ތ.ތިމަރަފުށީގައި އަލަށް ހަދާ 100 ހައުސިންގ ޔުނިޓްގެ ޤަމަލީ މަސައްކަތް ކުރިއަށްއޮތް ހަފްތާއެއްހާ ދުވަހުގެ ތެރޭގައި ފަށާނެކަމަށް ހައުސިންގ މިނިސްޓްރީއިން ބުނެފިއެވެ.
މަސައްކަތް ފެށުމަށް ބޭނުންވާ ތަކެތި މިހާރުވަނީ އެރަށަށް ގެންގޮސްފައެވެ.
ތ. ތިމަރަފުށީގައި ރޯ ހައުސް އެޅުމުގެ ޢަމަލީ މަސައްކަތް ކުރުމަށް އެސް.ޖޭ ކޮންސްޓްރަކްޝަނާއި ހަވާލުކޮށްފައި ވަނީ މިދިޔަ މަހުގެ 23ވަނަ ދުވަހުއެވެ.
ތިމަރަފުށީގައި އަލަށް ކުރިއަށްގެންދާ ހައުސިންގ މަޝްރޫޢުގެ ދަށުން އެރަށުގައި ހެދުމަށް ހަމަޖެހިފައި ވަނީ 100 ރޯހައުސެވެ.
މިއިން ކޮންމެ ރޯ ހައުސެއްގައި 3 ކޮޓަރިއާއި، 3 ފާޚަނާ އާއ ސިޓިންގ ރޫމާއި ލޯންޑްރީ އަދި ފްރަންޓް ޔަރޑްވެސް ހިމެނޭނެއެވެ.
ތ،ތިމަރަފުއްޓަކީ 20 ހެކްޓަރުގެ ބިން އޮންނަ ރަށެކެވެ. ޕީއެސްއެމްއާއި ވާހަކަދައްކަވަމުން ތިމަރަފުށީ ކައުންސިލްގެ ރައީސް އިސްމާއިލް އިބްރާޙިމް ވިދާޅުވީ ރަށުގެ ލޭންޑް ޔޫސް ޕްލޭން ހެދިއިރު 190 ރޯ ހައުސް ހެދޭނެ ބިން ރަށުން ކަނޑައަޅާފައިވާނެކަމަށެވެ. ނަމަވެސް އަލަށް ފަށާ ޕްރޮޖެޖްޓްގެދަށުން ތިމަރަފުށީގައ ހަދަނީ 100 ރޯ ހައުސްއެވެ.
މިއިން ކޮންމެ ރޯ ހައުސްއެއް 1200އަަކަފޫޓުގެ ބިމުގައި އެޅުމަށް ކުރިން ނިންމި ނަމަވެސް، ކައުންސިލްގެ އެދުމާއިއެކު ރޯހައުސް އަޅާ ބިންވަނީ 1400އަކަފޫޓަށް އިތުރުކޮށްފައެވެ. ޖާގަ އިތުރުކުުރީ މި ގެތަކަކީ ޖާގަ ތަނަވަސް، ގަސްއިންދާލުމާއި ހިތްހަމަ ޖައްސާލުމަށް ތިބެވޭނެހެން ތަނެގެ ގޮތުގައި ހެދުމަށެވެ.
ކައުންސިލުން ބުނެފައިވަނީ ގެތަށް ޑިޒައިން ކުރުމުގެ މަސައްކަތްތައް އެއްކޮށް ނިމިފައިވާކަމަށެވެ. އެރަށަށް މިހާރުވަނީ ރޯ ހައުސްތައް ހެދުމަށް ބޭނުންވާ ތަކެނި ގެންގޮސްފައެވެ. ޢަމަލީ މަސައްކަތް ކުރިއަށް އޮތް ހަފްތާއެއްހާދުވަހުގެ ތެރޭގައި ފެށުމަށްދަނީ ތައްޔާރުވަމުންނެވެ.
ތ.ތިމަރަފުއްޓަކީ އާބާދީގައި 2500އަށްވުރެ ގިނަ މީހުން ދިރިއުޅެމުން އަންނަ ރަށެކެވެ. އިސްމާއިލް އިބްރާޙިމް ވިދާޅުވީރަށުގައި ތިބި ގޯތި ބޭނުންވާ މީހުންގެ އަދަދު ކައުސިލުން ބަލާފައިވާކަމަށެވެ. އެގޮތުން މިހާރުވެސް ބީހިޔާވަހިކަން ބޭނުންވާ ބޭނުންވާ 300 އަށްވުރެ ގިނަ މީހުން ފާހަގަވެފައިވާކަމަށް ކައުންސިލްގެ ރައީސް ވިދާޅުވިއެވެ.
މި ރޯހައުސްތަކަށް ކުރިމަތިލުމަށް ހުޅުވާލާނީ ގެތަކުގެ ސްޓްރަކްޗަރގެ މަސައްކަތްތައް ނިމުމުންނެވެ. ގެތަކަށް މީހުން ހޮވާނީ ހައުސިންގ މިނިސްޓްރީން މިކަމަށް ގެންގުޅޭ އުސޫލުގެ ދަށުން، ފޯމް ހުށައަޅާ ފަރާތްތަކުގެ ތެރެއިން އެންމެ މަތިން މާކްސް ލިބޭ މީހުންގެ ތަރުތީބުންނެވެ.
މި މަސައްކަތް ހަވާލުކޮށްފައިވަނީ 1 އަހަރު ދުވަހުގެ ތެރޭގައި މަސައްކަތްތައް ނިންމާ ގޮތަށެވެ. މި ޕްރޮޖެކްޓްގެ މަސައްކަތް އެސް.ޖޭ ކޮންސްޓްރަކްޝަނާއި ހަވާލުކުރީ ޑިޒައިންކުރުމާއި، އިމާރާތުގެ ޢަމަލީ މަސައްކަތް ހިމެނޭގޮތަށެވެ.
މި މަޝްރޫޢުއަށް ސަރުކާރުން 71.5 މިލިއަނަށްވުރެ ގިނަ ރުފިޔާ ޚަރަދުކުރުމަށްވަނީ ހަމަޖެހިފައެވެ.