ނައިފަރު ހައުސިންގ ޔުނިޓުގެ ޢަމަލީ މަސައްކަތް އެއް މަސްތެރޭގައި ފެށޭނެ: ހައުސިންގ މިނިސްޓްރީ

ނައިފަރުގައި ހައުސިންގ ޔުނިޓްތައް އެޅުމަށް ބޭނުންވާ ބިން ކައުންސިލުން ކޮންޓްޓެކްޓަރާއި ހަވާލުކޮށްފިއެވެ.

ޕްރޮޖެކްޓްގެ ޢަމަލީ މަސައްކަތް ކުރިއަށްއޮތް މަހެއްހާ ދުވަހުގެތެރޭގައި ފެށޭނެކަމަށް ހައުސިންގ މިނިސްޓްރީން ވަނީ ވިދާޅުވެފައެވެ.

ނައިފަރުގައި 100 ހައުސިންގ ޔުނިޓް އެޅުމުގެ މަސައްކަތް ކުރުމަށް ފުރަތަމަ ކޮންޓްރެކްޓަރަކާއިއެކު ސޮއިކޮށްފައިވަނީ މިދިޔަ އޮކްޓޯބަރުމަހުއެވެ. ނަމަވެސް ކޮންޓްރެކްޓަރުގެ ލިޔެކިޔުންތަކުގައި މައްސަލަތަކެއް ހުރުމުގެ ސަބަބުން އެ އެއްބަސްވުން އުވާލައި އަލުން މަޝްރުޢޫގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަނާއި ހަވާލުކޮށްފައި ވަނީ ނިމުނު ޖެނުއަރީ މަހުގެތެރޭގައެވެ.

މިމަޝްރޫގެ ދަށުން އަޅަނީ 3 ފަންގިފިލާގެ 3 އިމާރާތާއި، 4 ފަންގިފިލާގެ 1 އިމާރާތެވެ. 3 ފަންގިފިލާގެ އިމާރާތްތަކުގައި އިމަރާތެއްގައި 24 އެޕާޓްމަންޓް ހެދުމަށް ވަނީ ހަމަޖެހިފައެވެ. އަދި 4 ފަންގިފިލާގެ އިމާރާތުގައި 28 އެޕާޓްމަންޓް ހަދާނެއެވެ. މި އެޕަރޓްމަންޓްތަކުގައި ހިމެނެނީ 3 ކޮޓަރިއާއި، 3 ފާޚަނަ އާއި، ބަދިގެ އަދި ސްޓޯރޫމެވެ.

ނައިފަރު ކައުންސިލުން މިިދިޔަ ހޯމަދުވަހު ވަނީ ހައުސިންގ ޔުނިޓްތައް އެޅުމަށް ހަމަޖެހިފައިވާ ބިން ހައުސިންގ މިނިސްޓްރީ އާއި ހަވާލުކޮށްފައެވެ. މި ހައުސިންގ މަޝްރޫޢު ކުރިއަށްގެންދިއުމަށް ހަމަޖެހިފައި ވަނީ އެއް ލައްކަ އެގާރަ ހާސް އަކަފޫޓުގެ ބިމެއްގައެވެ. ހައުސިންގ މިނިސްޓްރީއިން ވިދާޅުވެފައި ވަނީ އަންނަ ހަފްތާގެ ތެރޭގައި ހައުސިންގ މަޝްރޫޢު ފެށުމަށް ބޭނުންވާ ތަކެތި އެރަށަށް ގެންދަން ފަށާނެކަމަށެވެ. އަދި ކުރިއަށް އޮތް މަހެއްހާ ދުވަހުގެ ތެރޭގައި ޢަމަލީ މަސައްކަތް ފަށާނެކަމަށެވެ.

ރަށުގެ ރައްޔިތުންގެ އެދުމުގެ މަތިން ހައުސިންގ ޔުނިޓްތަކުގެ ކުރެހުންތަކަށްވެސް ހައުސިންގ މިނިސްޓްރީން ވަނީ ބަދަލުގެނެސްފައެވެ. މި މަޝްރޫޢުއަކީ ސަރުކާރުން 72މިލިއަން ރުފިޔާ ޚަރަދުކޮށްގެން ކުރިއަށްގެންދިއުމަށް ނިންމާފައިވާ މަޝްރޫޢުއެކެވެ.

ހައުސިންގ ޔުނިޓްތައް އަޅަނީ ނައިފަރުގެ ހިއްކި ބިމުގައެވެ. ނައިފަރަކީ އާބާދީގައި 5000 ވުރެ ގިނަ މީހުން ދިރިއުޅެމުން އަންނަ ރަށެކެވެ. ނައިފަރުގެ ބޯހިޔާވަހިކަމުގެ މައްސަލަ އާއި ގުޅޭގޮތުން ވާހަކަދައްކަވަމުން ރަށު ކައުންސިލްގެ ރައީސް މުޙައްމަދު ކާރިމް ވިދާޅުވީ ނައިފަރުގެ އާބާދީ އިތުރުވަމުން އައުމާއިއެކު ބޯހިޔާވަހިކަމުގެ މައްސަލަ ވަރަށް ބޮޑުވެފައިވާކަމަށެވެ. އެގޮތުން މިހާރުވެސް އަމިއްލަ ގެދޮރު ބޭނުންވާ ހާހެއްހާ މީހުން އެރަށުގައި ތިބިކަމަށެވެ.

ބޯހިޔާވަހިކަމުގެ މައްސަލަ ޙައްލުކުރުމަށް 2004ވަނަ އަހަރު އެރަށުން ވަނީ 16 ހެކްޓަރުގެ ބިންވެސް ހިއްކާފައެވެ. އެރަށުން އެންމެ ފަހުން ގޯތި ދޫކޮށްފައިވަނީ 2012ވަނަ އަހަރުއެވެ. އެ ބުރުގައި ނައިފަރު ހިއްކި ބިން ހިމެނޭހެން 300ގޯތި ވަނީ ދޫކޮށްފައެވެ. ނަމަވެސް އޭގެފަހުން 8 އަހަރުވެފައި ވާއިރު މިހާރުވެސް ގޯތިބޭނުންވާ ގިނަ ބަޔަކު ތިބިކަން ކައުންސިލްގެ ރައީސް ވަނީ ފާހަގަކުރައްވާފައެވެ.

ކާރިމް ވިދާޅުވީ އަލަށް ހަދާ 100 ހައުސިންގ ޔުނިޓަށް ކުރިމަތިލުމަށް ހުޅުވާލާނީ ހައުސިންގ ޔުނިޓްތަކުގެ ސްޓްރަކްޗަރގެ މަސައްކަތްތައް ނިމުމުންކަމަށެވެ. ކުރިއަށްއޮތް 4 މަސް ތެރޭގައި ޔުނިޓްތަކަށް ކުރިމަތިލާން ހުޅުވާލެވޭނެކަމަށް ލަފާކުރެއްވޭކަމަށް އޭނާ ވިދާޅުވިއެވެ.

ނައިފަރު ހައުސިންގ މަޝްރޫޢު ނިންމުމަށް އެއްބަސްވެފައި ވަނީ މިއަހަރުގެ ނޮވެމްބަރުމަހުގެ ނިޔަލަށެވެ.