ދަނޑުވެރިކަމަށް ދޫކޮށްފައި ހުރި ރަށްތައް އެކަށީގެންވާ ގޮތެއްގައި ބޭނުންކުރޭތޯ މިނިސްޓްރީން ބަލައިފި

ދަނޑުވެރިކަމަށް ދޫކޮށްފައިވާ ރަށްތަކުގެ ބޭނުން އެކަށީގެންވާ ގޮތެއްގައި ހިފަމުންދޭތޯ ޔަޤީންކުރުމުގެ މަސައްކަތް ކުރަމުންދާކަމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ވިދާޅުވެއްޖެއެވެ.

މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރގެ ޑިރެކްޓަރ އަލީ އާމިރު ވިދާޅުވީ، ދަނޑުވެރިކަމަށް 50 ރަށެއް ދޫކޮށްފައިވާއިރު މިއަހަރުގެ ތެރޭގައި ދަނޑުވެރިކަމަށް ދޫކޮށްފައިވާ ހުރިހާ ރަށެއް މޮނިޓަރކުރުމުގެ މަސައްކަތް ނިމިފައިވާކަމަށެވެ. އަދި މިއީ މިނިސްޓްރީއަށް މިއަހަރު ކުރެވުނު އެންމެ ކާމިޔާބު މަސައްކަތްކަމަށް އޭނާ ވިދާޅުވިއެވެ.

ރަށްތައް މޮނިޓަރކުރުމަށްފަހު އެނަލައިޒްކުރުމުގެ މަސައްކަތް މިހާރު ކުރަމުންދާކަމަށް އޭނާ ވިދާޅުވިއެވެ. އޭގެތެރޭގައި އެރަށްތަކުގެ ބޭނުން ހިފަނީ ކިހާވަރަކަށްތޯއާއި އެންމެ އެކަށީގެންވާ ގޮތެއްގައި އެރަށްރަށުގެ ބޭނުން ހިފުމަށް ކުރެވޭނީ ކޮން މަސައްކަތެއްތޯ ބެލުން ހިމެނޭކަމަށް އާމިރު ވިދާޅުވިއެވެ. އަދި
2020 ވަނަ އަހަރު ފެށޭއިރު، މިއަހަރު ހެދި ދިރާސާއަށްފަހު ރަނގަޅު ނިންމުންތަކެއް ނިންމޭނެކަމަށް އާމިރު ވިދާޅުވިއެވެ.

"ދަނޑުވެރިކަމަށް ދޫކޮށްފައިވާ ހުރިހާ ރަށެއް މޮނިޓަރކޮށް ނިންމާލެވިއްޖެ. މިހާރު އެދަނީ އެނަލައިޒް ކުރުމުގެ މަސައްކަތްތަކެއް ކުރެވެމުން. ކިހާވަރަކަށްތޯ އެރަށްރަށް ބޭނުން ހިފެމުންދަނީ. ކިހާވަރަކަށް އަދިވެސް އެރަށްރަށް އެންމެ ފުރިހަމަ ގޮތުގައި މަސައްކަތް ކުރުމަށްޓަކައި ކޮންކަހަލަ ބަދަލުތަކެއްތޯ ގެންނަން ޖެހެނީ. އަޅުގަނޑުމެން އުންމީދު ކުރަނީ 2020 ވަނަ އަހަރު ފެށިގެން އަންނައިރުގައި މިއަހަރު ހެދި މޮނިޓަރިންގއަށް ބަލާފައި ރަނގަޅު ޑިޒިޝަންތަކެއް ނަގަމުން ގެންދެވޭނެކަމަށް." އާމިރު ވިދާޅުވިއެވެ.

ދަނޑުވެރިކަމާބެހޭ ވުޒާރާއިން ވިދާޅުވީ ދަނޑުވެރިކަމަށް ދޫކޮށްފައިހުރި ރަށްރަށަކީ ދަނޑުވެރިކަމުގެ މަސައްކަތްތައް ކޮށްގެން ދަނޑުވެރިކަމުގެ އުފެއްދުންތަކެއް ބާޒާރުގައި އިތުރުކޮށް، އޭގެ މަންފާ އާންމު ރަށްޔިތުންނަށް ލިބޭނެ ރަށްތަކަކަށް ހެދުމަށް މަސައްކަތް ކުރަމުންދާކަމަށެވެ.

ރާއްޖޭގެ ޖީޑީޕީގައި ދަނޑުވެރިކަން ހިއްސާކުރާ މިންވަރު ވަރަށްބޮޑަށް ދަށްކަމަށް ދަނޑުވެރިކަމާގުޅޭ ވުޒާރާއިން ވިދާޅުވެއެވެ. ނަމަވެސް ދަނޑުވެރިކަމަށް ދޫކޮށްފައިވާ ރަށްރަށުގައި ދަނޑުވެރިކަން އެކަށީގެންވާ ގޮތެއްގައި ކުރާނަމަ ބައެއް ބާވަތްތައް ރާއްޖެ އިމްޕޯޓްނުކޮށްވެސް ފަރުޖެހޭނެކަމަށް އެމިނިސްޓްރީން ވިދާޅުވެއެވެ.