ދިވެހިން ވަޒީފާގެ ފުރުސަތު ބޭނުންވާ ދާއިރާތަށް ދެނެގަތުމަށް އިކޮނޮމިކް މިނިސްޓްރީން މަސައްކަތްތަކެއް ކުރައްވަމުން ގެންދަވާކަމަށް އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވެއްޖެއެވެ.
ޕީއެސްއެމް ނިއުސްއަށްދެއްވި ޚާއްސަ އިންޓަވިއުއެއްގައި އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވީ، ދިވެހިން ވަޒީފާގެ ފުރުސަތުތައް ބޭނުންވާ ދާއިރާތަށް ދެނެގަތުމަށް ވޯލްޑް ބޭންކާއި، އެޑިޔުކޭޝަން މިނިސްޓްރީއާއެކު ޚާއްސަ މަސައްކަތްތަކެއް ކުރަމުންދާކަމަށެވެ.
މިނިސްޓަރ ފައްޔާޟު ވިދާޅުވީ، ވޯލްޑް ބޭންކުގެ "މީރީ ޕްރޖެކްޓް" ގެ ނަމުގައި ކުރިއަށްގެންދާ މި މަސްރޫޢޫގައި ދިވެހިން ވަޒީފާ ބޭނުންވާ ދާއިރާތަކާއި، އެ ވަޒީފާތަކަށް ގިނައީ ބިދޭސީންތޯ ބަލާނެކަމަށެވެ. އަދި އެ ވަޒީފާތަކުގައި ބިދޭސީން ގިނަނަމަ ދިވެހިން އެ ވަޒީފާތަކަށް ލެވޭނެ ގޮތްތަށްވެސް ބަލާނެކަމަށެވެ.
"ފުރަތަމަ ކަމަކަށް އަޅުގަނޑުމެން މިބަލަނީ ދިވެހިން އަދާކުރާހިތްވާ ކަހަލަ އާމްދަނީއެއް ލިބޭނެ ވަޒީފާތަކަކީ ކޮބައިތޯ. ދެން އަޅުގަނޑުމެން މިބަލަނީ އެ ވަޒީފާތަކަށް ގިނައީ ބިދޭސީންތޯ. އެހެންކަމަށްވަންޏާ އެތަނަށް ދިވެހިން ލެވޭނެ ގޮތްތަކަކީ ކޮބައިތޯ. ކޮންކަމެއްތޯ މަދުވަނީ ދިވެހިންގެ. ނޫނިއްޔާ އެންޕްލޯޔަރު ގަސްތުގައި ދިވެހިން ނުލަނީތޯ." މިނިސްޓަރ ފައްޔާޟު ވިދާޅުވިއެވެ.
މިނިސްޓަރ ވިދާޅުވީ މިގޮތަށް އަމަލުކުރަން ބަލާއިރު ބައެއް ދާއިރާތަކަށް ދިވެހިން ގެނައުމަށް ތަމްރީންތަކެއް ދޭންޖެހޭކަމަށެވެ. ވޯލްޑް ބޭންކްގެ މީރީ ޕްރޖެކްޓްގެ ދަށުން އެކަންކަން ފާހަގަކޮށް، އެކަންކަމަށް ބޭނުންވާ ތަމްރީނުތައްވެސް ދޭނެކަމަށެވެ. މިނިސްޓަރ ވިދާޅުވީ، މި ޕްރޮޖެކްޓްގެ ބޭނުމަކީ ދިވެހިން ދާހިތްވާކަހަލަ ވަޒީފާތަކަށް ދިވެހިންނަށް ތަމްރީނު ދިނުމާއި، ބިދޭސީން ވަޒީފާތަކުގައި އުޅޭ މިންވަރު މަދުކުރުންކަމަށެވެ. ބައެއް ދާއިރާތަކުގެ ވަޒީފާތަކަށް ދިވެހިންގެ ޝައުޤުވެރިކަން ކުޑަކަމަށާ، އެހެންކަމުން އެ ވަޒީފާތަކަށް ބިދޭސީން ބޭނުންވާކަން މިނިސްޓަރ ފާހަގަކުރެއްވިއެވެ.
"ބައެއް ދާއިރާތަކުގައި އެބަޖެހޭ އަޅުގަނޑުމެން އެ މަޤާމުތަކަށް ދިވެހިން ގެނައުމަށްޓަކައި ތަމްރީންތަކެއްދޭން. މި ޕްރޮޖެކްޓްގެ ދަށުން އެކަންކަންވެސް އަޅުގަނޑުމެން އައިޑެންޓިފައިކޮށް އެކަމަށް ބޭނުންވާ ތަމްރީންތަށްވެސް އަޅުގަނޑުމެންދޭނަން. ދީގެން އަޅުގަނޑުމެންގެ ވިސްނުން މިހިރީ ދިވެހިން ބޭނުންވާކަހަލަ ވަޒީފާތަކަށް އަޅުގަނޑުމެން ޓްރެއިނިންގ ދީގެން ބިދޭސީން މަދުކުރުން." މިނިސްޓަރ ފައްޔާޟު ވިދާޅުވިއެވެ.
ވޯލްޑް ބޭންކްގެ އެހީގައި ހަޔަރ އެޑިޔުކޭޝަން މިނިސްޓްރީއާއި ގުޅިގެން އިކޮނޮމިކް މިނިސްޓްރީން ކުރިއަށްގެންދާ މި ޕްރޮޖެކްޓަކީ 20 މިލިއަން ރުފިޔާގެ ޕްރޮޖެކްޓެކެވެ.
ވަޒީފާ ހޯދުމަށް ލުއިފަސޭހަކުރުމަށް އިކޮނޮމިކް މިނިސްޓްރީން މިހާރު ވަނީ "ޖޮބް ޕޯޓަލް"އެއްވެސް ލޯންޗުކޮށްފައެވެ. މި ޖޮބް ޕޯޓަލްއާއެކު ވަޒީފާ އިތުރުވެ މިހާރު ހުރި ވަޒީފާތަކަށް ވުރެ ފެންވަރު ރަނގަޅު ވަޒީފާތައް ދިވެހިންނަށް ލިބުމަކީ ސަރުކާރުގެ އުންމީދެކެވެ. މި ޕޯޓަލް ލޯންޗްކުރުމާއިއެކު ރާއްޖޭގައި މަސައްކަތްކުރާ ބިދޭސީންނަށް ވޯކް ޕާމިޓްވެސް ދެން ލިބޭނީ ޖޮބް ޕޯޓަލްގައި ރަޖިސްޓްރީވުމުންކަމަށް އިކޮނޮމިކް މިނިސްޓްރީން ވިދާޅުވެއެވެ.
ތަފާސްހިސާބުތަކުން ދައްކާގޮތުން ރާއްޖޭގެ އާބާދީގެ 300،000 މީހުންގެ ތެރެއިން ވަޒީފާ އަދާކުރާ މީހުންގެ ޢަދަދަކީ 160،000އެވެ. ވަޒީފާ ނުހޯދާ 90،000 މީހުން ތިބިއިރު ވަޒީފާ ނުލިބިފައި 10،000 އާއި 15،000 ދޭތެރޭގެ ޢަދަދަކަށް މީހުން އެބަ ތިބިކަމަށް ތަފާސް ހިސާބުތަކުން ދައްކައެވެ.