ބޭސިކް އެއަރ ޓްރެފިކް ކޮންޓްރޯލަރުން ތަމްރީންކުރުމުގެ ޕްރޮގްރާމް 13 ފަރާތަކުން ފުރިހަމަކޮށްފި
އެއަރ ޓްރެފިކް ކޮންޓްރޯލަރުން ބިނާކުރުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުން ހިންގި ބޭސިކް އޭ.ޓީ.ސީ ކޯސް 13 ފަރާތަކުން ފުރިހަމަކޮށްފިއެވެ.
މި ޕްރޮގްރާމްގެ ނިމުން ފާހަގަކުރުމަށް ހުޅުލޭ އައިލެންޑް ހޮޓެލްގައި ބޭއްވި ރަސްމިއްޔާތެއްގައި މި ޕްރޮގްރާމް ފުރިހަމަކުރި ބައިވެރިންނަށް އެކަމުގެ ލިޔުން ހަވާލުކޮށްދެއްވާފައިވަނީ އެމް.އޭ.ސީ.އެލްގެ އެކްޓިންގ މެނޭޖިންގ ޑިރެކްޓަރ މޫސާ ޞާލިޙެވެ.
އެމް.އޭ.ސީ.އެލްގެ އޭވިއޭޝަން އިންސްޓިޓިއުޓުން ކުރިއަށްގެންދިޔަ ބޭސިކް އޭ.ޓީ.ސީ ކޯސް ނިންމުމުގެ ރަސްމިއްޔާތުގައި ވާހަކަދައްވަކަމުން އެ ކުންފުނީގެ އެކްޓިންގ މެނޭޖިންގ ޑިރެކްޓަރ މޫސާ ޞާލިޙު ވިދާޅުވީ، އޭވިއޭޝަންގެ ދާއިރާއަކީ ދުނިޔޭގައި މިހާރު އެންމެ ހަލުވިކަމާއެކު ފުޅާވެ ތަރައްޤީވަމުންދާ އެއް ދާއިރާކަމަށާއި، މިއީ ރަނގަޅު މުސްތަޤުބަލެއް އޮތް ދާއިރާއެއްކަމަށެވެ. އަދި ރާއްޖޭގައިވެސް އޮޕަރޭޓްކުރާ އެއަރޕޯޓްތައް އިތުރުވަމުންދިއުމާއެކު، އޭވިއޭޝަންގެ ދާއިރާއިން ޙާއްސަކޮށް ދިވެހިން ތަމްރީންކޮށް، އެ ފަރާތްތަކަށް ފުރުޞަތު ފަހިކޮށްދިނުމަކީ އެމް.އޭ.ސީ.އެލްގެ ބޮޑު އަމާޒެއްކަމަށް މޫސާ ޞާލިޙު ވިދާޅުވިއެވެ.
"އެތައް ބައެއްގެ ބުރަ މަސައްކަތާއެކު މިއަދު އެމް.އޭ.ސީ.އެލްއަކީ އޭވިއޭޝަން ދާއިރާގައި ތަޖުރިބާ ލިބިފައިވާ ކާމިޔާބު ކުންފުންޏެއް. ރާއްޖޭގެ އިޤްތިޞާދަށް އެންމެ ބޮޑަށް ކޮންޓްރިބިއުޓްކުރާ އެއް ކުންފުންޏަކީ އެމް.އޭ.ސީ.އެލް. ރާއްޖޭގެ އެހެން ކުންފުނިތަކާ އަޅާބަލާއިރު އެންމެ މުވައްޒަފުން ގިނަ އަދި އެންމެ ގިނައިން ވަޒީފާގެ ފުރުޞަތުތައް ފަހިކޮށްދޭ ކުންފުންޏަކީ އެމް.އޭ.ސީ.އެލް. އޭވިއޭޝަންގެ ދާއިރާއަކީވެސް މިއަދު ރާއްޖޭގައި ރަނގަޅު މުސްތަޤްބަލެއް އޮތް ދާއިރާއެއް." މޫސާ ޞާލިޙު ވިދާޅުވިއެވެ.
މިކޯހާ ގުޅޭގޮތުން މަޢުލޫމާތުދެއްވަމުން އެމް.އޭ.ސީ.އެލްގެ ޖެނެރަލް މެނޭޖަރ، އެއަރ ޓްރެފިކް ކޮންޓްރޯލް، އިބްރާހީމް ޠާހާ ވިދާޅުވީ، މިއީ އައި.ކާ.އޯ ސްޓޭންޑެޑަށް އެކުންފުނިން ކުރިއަށްގެންދިޔަ ދެވަނަ ކޯސްކަމަށެވެ. އޭވިއޭޝަން ދާއިރާއިން މީގެ ކުރިން މީހުން ތަމްރީންކުރަންޖެހެނީ ރާއްޖޭން ބޭރަށް ފޮނުވައިގެންކަމަށާއި، އެކަމަށް ބޮޑު ޚަރަދެއްވެސް އެކުންފުނިން ކުރަންޖެހޭކަމަށް ޠާހާ ވިދާޅުވިއެވެ. ނަމަވެސް މިއަދު ރާއްޖޭގައިވެސް މިފަދަ ކޯސްތައް ހިންގޭކަމީ އެކުންފުންޏަށް ލިބިގެންދާ ފަޚުރެއްކަމަށާއި، މިކޯހުގައި ފެސިލިޓޭޓަރުންގެ ގޮތުގައި ބައިވެރިވެފައިވަނީވެސް ހުސް އެކުންފުނީގެ ދިވެހި މުވައްޒަފުންކަން އޭނާ ފާހަގަކުރެއްވިއެވެ.
"މި ކޯހުގެ ސަބަބުން އަޅުގަނޑުމެންނަށް ރާއްޖޭގައި އެއަރ ޓްރެފިކް ކޮންޓްރޯލަރުން ބިނާކުރުމުގެ ފުރުޞަތު ލިބިގެންމިދަނީ. ފުދޭވަރަކަށް ބޮޑު ޚަރަދެއް މިދާއިރާއިން މީހުން ބިނާކުރުމަށް ވޭތުވެދިޔަތަނުގައި ކުރަމުންދިޔައިން.. ގާތްގަނޑަކަށް 4 އަހަރުގެ ޑިގްރީ ކޯހަކަށް ކުރާ ޚަރަދު މި ކޯހަށް އަޅުގަނޑުމެން ކުރަމުންދިޔައީ. މިކޮޅުގައި މިކަން ކުރެވެން ފެށީމަ އެ ޚަރަދު އެބަ ސަލާމަތްވޭ. އަޅުގަނޑުމެން ވަރަށް ފަޚުރުވެރިވަން ކޯހުގައި ކިޔަވާދީފައިވަނީވެސް އެމް.އޭ.ސީ.އެލްގެ ދިވެހި މުވައްޒަފުން" އިބްރާހީމް ޠާހާ ވިދާޅުވިއެވެ.
29 ސެޕްޓެމްބަރ 2019އިން ފެށިގެން 8 ހަފްތާގެ މުއްދަތަކަށް ކުރިއަށްގެންދިޔަ ބޭސިކް އޭ.ޓީ.ސީ ކޯހުގައި ޖުމްލަ 13 ފަރާތަކުން ބައިވެރިވެފައިވާއިރު، މީގެ ތެރޭގައި އެމް.އޭ.ސީ.އެލްގެ 8 މުވައްޒަފަކުވެސް ހިމެނެއެވެ. އައި.ކާ.އޯ 051 ސިލަބަހަށް ކުރިއަށްގެންދިޔަ މި ކޯހުގައި ޖުމްލަ 8 މޮޑިއުލެއް ކިޔަވައިދީފައިވާއިރު، އޭވިއޭޝަން ދާއިރާއަށް ވަނުމަށް ބޭނުންވާ އެންމެ އަސާސީ މަޢުލޫމާތުތަކާއި، ވައިގައި ދަތުރުފަތުރު ކުރުމުގައި ގެންގުޅޭ ބައިނަލްއަޤްވާމީ މިންގަނޑުތަކާއި ގުޅޭގޮތުން ބައިވެރިންނަށް މަޢުލޫމާތުދީފައިވެއެވެ. އަދި ޢަމަލީގޮތުން އެކަންކަން ތަޖުރިބާކޮށްލުމުގެ ފުރުޞަތުވެސް އެމް.އޭ.ސީ.އެލްގެ ފަރާތުން ވަނީ ފޯރުކޮށްދީފައެވެ.