މުދާ އުފުލާ ދޯންޏެއް ފަރަށް އެރި ޙާދިސާގައި ގެއްލިގެން ހޯދަމުންދާ ދިވެހި ކެޕްޓަން އަދިވެސް ނުފެންނަކަމަށް އެމް.އެން.ޑީ.އެފުން ވިދާޅުވެއްޖެއެވެ.
މި ޙާދިސާގައި ގެއްލިގެން ހޯދަމުންދަނީ ކުޅުދުއްފުށީ ހަވީރީނާޒް، އުމުރުން 37 އަހަރުގެ މުޙައްމަދު ޔޫސުފެވެ.
ގެއްލިގެން ހޯދަމުންދާ ކެޕްޓަންގެ ފޯނާއި ދަބަސް ދޯނީގައި އޮތްކަމަށް އެމް.އެން.ޑީ.އެފުން ވިދާޅުވެއެވެ. އަދި އޭނާ ހޯދުމުގެ މަސައްކަތުގައި ކޯސްގާޑުގެ ޑައިވަރުންނާއި އެމް.އެން.ޑީ.އެފްގެ ފާސްޓް އިންޓަރސެޕްޓަރ ކްރާފްޓް "ވެލާނާ" މިހާރު ހަރަކާތްތެރިވަމުންދާއިރު އޭނާ ގެއްލުނުކަމަށްބުނާ ސަރަޙައްދުން މާސްކަކާއި، ބޮކްސާއެއް ފެނިފައިވާކަމަށްވެސް އެމް.އެން.ޑީ.އެފުން ވިދާޅުވެއެވެ.
އެމް.އެން.ޑީ.އެފުން ވިދާޅުވީ، "ޓީ.ޓީ.އެސް ފާން" ނަމަކަށް ކިޔާ ދޯންޏެއް ކ. ކަގި ކައިރިއަށް ފަރަށް އެރިކަމުގެ ރިޕޯޓް މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ މިއަދު ހެނދުނު 08:09 ހާއިރުކަމަށެވެ. މި ޙާދިސާ ހިނގިއިރު ދޯނީގައި ތިބީ 2 ބިދޭސީންގެ އިތުރުން ދޯނީގެ ކެޕްޓަން މުޙައްމަދު ޔޫސުފެވެ.