ޑިންގީއަކުން ކަނޑަށް ފުންމާލި ޒުވާނަކު މަރުވެފައި އޮއްވާ ފެނިއްޖެއެވެ. ޑިންގީއަކުން ކަނޑަށް ފުންމާލިފަހުން ގެއްލިގެން ހޯދަމުންދަނިކޮށް މަރުވެފައި އޮއްވާ ފެނިފައިވަނީ ގ.މާލޭހިޔާ 1 02-13، އުމުރުން 33 އަހަރުގެ އަޙްމަދު އަނީސްއެވެ.
އެމް.އެން.ޑީ.އެފުން ވިދާޅުވީ، 10 މީހުންނާއެކު މާލެއިން ތިލަފުއްޓަށް ދަތުރުކުރަމުންދިޔަ ޑިންގީއަކުން މީހަކު ފުންމާލިކަމުގެ ރިޕޯޓް 15:16 ހާއިރު ލިބުމާގުޅިގެން އޭނާގެ ހަށިގަނޑު ހޯދުމުގެ މަސައްކަތް ކުރަމުންދަނިކޮށް، ކޯސްގާޑުގެ ޑައިވަރުންނަށް އޭނާގެ ހަށިގަނޑު ކަނޑުއަޑީގައި އޮއްވާ ފެނުނީ 16:10 ހާއިރުކަމަށެވެ.
އަނީސް ޑިންގީއިން ފުންމާލާފައިވަނީ ގުޅީފަޅު ބައްތިޔާދިމާ ބޭރުންކަމަށާއި، އޭނާގެ ހަށިގަނޑު ފެނިފައިވަނީ ކަނޑުގެ 44 މީޓަރު އަޑިންކަމަށްވެސް އެމް.އެން.ޑީ.އެފުން ވިދާޅުވެފައިވެއެވެ. އޭނާގެ ހަށިގަނޑު މާލެގެނެސް މިހާރު ވަނީ އޭ.ޑީ.ކޭ ހޮސްޕިޓަލަށް ގެންގޮސްފައެވެ. އަދި ފުލުހުން އަންނަނީ މި ޙާދިސާ އިތުރަށް ތަޙްޤީޤުކުރަމުންނެވެ.