މިއަދު ހިފި އިރުކޭތައާއެކު ރާއްޖޭގެ މީހުން ދިރިއުޅޭ ހުރިހާ ރަށެއްގައި ކޭތަ ނަމާދުކޮށްފިއެވެ.
ރާއްޖޭގެ ރަށްތަކުގައި ކޭތަ ނަމާދުކޮށްފައިވަނީ މިއަދު ހެނދުނު 8:50 ގައެވެ. މާލޭ ސިޓީގައި ކޭތަ ނަމާދުކޮށްފައިވަނީ މަސްޖިދުލްސުލްތާން މުހައްމަދު ތަކުރުފާނުލް އައުޒަމް، އިސްލާމީ މަރުކަޒުގައާއި، ވިލިމާލޭގައި ހުންނަ މަސްޖިދުލް ބިއްރި، އަދި ހުޅުމާލޭގައި ހުންނަ މަސްޖިދުއް ޝައިޚް ގާސިމް ބިން މުޙައްމަދު އާލް ޘާނީގައެވެ. އަތޮޅުތަކުގައި ކޭތަ ނަމާދުކޮށްފައިވަނީ އެރަށެއްގައި ހުރި އެންމެ ބޮޑު މިސްކިތުގައެވެ.
ކޭތަ ނަމާދަކީ އިރުކޭތަ ނުވަތަ ހަނދުކޭތަ ހިފަން ފެށުމުން އެ ވީއްލުމާއި ދެމެދުގައި ކުރެވޭ ނަމާދެކެވެ. ކޭތަ ނަމާދަކީ ސުންނަތްކަން ގަދަވެގެންވާ ނަމާދެކެވެ. އެނަމާދު ކުރުން ސުންނަތްވެގެންވާ ގޮތަކީ ކޭތަހިފަން ފެށުމުން މިސްކިތުގައި ޖަމާއަތުގައެވެ.
މިއަހަރު ހިފާ އެންމެ ފަހު އިރުކޭތަ ރާއްޖެއަށް ފެނިފައިވަނީ މިއަދު ހެނދުނު 07:40 އިން ފެށިގެން 10:00 އަށެވެ. އަދި "ރިންގް އޮފް ފަޔަރ"ގެ ނަން ދީފައިވާ މި އިރުކޭތަ އެންމެ ބޮޑަށް ހިފާފައި ހުއްޓާ ރާއްޖެއަށް ފެނިފައިވަނީ ހެނދުނު 8:30 ން ފެށިގެން 9:30 އާ ދެމެދުއެވެ. ނަމަވެސް ރާއްޖޭގެ ބައެއް ސަރަޙައްދުތަކުގެ އުޑުމަތިބަނަވުމާއެކު، ރާއްޖެއަށް ކޭތަ އެއްކޮށް ހިފާފައި ހުއްޓާ ފެނިފައެއްނުވެއެވެ. ރާއްޖޭގެ ސަރަޙައްދުތަކަށް ފެނިފައިވަނީ އަލިފަނޑުކޮށް ބައިކޭތައެވެ.
އިރުކޭތަ ހިފަނީ ދުނިޔެއާއި އިރާ ދޭތެރެއަށް ހަނދު ވަނުމުންނެވެ. އެންމެ ބޮޑަށް އިރުކޭތަ ހިފުމުން އިރު ފެންނާނީ އަނގޮޓިއެއް ހެން ވަށްކޮށެވެ. ރާއްޖެއަށް އެންމެފަހުން އިރުކޭތަ ހިފާފައިހުއްޓާ ފެނިފައިވަނީ 2017 ވަނަ އަހަރުއެވެ.