ދައުލަތުގެ އޮފީސްތަކުން ޚަރަދު ކުރަންވާނީ، އެ އޮފީހަކަށް ބަޖެޓުން ފާސްކޮށްފައިވާ މިންވަރަށްވުރެ އިތުރު ނުވާނެ ގޮތެއްގެ މަތިންންކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީން ނެރެފައިވާ މާލިއްޔަތާއިބެހޭ ސަރކިއުލަރގައި ބުނެފައިވަނީ "ރައްޔިތުންގެ މަޖިލީހުން ފާސްކުރާ ދައުލަތުގެ ބަޖެޓު ބައިކުރުމާއި އެއްބައިން އަނެއް ބަޔަށް ބަދަލުކުރުމުގެ އުސޫލު" އާއި އެއްގޮތަށް މި އަހަރުން ފެށިގެން ދައުލަތުގެ އެންމެހާ އޮފީސްތަކުން އަމަލުކުރަން ވާނެކަމަށެވެ.
މި އުސޫލުގެ 5 ވަނަ މާއްދާ ގައި ބަޔާންކޮށްފައިވަނީ ދައުލަތުގެ އޮފީސްތަކުން އާންމު ބަޖެޓުން ޚަރަދު ކުރަންވާނީ، އެ ބަޖެޓުގައި ދައުލަތުގެ އޮފީހަކަށް ރައްޔިތުންގެ މަޖިލީހުން ފާސްކޮށްފައިވާ މިންވަރަށްވުރެ އިތުރު ނުވާނެ ގޮތެއްގެ މަތިންކަމަށެވެ. އަދި ދައުލަތުގެ އޮފީހަކުން އާންމު ބަޖެޓަށްވުރެ އިތުރަށް ކޮންޓިންޖެންސީގެ ގޮތުގައި ޚަރަދު ކުރަންވާނީ، މިނިސްޓަރ އޮފް ފިނޭންސްގެ ހުއްދައާއެކު، އާންމު ބަޖެޓުގައި ދައުލަތުގެ އޮފީހަކަށް ކަނޑައަޅާފައިވާ ފައިސާގެ 5 އިންސައްތަ އަށްވުރެ އިތުރު ނުވާނެ ގޮތެއްގެ މަތިންކަމަށެވެ.
ފިނޭންސް މިނިސްޓްރީން ނެރެފައިވާ މި ސަރކިއުލަރގެ މަޤުސަދަކީ، މި އަހަރަށް ފާސްކުރި ދައުލަތުގެ ބަޖެޓުގެ ސިޔާސަތުތަކުގެ ދަށުން ބަޖެޓު ތަންފީޒުކުރުމުގައި ދައުލަތުގެ އޮފީސްތަކުން އަމަލު ކުރަންވީގޮތް ދައުލަތުގެ އިދާރާތަކަށް އޮޅުން ފިލުވައިދީ، ދައުލަތުގެ އޮފީސްތަކަށް ފާސްކޮށްފައިވާ ބަޖެޓާއި އެއްގޮތަށް ބަޖެޓު ތަންފީޒު ކުރުމަށް ބާރު އެޅުމެވެ. މި ސަރކިއުލަރއަށް ކައުންސިލްތައް ފިޔަވައި ދައުލަތުގެ އެންމެހާ އޮފީސްތަކުން ޢަމަލުކުރަންވާނެކަމަށް ފިނޭންސް މިނިސްޓްރީން ވިދާޅުވެއެވެ.