ސަރުކާރުން ރައްޔިތުންގެ މަޖިލީހަށް ހުށަހަޅުއްވާފައި މިހާރުހުރީ އަންޒަމާނުކަރައަށް ވައިއެރި އިރުގެ ބިލްތަކެއްކަމަށް ވިދާޅުވެ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވާފައިވާ ބިލްތަކާމެދު ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ފާޑު ވިދާޅުވެއްޖެއެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުއްވި ނަފްސާނީ ސިއްޙަތުގެ ބިލު އިތުރަށް ފުރިހަމަ ކުރުމަށްޓަކައި އަނބުރާ ގޮސްގޮސްފިއެވެ.
ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމް ހުށައެޅުއްވި ނަފްސާނީ ސިއްޙަތުގެ ބިލު އަނބުރާ ފޮނުވާލެއްވިކަން އިޢުލާންކުރައްވަމުން މަޖިލީހުގެ ރައީސް މުޙައްމަދު ނަޝީދު ވިދާޅުވީ، ބިލުގެ ގޮތުގައި މަޖިލީހުގެ ތަޅުމަށް ބައެއް ފަހަރު ހުށައަޅާނީ ސުރިޚީއެއް ކަމަށެވެ. އަދި މަޖިލީހުން އެސުރުޚީ ބިލަކަށް ހަދާ ރައްޔިތުން ބޭނުންވާ ގޮތް ދެނެގަނެ އެކި ފަރާތްތަކާއި މަޝްވަރާކުރުމަށްފަހު ބިލު ފުރިހަކުރައްވާކަމަށެވެ. ބިލަކާ ގުޅޭގޮތުން އެންމެހައި މަޝްވަރާތައް ކުރެވޭނެ މަޖިލީހަކީ ރައްޔިތުންގެ މަޖިލިސްކަމަށާއި، ޤާނޫނު ހެދުމުގެ ހުރިހާ ކަމެއްކުރަނީވެސް މަޖިލީހުންކަމަށް މަޖިލީހުގެ ރައީސް ފާހަގަކުރެއްވިއެވެ.
"މިތަނުގައި ހޯލްތައްވެސް ހުރީ މިތަނުގައި މައިކްތައްވެސް ހުރީ. މިތަނުގައި އިންތިޒާމެއްވެސް ހަމަޖެހިފައި އޮތީ، ރާއްޖޭގެ އެކިއެކި ތަންތަނުން މީހުން ގެނެސްގެން ޚިޔާލުހޯދާ މަޝްވަރާކޮށް ހެދުމަށް. ރާއްޖޭގެ އެހެންތަނެއްގައި މިއިންތިޒާމްތަކެއް ނުހުންނާނެ. އެހެންވީމާ ސަރުކާރުން ބިލެއް ހުށައަޅާފައި އޮންނާނީ އެހާހަމަކަން ބޮޑު ގޮތަކަށްނޫން." ރައީސް ނަޝީދު ވިދާޅުވިއެވެ.
މަޖިލީހުގެ ރައީސް ވިދާޅުވީ، އާންމުންނާއި ވުޒާރާތަކުގެ ޚިޔާލު އެބިލްތަަކަށް ގެންނަން އޮންނަތަނަކީ ޤާނޫނު ހަދާ މަޖިލިސްކަމަށާއި، މަޖިލިސް "ޑުޕްލިކޭޓް" ކުރުން އެއީ ބޭނުންތެރިކަމެއް ނޫންކަމަށެވެ. ނަމަވެސް އެތަން ފެންނަމުންދާކަމަށް މަޖިލީހުގެ ރައީސް ވިދަޅުވިއެވެ.
މަޖިލީހުގެ މިދިޔަ ދައުރު ނިމުނުއިރު 56 ބިލު އެއްފަހަރާ ލިބުނުކަމަށާއި، އެބިލްތައް އެކިއެކި މެންބަރުން ހުށައަޅުއްވަމުންދާކަން ފާހަގަކުރައްވައި މަޖިލީހުގެ ރައީސް ވިދާޅުވީ، ބައިނަލްއަޤްވާމީ ފަރާތްތަކުގެ ޕްރެޝަރާހެދި ވުޒާރަތަކުން ބިލްތައް އެކުލަވާލައި އެއްފަހަރާ ބިލްތައް މަޖިލީހަށް ފޮނުވާކަމަށެވެ. އެބިލްތަކުގައި ލިޔެފައި ހުންނަނީ ބަހަނާތަކެއްކަމަށްވެސް ރައީސް ނަޝީދު ވިދާޅުވިއެވެ.
"އެހެންވީމަ އިއްޒަތްތެރި މެންބަރުން މި ބަހަނާތަކަށް ބައްލަވައިގެން މިއަދު ދިވެހިން އެދެނީ އެބަހަނާތަކެއް ނޫން، ކަންކަން ކުރުމަށް. ސަރުކާރުން ހުށައަޅާފައިވާ ބިލްތަކަކީ އެއްވެސް ހާލެއްގައި އެމްޑީޕީގެ މެނިފެސްޓޯގެ އަމާޒުތައް ސީދާގޮތުގައި ފާހަގަވާ ބިލްތަކެއް ނޫން. އެއީ ގާތްގަނޑަކަށް 1980ގެ އަހަރުތަކުންސުރެ އެކިއެކި ވުޒާރާތަކުގައި އެކިއެކި ގޮތްގޮތަށް ހުރި ބިލު." ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރައްޔިތުންނަށް ދެއްވާނެ ޔަޤީންކަމަކީ މަޖިލީހުގައިހުރި ބިލްތަކަކީ އަންޒާނުކަރައަށް ވައިއެރި އިރުގެ ބިލްތަކެއްކަމުގަގައެވެ.
ނޯޓު: އަންޒަމާން ނުވަތަ އަންޒަމާނުކަރައަކީ ، މަދަރާސީއާ ދިމާ ދެކުނުގައި އޮންނަ ޖަޒީރާތަކެކެވެ. އެއީ އަންޑަމަން އެންޑް ނިކޯބާ އައިލެންޑްސްއެވެ. އަންޒަމާނަށް ނުވަތަ އަންޒަމާނު ކަރައަށް ވައިއެރި އިރޭ ދިވެހިން ބުނެއުޅެނީ، މާކުރީ ޒަމަނުގެ ކަމެއްކަމަށް ނުވަތަ ޤަދީމީ ޒަމާނުގެ ކަމެއްކަމަށް ބުނުމުގެ ގޮތުންނެވެ.