ދިވެހި ބަހުގެ އެކި ބަހުރުވަތައް ދިރިއުޅުމުގެ ކަންކަމުގައި ބޭނުންކުރަން ތަރުހީބުދޭންޖެހޭ - ރައީސް
ރާއްޖޭގެ އަތޮޅުތަކުގައި ބޭނުންކުރަމުން އަންނަ ދިވެހި ބަހުގެ އެކި ބަހުރުވަތައް ބޭނުންކުރުމަށް ތަރުހީބު ދިނުމަކީ ދިވެހި ބަސް މުއްސަނދިވެ އިތުރަށް ދިރުން ލިބޭނެ ކަމެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ބައިނަލްއަޤްވާމީ މާދަރީ ބަހުގެ ދުވަހާ ގުޅިގެން ކުރެއްވި ޓުވީޓެއްގައި ރައީސުލްޖުމްހޫރިއްޔާ ވަނީ ބައިނަލްއަޤްވާމީ މާދަރީ ބަހުގެ ދުވަހުގެ ތަހުނިޔާ ހުރިހާ ދިވެހިންނަށް ފޮނުއްވާފައެވެ. އަދި ރާއްޖޭގެ އަތޮޅުތަކުގައި ބޭނުންކުރަމުން އަންނަ ދިވެހި ބަހުގެ އެކި ބަހުރުވަތައް ދިރިއުޅުމުގެ އެންމެހާކަމެއްގައި ބޭނުންކުރަން ތަރުހީބު ދިނުމަކީ ބަސް މުއްސަނދިވެ، އިތުރަށް ދިރުން ލިބޭނެކަމެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ބައިނަލްއަޤްވާމީ މާދަރީ ބަހުގެ ދުވަހަށް ޔުނެސްކޯއިން ކަނޑައަޅާފައިވާ ޝިއާރުގެ ދިވެހި ތަރުޖަމާއަކީ "ސަރަހައްދީ އިމެއްނެތި ބަސްބަސް" އެވެ. ދުނިޔޭގެ މީހުން ވާހަކަދައްކައި އުޅޭ 7000 ބަހުގެ ތެރެއިން ދެބައިކުޅައެއްބައި ބަސް އުވި ނެތިގެން ދިއުމުގެ ބިރު އެބައޮތްކަމަށް ބަހުގެ މާހިރުން ވިދާޅުވާއިރު، މިފަދަ ދުވަހެއް ފާހަގަކުރުމުގެ އެންމެ ބޮޑު ބޭނުމަކީވެސް އާއްމުންގެ މެދުގައި އެކަމާމެދު ހޭލުންތެރިކަން އިތުރުކޮށް، އެބަޔަކު ވާހަކަދެއްކުމަށް ބޭނުންކުރާ ބަސް ހިމާޔަތްތެރިކޮށް ބަހަށް ލޯބި ޖެއްސުމެވެ.
މިއަދަކީ ބައިނަލްއަޤްވާމީ މާދަރީ ބަހުގެ ދުވަސް މުޅި ދުނިޔޭގެ އެކި ކަންކޮޅުތަކުގައި ފާހަގަކުރާތާ 20 އަހަރު ފުރޭ ދުވަހެވެ. މި ދުވަސް ރާއްޖޭގެ އެކި ސަރަޙައްދުތަކުގައިވެސް އަންނަނީ ކުލަގަދަކޮށް ފާހަގަކުރަމުންނެވެ.