ސަރުކާރުގެ ބޯހިޔާވަހިކަމުގެ މަޝްރޫޢުތަކާގުޅޭގޮތުން އިންޑިއާ ސަފީރާއެކު ހައުންސިންގ މިނިސްޓަރ މަޝްވަރާކޮށްފި
ދިވެހިންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށްޓަކާ ކުރަމުންދާ މަސައްކަތްތަކާގުޅޭގޮތުން ހައުސިންގ މިނިސްޓަރާއި، އިންޑިއާ ސަފީރު މަޝްވަރާކުރައްވައިފިއެވެ.
މި މަޝްވަރާތައް ކުރިއަށްގެންގޮސްފައިވަނީ މިނިސްޓަރ އޮފް ހައުސިންގ އެންޑް އަރބަން ޑިވެލޮޕްމަންޓް އާމިނަތު ޢާޠިފާއާއެކު އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ކުރިއަށްގެންދެވި ބައްދަލުކުރެއްވުމުގެ ތެރެއިންނެވެ.
މިބައްދަލުވުމުގައި ސޯޝަލް ހައުސިންގ ޕްރޮޖެކްޓްތަކުގެ ގޮތުގައި މާލޭ ސަރަޙައްދާއި އަތޮޅުތަކުގައި ކުރިއަށްގެންދިއުމަށް ރޭވިފައިވާ ހައުސިންގ މަޝްރޫޢުތަކާގުޅޭގޮތުންވެސް ދެ ބޭފުޅުންވެސް މަޝްވަރާކުރައްވާފައިވެއެވެ.
އަތްފޯރާފަށުގައި ބޯހިޔާވަހިކަން ފޯރުވައިދިނުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މުހިއްމު ރިޔާސީ ވަޢުދުފުޅެކެވެ. އެގޮތުން ބޯހިޔާވަހިކަމުގެ މައްސަލަ ހައްލުކުރުމަށްޓަކާ، ޕީ.އެސް.އައި.ޕީގެ ތެރެއިން 970 މިލިއަނަށްވުރެ ގިނަ ރުފިޔާ އަންނަ އަހަރުގެ ބަޖެޓުގައި ހިމަނާފައިވެއެވެ. މީގެ ތެރޭގައި ސަރުކާރުން އެކި ރަށްރަށުގައި އަލަށް ފަށާ ސޯޝަލް ހައުސިންގ މަޝްރޫޢުތަކުގެ އިކުއިޓީގެ ގޮތުގައި 600 މިލިއަން ރުފިޔާ ހިމަނާފައިވާއިރު، އެކި ރަށްރަށުގައި ތަރައްޤީކުރުމަށް ހަމަޖެހިފައިވާ ހައުސިންގ ޔުނިޓްތަކަށް 359 މިލިއަން ރުފިޔާ ބަޖެޓުކޮށްފައިވެއެވެ.
މި ދައުރުގެ ތެރޭގައި ވިހި ހާސް ހައުސިންގ ޔުނިޓް އިމާރާތްކުރުމަށް ސަރުކާރުގެ ސްޓްރެޓެޖިކް އެކްޝަން ޕްލޭންގައި ހިމަނާފައިވާއިރު، މީގެ ތެރެއިން ދިހަ ހާސް ހައުސިންގ ޔުނިޓް ޢިމާރާތްކުރުމުގެ ޢަމަލީ މަސައްކަތް މިފެށޭ އަހަރަގެ ތެރޭގައި ފެށުމަށް ސަރުކާރުން ދަނީ މަސައްކަތް ކުރަމުންނެވެ.