އާ އަހަރާއި ދިމާކޮށް ރާއްޖޭގައި ހިންގާ ބައެއް ބޭންކުތައް ބަންދުކުރާ ދުވަސްތައް އާންމުކޮށްފިއެވެ.
އާ އަހަރާ ދިމާކޮށް ބޭންކް އޮފް މޯލްޑިވްސް 5 ދުވަހަށް ބަންދުވާނެކަމަށް އެ ބެންކުން ވަނީ ހާމަކޮށްފައެވެ. އެގޮތުން މިމަހުގެ 31 ވަނަ ދުވަހު ބެންކު ބަންދުކުރުމަށްފަހު، އަލުން ބެންކް ހުޅުވާނީ އަންނަމަހުގެ 5 ވަނަ ދުވަހުކަމަށް ބެންކުން ބުނެއެވެ.
މި މުއްދަތުގައި ބީއެމްއެލްގެ ހުރިހާ ބްރާންޗެއް ބަންދުވިނަމަވެސް އެ ބޭންކުގެ ޚިދުމަތްތައް އޭޓިއެމް މެދުވެރިކޮށް ހޯދޭނެކަމަށް ބީއެމްއެލްއިން ބުނެއެވެ. އަދި މި މުއްދަތުގައި ބީއެމްއެލްގެ ކޮންޓެކްޓް ސެންޓަރގެ ޚިދުމަތް ލިބެންހުންނާނެކަމަށާއި އަދި ފޭސްބުކާއި ޓްވިޓަރ މެދުވެރިކޮށްވެސް ބީއެމްއެލްއާއި މުއާމަލާތުކުރެވޭނެކަމަށް ބޭންކުން ބުނެއެވެ.
މޯލްޑިވްސް މަނިޓަރީ އޮޓޯރިޓީ އެމްއެމްއޭއިން ބުނީ އެ ބޭންކުން މިއަހަރު ޚިދުމަތްދޭނެ އެންމެ ފަހު ދުވަހަކީ މިމަހުގެ 30 ވަނަ ދުވަސްކަމަށެވެ. އަދި ޖަނަވަރީމަހުގެ 1 ވަނަ ދުވަސް ބަންދުވާނެކަމަށްވެސް އެމްއެމްއޭއިން ބުނެއެވެ.
ކޮންމެ އަހަރެއްގެވެސް އައު އަހަރާއި ދިމާކޮށް ބޭންކުތައް އޮޑިޓްކުރުމަށް، ބެންކުތައް ބަންދުކުރެއެވެ.