އެކި ބޭނުންތަކުގައި މާލޭއަށް އަންނަ ލޯންޗާއި އޮނޑިދޯނިފަހަރަށް ފަސޭހައިން ފެން ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާ ކަމަށް މާލޭ ސިޓީގެ މޭޔަރ ސިފާ މުޙައްމަދު ވިދާޅުވެއްޖެއެވެ.
މާލޭ ސިޓީގެ މޭޔަރ ސިފާ ވިދާޅުވީ، އެކި ބޭނުންތަކުގައި މާލެއަށް އަންނަ އޮނޑިދޯނިފަހަރަށް ބޭނުންވާ ފެން ހޯދުމުގައި އުނދަގޫތަކެއް ކުރިމަތިވާތީ، އެކަމުގެ ކަންބޮޑުވުން އޮނޑިދޯނިފަހަރުގެ ވެރިން ސިޓީ ކައުންސިލާއި ހިއްސާކޮށްފައިވާކަމަށެވެ. އަދި އެކަމަށް ހައްލެއް ގެނައުމުގެ ގޮތުން އެމް.ޑަބްލިޔު.އެސް.ސީއާއި ގުޅިގެން ފަޅުތަކަށް ބަނދަރުކުރާ އުޅަނދުފަހަރަށް ފަސޭހައިން ފެން ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށް މޭޔަރ ވިދާޅުވިއެވެ.
އެގޮތުން ފަސޭހައިން ފެން ލިބޭނެ ސަރަޙައްދުތަކެއް ކަނޑައެޅި، އެކަމުގެ އިންތިޒާމްތައް ހަމަޖެއްސުމުގެ މަސައްކަތް މިހާރު ކުރަމުންދާކަމަށް ސިފާ ވިދާޅުވިއެވެ.
"މިހާރު އަޅުގަނޑުމެން ވާނީ ފާހަގަކޮށްފައި މާލެ ވަށައިގެން އޮނޑިދޯނިފަހަރަށް ފަސޭހައިން ފެން ލިބެން ހުންނާނެ ސަރަޙައްދުތަކަކީ ކޮބައިކަން. އެހެންވީމަ އެ އިންތިޒާމްތައް އަޅުގަނޑުމެން ވަރަށް އަވަހަށް އެމްޑަބްލިޔުއެސްސީއާއި ގުޅިގެން ފަށާނަން" މޭޔަރ ސިފާ ވިދާޅުވިއެވެ.
މޭޔަރ ސިފާ ވިދާޅުވީ، މާލެއަށް ބަނދަރުކުރާ އުޅަނދުފަހަރަށް ބޭނުންވާ ފެން ފޯރުވައިދިނުމުގެ އިތުރުން، އުޅަނދުތަކުގައި އުފެދޭ ކުނި ފަސޭހައިން ނައްތާލެވޭނެ އިންތިޒާމެއް ހަމަޖެއްސުމުގެ މަސައްކަތް ކުރަމުންދާކަމަށެވެ. މީގެ އިތުރުން މާލޭގައި ހުރި އާއްމު ފާޚާނާތަކުގެ ހާލަތު މިހާރަށްވުރެ ރަނގަޅުކޮށް، އެފަދަ ތަންތަން އިތުރުކުރުމުގެ މަސައްކަތް މިހާރުވެސް ކުރަމުންދާކަމަށް މާލޭ ސިޓީގެ މޭޔަރ ވިދާޅުވިއެވެ.