ޓޫރިޒަމް މިނިސްޓްރީން 19 ރަށަކަށް ބީޗް ސްކައުޓުން ހޯދުމަށް ކުރި އިޢުލާންގެ މުއްދަތު އިތުރުކޮށްފިއެވެ.
ޓުއަރިޒަމް މިނިސްޓްރީން ކުރިއަށްގެންދާ ވޯޓަރ ސޭފްޓީ ޕްރޮގްރާމްގެ ދަށުން 19 ރަށެއްގައި ބީޗް ސްކައުޓުން ބޭތިއްބުމަށް ނިންމައި އެކަމަށް ޝައުޤުވެރިވާ މީހުން ހޯދުމަށް މިމަހުގެ ތެރޭގައި ވަނީ ޢިއުލާންކޮށްފައެވެ. މިކަމަށް ޝައުގުވެރިވާ މީހުން މިމަހުގެ 16 ގެ ކުރިން އެކަމަށް އެދެން އޮތްނަމަވެސް މިހާރު ވަނީ މި މުއްދަތު މިމަހުގެ 23 ވަނަ ދުވަހަށް އިތުރުކޮށްފައެވެ.
ޓުއަރިޒަމް މިނިސްޓްރީން ފަށާފައިވާ ވޯޓަރ ސޭފްޓީ ޕްރޮގްރާމަކީ ފަތުރުވެރިންނަށާއި ރާއްޖޭގެ ރައްޔިތުންނަށް ރައްކާތެރި، އަމާން އަދި މަޤުބޫލް މަންޒިލެއްކަން ކަށަވަރުކުރުމަށްޓަކައި، ޓުއަރިޒަމް މިނިސްޓްރީއާއި މޯލްޑިވްސް ޕޮލިސް ސަރވިސް އަދި އެމް.އެން.ޑީ.އެފް ގުޅިގެން ހިންގާ ޕްރޮގްރާމެކެވެ.
ވޯޓަރ ސޭފްޓީ ޕްރޮގްރާމްގެ ދަށުން މީހުން ދިރިއުޅޭ ހުރިހާ ރަށެއްގެ މޫދަށްއެރޭ ސަރަޙައްދުގެ ސަލާމަތާއި ރައްކާތެރިކަމާއި ގުޅޭ ސޭފްޓީ ބޯޑު ބަހައްޓާ، ބީޗް ސްކައުޓުން އެސަރަޙައްދުތަކުގައި ބޭތިއްބުމަށް ވަނީ ނިންމާފައެވެ.
ބީޗް ސްކައުޓުން ބައިތިއްބަނީ މީހުން ދިރިއުޅޭ ރަށްރަށުގެ ތެރެއިން 2019 ވަނަ އަހަރުގެ ނިޔަލަށް މަދުވެގެން 100 ޓޫރިސްޓް އެނދު ޤާއިމުކުރެވިފައިވާ 19 ރަށެއްގައެވެ.
ބީޗް ސްކައުޓެއްގެ މައިގަނޑު ޒިންމާތަކުގެ ތެރޭގައި،
- ފަތުރުވެރިންނަށް ސޭފްޓީ ބްރީފިންގ ދިނުން
- އެދުވަހެއްގެ މޫސުމާއި ރަށުގެ ވެއްޓާބެހޭ މަޢުލޫމާތު ދިނުން
- މޫދަށް އެރިއުޅުމުގައި ސަލާމަތީ ގޮތުން ހިފަހައްޓަންޖެހޭ މިންގަނޑު ހިފަހައްޓާތޯ ބެލުން
- މީހުން މޫދަށް އެރި އުޅެނީ މޫދަށް އެރެން ކަނޑައެޅިފައި އޮންނަ ސަރަޙައްދުގެ ތެރޭގައިތޯ ބެލުން
- ހާދިސާއެއް ދިމާވެއްޖެ ހާލަތެއްގައި ފުރަތަމަ އެހީ ފޯރުކޮށްދިނުމުގެ ޤާބިލުކަން ހުރުން
- ފަތުރުވެރިންނާއި ޢާންމު ރައްޔިތުންގެ ރައްކާތެރިކަން ކަށަވަރުކޮށް ލައިފް ސޭވިންގ އިކުއިޕްމެންޓް
އަދި އިމަރޖެންސީ ހާލަތެއްގައި ބޭނުންކުރަން ހުންނަ ތަކެތި ބޭނުންކުރުމާއި ބެލެހެއްޓުން ހިމެނެއެވެ.