ޤައުމީ ދިފާޢުގެ މައި މަރުކަޒު، ބަންޑާރަކޮށްޓަށް ވެހިކަލެއްގެ ވަންނަން އުޅުނު މީހަކު ހައްޔަރުކޮށް، އެ މަރުކަޒުގެ ސަލާމަތީ ފިޔަވަޅުތައް ވަރުގަދަކޮށްފިއެވެ.
ފުލުހުން ވަނީ މި މައްސަލައާ ގުޅިގެން ބަންގްލަދޭޝްގެ 32 އަހަރުގެ ފިރިހެނަކު މިދިޔަ މަހުގެ 19 ވަނަ ދުވަހު ހައްޔަރުކޮށްފައިވާކަން ހާމަކޮށްފައެވެ. މި މައްސަލައާ ގުޅިގެން އެމްއެންޑީއެފުން ބުނީ ސިފައިންގެ މައި މަރުކަޒު، ބަންޑާރަކޮށްޓަށް މިދިޔަމަހުގެ 18 ވަނަ ދުވަހުރޭ ނުވައެއް ޖަހަނިކޮށް ވޭނެއްގައި މީހަކު ވަނުމުން އެ ވޭން ހުއްޓުވާފައިވާކަމަށެވެ. އެ ވޭން ހުއްޓުވައި ޗެކު ކުރި އިރު ވޭން ދުއްވަން އިނީ ބިދޭސީއެއްކަމަށް އެމްއެންޑީއެފުން ބުނެއެވެ. އަދި އެ މައްސަލަ މޯލްޑިވްސް ޕޮލިސް ސަރވިސް އާ ގުޅިގެން ދަނީ އިތުރަށް ތަޙުޤީޤް ކުރަމުންކަމަށްވެސް އެމްއެންޑީއެފުން ބުނެއެވެ.
އެމްއެންޑީއެފުން ބުނީ މިފަދަ އެއްވެސް ބާވަތެއްގެ ކަމެއް އެއްވެސް މީހެއްގެ ފަރާތުން ފެނިއްޖެކަމުގައިވާނަމަ، މިކަން ސަލާމަތީ ޚިދުމަތްތަކުގެ ސަމާލުކަމަށް ލަސްނުކޮށް އެންގުމަށް އިލްތިމާސްކުރާކަމަށެވެ.
ޕީއެސްއެމް ނިއުސްއަށް މަޢުލޫމާތު ލިބިފައިވާ ގޮތުން ބިދޭސީ މީހާ ދުއްވަން އިން ވޭން ބަންޑާރަކޯށްޓަށް ވަދެފައިވަނީ އެ މަރުކަޒަށް ވަނތް އެހެން އުޅަނދެއްގެ ފަހަތުންނެވެ.
ސިފައިންގެ މައި މަރުކަޒަކީ ސެކިއުރިޓީގެ ގޮތުން ޚާއްޞަ އިންތިޒާމްތަކެއް ބަލަހައްޓަމުން އަންނަ ތަނަކަށްވާއިރު އެތަނަށް ހުއްދައަކާއި ނުލާ ސިފައިން ފިޔަވާ އިތުރު އެއްވެސް ބަޔަކަށް ނުވަދެވޭނެއެވެ.