ކާގޯގެ ޕީކް ސީޒަންއާއެކު ކާގޯ ސަރވިސަސްއަށް ބާރުބޮޑުވެފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ބުނެފިއެވެ.
އެމްއޭސީއެލްއިން ބުނީ ކާގޯގެ ޕީކް ސީޒަނަކީ އޮކްޓޫބަރުމަހުން މާޗުމަހުގެ ނިޔަލަށްކަމަށްވާއިރު، އެދުވަސްވަރު އިމްޕޯޓްކުރާ ކާގޯ ވަރަށް ބޮޑަށް އިތުރުވެގެންދާކަމަށެވެ.
މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ވިދާޅުވީ، ކޮންމެ އަހަރެއްގެވެސް ކާގޯ ޕީކް ސީޒަން ތެރޭގައި އިމްޕޯޓް ކާގޯ ވަރަށް ބޮޑަށް އިތުރުވަމުންދާކަމަށެވެ. އޭގެ ސަބަބުން އެ ކުންފުނީގެ ކާގޯ ސަރވިސަސްގެ ކެޕޭސިޓީއަށްވުރެ އިތުރަށްވެސް ކަސްޓަމަރުންނަށް ޚިދުމަތް ދޭންޖެހޭކަމަށް އެމްއޭސީއެލްއިން ބުނެއެވެ. އެގޮތުން މިމަހުގެ 22 ވަނަ ދުވަހުވެސް 329 ޓަނުގެ ކާގޯ އެއަރޕޯޓުން ހޭންޑްލްކޮށްފައިވާ އެއަރޕޯޓް ކޮމްޕެނީން ބުނެއެވެ. އަދި މިއީ ރެކ÷ޯޑް އަދަދެއްކަމަށްވެސް އެކުންފުނިން ބުނެއެވެ.
އެމްއޭސީއެލްއިން ބުނާގޮތުން މިދުވަސްވަރު ކާގޯ އިތުރުވާއިރު، އިމްޕޯޓް ކުރެވޭ ޕެރިޝަބަލްކާގޯ ދުވާލެއްގެ މައްޗަށް 80 އިންސައްތަ އިތުރުވެގެންދާކަމަށެވެ. އަދި ކާގޯ ހޭންޑްލިންގއަށް އެންމެ ބާރުބޮޑު ވެގެންދާ ދުވަސްތަކަކީ ހޮނިހިރު، އާދީއްތަ، އަންގާރަ އަދި ބުދަ ދުވަސްކަމަށްވެސް އެމްއޭސީއެލްއިން ފާހަގަކުރެއެވެ.
އެމްއޭސީއެލްގެ ކާގޯ ސަރވިސަސްއަށް ބާރުބޮޑުވުމުގެ ސަބަބުން ކާގޯ އިމްޕޯޓް ގުދަން ފުރި، އިތުރު މުދާ ގުދަނަށް ބޭލުމާއި ހަވާލުކުރުން ލަސްވެގެންދާކަމަށްވެސް އެމްއޭސީއެލްއިން ބުނެއެވެ. އެހެންކަމުން ކާގޯ ކްލިއަރ ކުރާ ކަސްޓަމަރުން ވީ އެންމެ އަވަހަކަށް ކާގޯ ކްލިއަރ ކޮށްގެން ގެންދިއުމަށް އެ ކުންފުނިން އެދެއެވެ.
އެމްއޭސީއެލްއިން ވިދާޅުވީ ކުންފުނީގެ އުއްމީދަކީ އަންނަ އަހަރު އަލަށް ހުޅުވިގެންދާ ކާގޯ ޓާރމިނަލާއެކު މިހާރު ދިމާވަމުން އަންނަ ދަތިތަކަށް ހައްލު ލިބިގެންދިއުންކަމަށެވެ. އަދި މިހާރުގެ ކާގޯ ފެސިލިޓީއަކީ ފެންވަރުގެ ގޮތުން ޔޫރަޕްގެ ސްޓޭންޑަޑް އާރ.އޭ 3 ގެ ފެންވަރުގައި ޙިދުމަތް ދެމުން އަންނަ ފެސިލިޓީއެއްކަން އެ ކުންފުނިން ފާހަގަކުރެއެވެ.
އެމް.އޭ.ސީ.އެލްގެ ކާގޯ ސަރވިސަސް އިން ކާގޯ ހޭންޑްލިންގ ޚިދުމަތް ދެމުން ގެންދާތާ 45 އަހަރަށްވުރެ ގިނަ ދުވަސް ވެފައިވާއިރު ވޭތުވެދިޔަ އަހަރުތަކުގެ ތެރޭގައި ގުދަނުގެ ޖާގަ އިތުރުކޮށް، ދުވާލެއްގެ މައްޗަށް 150 ޓަނުގެ ކާގޯ ހޭންޑްލް ކުރެވޭ ވަރަށް ގުދަނުގެ ޖާގަ އިތުރުކޮށްފައިވާކަމަށްވެސް އެމްއޭސީއެލްއިން ބުނެއެވެ.