ޙަބީބް ބޭންކް ލިމިޓެޑުގައި ހުޅުވާފައިހުރި އެކަންޓްތަކުގެ ތެރެއިން ފަސް އަހަރު ވަންދެން މުއާމަލާތެއް ނުކުރާ އެކަންޓްތައް ބަންދުކުރަން ނިންމައިިފިއެވެ.
ޙަބީބް ބޭންކުން ވަނީ 31 ޑިސެންބަރު 2019ގެ ނިޔަލަށް އެއްވެސް މުއާމަލާތެއް ނުކުރާތާ ފަސް އަހަރުވެފައިވާ އެކައުންޓްތަކުގެ މައުލޫމާތު އާންމުކޮށްފައެވެ. ހަބީބް ބެންކުން ބުނީ މުޢާމަލާތެއް ނުކުރާތާ 5 އަހަރުވެފައިވާ 102 އެކައުންޓެއް އެބެންކުގައި އެބަހުރިކަމަށެވެ. އަދި ބެންކުން އިއުލާން ގެޒެޓު ކުރާ ތާރީހުން ފެށިގެން 60 ދުވަސް ތެރޭގައި ވެރިފަރާތުން އެކައުންޓްތަކާމެދު އަމަލްކުރާނެ ގޮތުގެ އެއްވެސް އިރުޝާދެއް ނުލިބިއްޖެނަމަ މިއެކައުންޓްތައް ބަންދުކުރާނެކަމަށް ޙަބީބް ބޭންކުން ބުނެއެވެ.
ޙަބީބް ބޭންކުން ބުނީ މިއެކައުންޓްތަކުގެ ވެރި ފަރާތްތަކުން އެއްވެސް މުއާމަލާތެއް ކޮށްފައި ނެތަސް، ޤަވައިދާ އެއްގޮތަށް އެކައުންޓް ސްޓޭޓްމަންޓުތައް ވެރިފަރާތްތަކުގެ އެޑްރެސްތަކަށް ފޮނުވަމުންދާކަމަށެވެ. އަދި އެކައުންޓް ތަފްސީލް ހާމަކުރީ ބޭންކުން އެންގުމުންވެސް އެކައުންޓްތަކާމެދު އަމަލުކުރަންވީ ގޮތުގެ އިރުޝާދު ދީފައިނުވާ ފަރާތްތަކުގެ ތަފްސީލްކަމަށެވެ.
އެހެންކަމުން ފެބްރުއަރީ 20 ވަނަ ދުވަހުން ފެށިގެން 60 އެއްވެސް އިރުޝާދެއް ނުލިބޭ އެކައުންޓްތައް ބަންދުކޮށް، އެކައުންޓްތަކުގައި ހުރި ފައިސާ ޤާނޫނުގައި ބަޔާންކޮށްފައިވާ ގޮތަށް މޯލްޑިވްސް މަނިޓަރީ އޮތޯރިޓީއަށް ފޮނުވާނެކަމަށް ޙަބީބް ބޭންކުން ބުނެއެވެ.
1941 ގައި ޤާއިމްކޮށްފައިވާ ހަބީބް ބޭންކަކީ ޕާކިސްތާނުގެ މަލްޓިނޭޝަނަލް ބޭންކެކެވެ. ރާއްޖޭގައި ޙަބީބް ބޭންކުގެ ބްރާންޗެއް ހުޅުވީ 1976 ވަނަ އަހަރުއެވެ.