ފަންނު އެކްސްޕޯއަށް ފުރަތަމަ 3 ދުވަސް ނިމުނުއިރު 9000 އަށްވުރެ ގިނަ މީހުން ޒިޔާރަތްކޮށްފިއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އިކޮނޮމިކް މިނިސްޓްރީގެ ސީނިއަރ ޕޮލިސީ ޑިރެކްޓަރ އަޙްމަދު ނިޔާޒް ވިދާޅުވީ، ފަންނު އެކްސްޕޯއަށް ބޮޑު ތަރުހީބެއް ލިބެމުން އަންނަކަމަށެވެ. އެގޮތުން މިހާރު މިހާތަނަށް މި އެކްސްޕޯއަށް 3000 އަށްވުރެ ގިނަ ފަރާތުން ޒިޔާރަތްކޮށްފައިވާކަމަށް ނިޔާޒް ވިދާޅުވިއެވެ.
މިއަހަރުގެ އެކްސްޕޯގައި 400 އަށްވުރެ ގިނަ ފަރާތުން ވަނީ ބައިވެރިވެފައެވެ. އަދި އެކި ދާއިރާތަކުން ވާދަކުރުމަށް 3800 އުފެއްދުމެއް މި އެކްސްޕޯއަށް ވަނީ ހުށައަޅާފައެވެ.
މި އެކްސްޕޯ އެހެން އަހަރުތަކުގައިވެސް ވަނީ ބާއްވާފައެވެ. ނަމަވެސް މިފަހަރުގެ އެކްސްޕޯގެ އެންމެ ތަފާތު ކަމެއްގެ ގޮތުގައި ނިޔާޒް ފާހަގަކުރެއްވީ އަތޮޅުތަށް ތަމްސީލްކުރުމަށް ދަރުބާރުގޭގައި ބަހައްޓާފައިވާ ޕެވިލިއަންތަކެވެ. މި ޕެވިލިއަންތަކުން ވަކިވަކި އަތޮޅުތަކުގެ އުފެއްދުންތަކާއި އެ އަތޮޅުތަށް ޚާއްސަވާ ކަންކަން ފެނިގެންދާނޭކަމަށް އޭނާ ވިދާޅުވިއެވެ.
މުޅި ދަރުބާރުގޭގައި ފަންނު އެކްސްޕޯ ކުރިއަށްދާއިރު ތަފާތު އެކި އުފެއްދުންތައް އެކްސްޕޯގެ ތެރެއިން ފެނިގެންދެއެވެ. މި އެކްސްޕޯގެ ތެރެއިން ދިވެހިންގެ އުފެއްދުންތެރިކަމާއި ހުނަރު ވަރަށް ރަނގަޅަށްވެސް ދައްކުވައިދޭ އުފެއްދުންތައް ފެނިގެންދެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެކްސްޕޯގައި ބައިވެރިވި ބައެއް މީހުން ބުނީ އެކްސްޕޯއަށް ލިބެމުން އަންނަ ތަރުހީބު ބޮޑުކަމަށެވެ. އަދި މިފަދަ އެކްސްޕޯތައް ބޭއްވުމުގެ ސަބަބުން އެމީހުންގެ ހުނަރާއި އުފެއްދުންތަކަށް މާކެޓް ހޯދަން ފަސޭހަވެގެންދާކަމަށް އެކްސްޕޯގެ ބައިވެރިން ބުނެއެވެ.
ފަންނު އެކްސްޕޯ ރަސްމީކޮށް ފައްޓަވައިދެއްވީ މިދިޔަ ބުރާސްފަތި ދުވަހުގެރޭ ދަރުބާރުގޭގައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްއެވެ. މި އެކްސްޕޯ އަންނަ ބުރާސްފަތި ދުވަހުގެ ނިޔަލަށް ކުރިއަށްދާނެއެވެ.
އިކޮނޮމިކް މިނިސްޓްރީން އިންތިޒާމްކޮށްގެން ބާއްވާ މި އެކްސްޕޯގެ މައިގަނޑު މަޤްސަދަކީ ދިވެހި އުފެއްދުންތައް މާކެޓަށް ނެރެ، އެފަދަ އުފެއްދުންތަކަށް އެކަށީގެންވާ މާކެޓެއް ހޯދައިދީ، ދިވެހި އުފެއްދުންތައް ކުރިއެރުވުމެވެ.