މިއަހަރުގެ 3 ވަނަ ކުއާޓަރ ނިމުނުއިރު ޖީއެސްޓީ ދެއްކުމަށް ޖުމްލަ 13689 ފަރާތެއް ރަޖިސްޓްރީކޮށްފައިވާކަމަށް މީރާއިން ހާމަކޮށްފިއެވެ.
މޯލްޑިވްސް އިންލެންޑް ރެވެނިއު އޮޓޯރިޓީ، މީރާއިން ވިދާޅުވީ، ޓޫރިޒަމް ދާއިރާ ނޫން ދާއިރާތަކުގެ ޖީއެސްޓީ ދެއްކުމަށް 3 ވަނަ ކުއަރޓަރ ފެށުނުއިރު ރަޖިސްޓްރީކޮށްފައިވަނީ 11444 ފަރާތެއް ތިބިކަމަށެވެ. އަދި މި ޓެކްސް ދެއްކުމަށް އަހަރުގެ 3 ވަނަ ކުއާޓަރުގައި 361 ފަރާތެއް ވަނީ ރަޖިސްޓްރީކޮށްފައިކަމަށް މީރާއިން ބުނެއެވެ. އަދި ރަޖިސްޓްރީން 68 ފަރާތެއް ވަނީ އުނިކޮށްފައެވެ. އެހެންކަމުން މިއަހަރުގެ 3 ވަނަ ކުއަރޓަރ ނިމުނުއިރު ޓޫރިޒަމް ދާއިރާނޫން ދާއިރާތަކުގެ ޖީއެސްޓީ ދެއްކުމަށް މީރާގައި ޖުމްލަ 11737 ފަރާތެއް ވަނީ ރަޖިސްޓްރީކޮށްފައެވެ.
ޓޫރިޒަމް ދާއިރާގެ ޖީއެސްޓީއަށް 3 ވަނަ ކުއަރޓަރ ފެށުނުއިރު 1891 ފަރާތެއް ވަނީ ރަޖިސްޓްރީކޮށްފައެވެ. އަދި 3 ވަނަ ކުއަރޓަރުގައި މި ޓެކްސްއަށް މުޅިން އަލަށް 71 ފަރާތެއް ވަނީ ރަޖިސްޓްރީކޮށްފައެވެ. އަދި 10 ފަރާތެއް ރަޖިސްޓްރީން އުނިކޮށްފައިވާތީ، 3 ވަނަ ކުއަރޓަރ ނިމުނުއިރު ޓޫރިޒަމް ދާއިރާގެ ޖީއެސްޓީ ދެއްކުމަށް މީރާގައި ރަޖިސްޓްރީކޮށްފައިވާ ފަރާތްތަކުގެ އަދަދު 1952 އަރައެވެ.
ގްރީން ޓެކްސް ދެއްކުމަށް މިދިޔަ ކުއާޓަރުގައި 41 ފަރާތެއް އަލަށް ރަޖިސްޓްރީކޮށްފައިވާއިރު މުޅި ޖުމްލަ 1014 ފަރާތެއް ވަނީ ގްރީން ޓެކްސް ދެއްކުމަށް މީރާގެ ދަފްތަރުގައި ރަޖިސްޓްރީކޮށްފައެވެ.
ޖީއެސްޓީއަކީ މުދަލާއި ޚިދުމަތުގެ އަގުން ނެގޭ ޓެކްސްއެކެވެ. ގްރީން ޓެކުހަކީ ރާއްޖެ އަންނަ ޓޫރިސްޓުންގެ އަތުން ނަގަމުން އަންނަ ޓެކްސްއެކެވެ. ގްރީން ޓެކްސް ނަގަން ފެށީ 2015 ވަނަ އަހަރުން ފެށިގެންނެވެ.