ދުނިޔެއަށް އަންނަ ޓެކްނޮލޮޖީތައް ރާއްޖެއަށް ތައާރަފްކުރުމުގައި އުރީދޫ މޯލްޑިވްސް އަބަދުވެސް އެންމެ ކުރީގައި ހުންނާނެކަމަށް އެ ކުންފުނިން ބުނެފިއެވެ.
އުރީދޫއިން ވަނީ 2020 ވަނަ އަހަރަށް މަރުހަބާ ކިޔައި އުރީދޫގެ ޙިދުމަތުގެ 15 އަހަރު ފާހަގަކުރުމަށް ހޮޓެލް ޖެންގައި ޙާއްސަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި ވާހަކަދައްކަވަމުން އުރީދޫގެ ސީއީއޯ ނަޖީބް ހާން ވިދާޅުވީ، އުރީދޫއިން ރާއްޖޭގެ އެކި ކުންފުނިތަކާއި ޕާޓްނަރޝިފް ހަދައިގެން ދިވެހިންނަށް އެންމެ ރަނގަޅު ޙިދުމަތެއް ލިބޭތޯ ކަށަވަރު ކުރާނެކަމަށެވެ. އަދި މިއަހަރުވެސް ޕާޓްނަރުންނާއި ގުޅިގެން ކަސްޓަމަރުންނަށް ރަނގަޅު ޙިދުމަތެއް ފޯރުކޮށްދިނުމަށް މަސައްކަތް ކުރާނެކަމަށް ނަޖީބް ހާން ވިދާޅުވިއެވެ. މީގެއިތުރުން އުރީދޫގެ ޕިކްސްޒް ބްރޯޑްބޭންޑްގެ ޙިދުމަތް ރާއްޖޭގެ 70 އިންސައްތައަށް މިހާރު ފޯރުކޮށްދެވިފައިވާކަންވެސް އޭނާ ފާހަގަކުރެއްވިއެވެ.
މި ރަސްމިއްޔާތުގައި ވާހަކަދައްކަވަމުން އުރީދޫ މޯލްޑިވްސްގެ ޑައިރެކްޓަރ ބްރޭންޑް އެންޑް ސޭލްސް ހުސައިން ނިޔާޒް ވިދާޅުވީ، މި ފާއިތުވެދިޔަ 15 އަހަރުގެ ތެރޭގައި އުރީދޫއިން ކާމިޔާބީއާ ހަމައަށް ވާސިލުވީ ގިނަ ގޮންޖެހުންތަކެއްގެ ތެރެއިންކަމަށެވެ. އަދި އެ ގޮންޖެހުންތަކާއެކު މިދިޔަ 15 އަހަރުދުވަހުގެ ތެރޭގައި އުރީދޫއިން ދިވެހި ރައްޔިތުންނަށް ފެންވަރު ރަނގަޅު ޚިދުމަތްތަކެއް ފޯރުކޮށްދީފައިވާކަން އޭނާ ފާހަގަކުރެއްވިއެވެ. އަދި ކުރިއަށް އޮތްތަނުގައިވެސް ދުނިޔެއަށް އަންނަ ޓެކްނޮލޮޖީތައް ރާއްޖެއަށް ތައާރަފްކުރުމުގައި އުރީދޫއިން މަސައްކަތް ކުރާނެކަމުގެ ޔަޤީންކަން ނިޔާޒް ދެއްވިއެވެ.
"ދުނިޔެއަށް ޓެކްނޮލޮޖީގެ ގޮތުން ގެންނަ ކޮންމެ ޓެކްނޮލޮޖީއެއްވެސް އިރާދަކުރެއްވިއްޔާ ދިވެހިރާއްޖެއަށް ގެންނަ އެންމެ ފުރަތަމަ ކޮންޕެނީއަކަށް ވާނީ އުރީދޫ" ނިޔާޒް ވިދާޅުވިއެވެ.
އުރީދޫގެ ޕާޓްނަރުންނަށް ޝުކުރުއަދާކުރުމަށް ހޮޓެލް ޖެންގައި ބޭއްވި މި ހަފްލާގައި އެ ކުންފުނީގެ ގިނަ އަދަދެއްގެ ޕާޓްނަރުން ވަނީ ބައިވެރިވެފައެވެ.