ގުރުޢާން ހިތުދަސްކުރި އަލްޙާފިޒާ މާޒިނާ ޢަބްދުލްރަޙީމަށް ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕް މިއަދު ހަވާލުކުރައްވައިފިއެވެ.
އެކަމަށްޓަކައި ރައީސުލްޖުމްހޫރިއްޔާގެ އޮފީހުގައި ބޭއްވެވި ޚާއްސަ ރަސްމިއްޔާތެއްގައި އަލްޙާފިޒާ މާޒިނާއަށް ސްކޮލަރޝިޕްގެ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. މި ރަސްމިއްޔާތުގައި ރައީސުލްޖުމްހޫރިއްޔާ ވަނީ އަލްޙާފިޒާ މާޒިނާ އާއި އޭނާގެ ޢާއިލާއާއި ބައްދަލުކުރައްވާފައެވެ. އަދި ތަޢުލީމީ ރޮނގުން އޭނާ ހޯއްދަވާފައިވާ ކާމިޔާބީތަކަށް މަރުޙަބާ ވިދާޅުވެ، ތަޢުލީމީ ރޮނގުން އިތުރަށް ކުރިއަށްދިއުމަށް ރައީސުލްޖުމްހޫރިއްޔާ ވަނީ ހިތްވަރުދެއްވާފައެވެ.
ނ. ލަންދޫއަށް އުފަން އަލްޙާފިޒާ މާޒިނާ ޢަބްދުލްރަޙީމް ތަޢުލީމީ ޙަޔާތް ފައްޓަވާފައި ވަނީ އަލް މަދްރަސަތުލް ޢަރަބިއްޔަތުލް އިސްލާމިއްޔާގެ ގްރޭޑް އެކަކުން 2007 ވަނަ އަހަރެވެ. މާޒިނާ ޝަހާދާ ސާނަވީއާއި ހަމައަށް ކިޔަވައި ނިންމަވާފައިވަނީވެސް ޢަރަބިއްޔާއިންނެވެ. މާޒިނާ ވަނީ ޝަހާދާ ސާނަވީ އިމްތިހާނުގައި ބައިވެރިވި 15 މާއްދާގެ ތެރެއިން 13 މާއްދާއިން އޭ ސްޓަރ އާއި، 2 މާއްދާއިން އޭ ހޯއްދަވައި "އިމްތިޔާޒު" ހާސިލުކުރައްވާފައެވެ.
އަލްޙާފިޒާ މާޒީނާ ޢަބުދުއްރަހީމް ވިދާޅުވީ ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕް ލިބިގެންދިއުމަކީ ދީނީ ރޮނގުން ކުރިއަށްދިއުމަށް އޭނާ ދެކެމުންދިޔަ ހުވަފެން ހަޤީޤަތަކަށް ހެދުމަށް ހުޅުވިގެންދިޔަ އިތުރު ދޮރެއްކަމަށެވެ. އަދި އޭނާ މަތީ ތަޢުލީ ޙާސިލުކުރުމަށް ގަސްތުކުރަނީ "އުޞޫލުއްދީން"ގެ ރޮނގުން، މިސްރުގެ އަލް އަޒްހަރު ޔުނިވަރސިޓީންކަމަށްވެސް މާޒިނާ ވިދާޅުވިއެވެ.
"ފުރަތަމަ އެހާ އުއްމީދެއް ނުކުރަން. އަޅުގަނޑާއެކީ ވަރަށް ވާދަވެރިކުދިިންތަކެއް މަސައްކަތްކުރަމުންދިޔައީ. ވަރަށް މަސައްކަތްކުރިން. އުޞޫލުއްދީން ކިޔަވަން ބޭނުންވަނީ އަލް އަޒްހަރު ޔުނިވަރސިޓީން. ދެ އަހަރެއްވަރުތެރޭ ތަޙައްސުސްވެވޭނެ ތަޞްވީރުން. ޤުރުއާން ހިތުދަސްކޮށްފައިވާތީ ބޮޑަށް ބޭނުންވަނީވެސް އެ ދާއިރާއިން ކުރިއަށްދާން" އަލްޙާފިޒާ މާޒިނާ ޢަބްދުލްރަޙީމް ވިދާޅުވިއެވެެ.
އަލްޙާފިޒާ މާޒިނާ ޢަބްދުލްރަޙީމް ޤުރުއާން ހިތުދަސްކުރުމުގެ ރައީސުލްޖުމްހޫރިއްޔާގެ މެޑަލް ހާޞިލުކުރައްވާފައިވަނީ މިދިޔަ އަހަރުއެވެ. މާޒިނާއަކީ، 2018 ވަނަ އަހަރު ޢަރަބިއްޔާ ސްކޫލުން ތަޢުލީމީ ގޮތުން 1 ވަނަ ދަރިވަރެވެ. ޚާއްޞަކޮށް ކީރިތި ޤުރުއާން ކިޔެވުމުގެ ގިނަ މުބާރާތްތަކުގައި ބައިވެރިވެ ކާމިޔާބު ހޯދާފައިވާއިރު، މާޒިނާ ވަނީ އިތުރު ޙަރަކާތްތަކުގައިވެސް ބައިވެރިވެ، ފާހަގަކޮށްލެވޭ ކާމިޔާބީތަކެއް ހޯދާފައެވެ.
އަލްޙާފިޒާ މާޒިނާއަށް ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕް ހަވާލުކުރުމަށް ބޭއްވި ރަސްމިއްޔާތުގައި މިނިސްޓަރ އޮފް ހަޔަރ އެޑިޔުކޭޝަން ޑޮކްޓަރ އިބްރާހީމް ޙަސަނާއި، ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލްއުސްތާޛު ޢަލީ ޒާހިރުވެސް ބައިވެރިވެވަޑައިގެންނެވިއެވެ.