެ ދުވަސް އެކި އެކި ތާރީޚުތަކުގައި ފާހަގަކުރަމުން އައިސްފައިވެއެވެ. ނަމަވެސް ޒުވާނުންގެ ދުވަސް ވަކި ދުވަހެއްގެ ގޮތުގައި ކަނޑައަޅައި ފާހަގަކުރުމަށް ނިންމީ ޤައުމުގެ ތަރައްޤީގައި ޒުވާނުންގެ ޙިއްސާ ބަލައިގަނެ އެކަން ޤައުމީ ފެންވަރެއްގައި ފާހަގަކުރުމަށެވެެ.
މި ދުވަސް 22 އޮކްޓޯބަރުގެ ގޮތުގައި ފާހަގަކުރުމަށް ނިންމީ 18އަހަރު މަތީގެ މީހުންނަށް، ވޯޓުލުމާއި، އިންތިޚާބުތަކުގައި ބައިވެރިވުމުގެ ޙައްގު ލިބިދިނުމުގެ މާއްދާ ރައްޔިތުންގެ ޚާއްސަ މަޖިލީހުން ފާސްކުރި ތާރީޚަކީ އޮކްޓޯބަރު މަހުގެ 22ވަނަ ދުވަކަމަށްވާތީއެވެ.