ކޯޕަރޭޓް މޯލްޑިވްސްގެ "ނެކްސްޓް 100" އަށް ނަންހުށައެޅުމުގެ ފުރުޞަތު ހުޅުވާލައިފިއެވެ.
"ނެކްސްޓް 100" އަކީ ރާއްޖޭގައި ހިންގާ ކުދި ވިޔަފާރިއާއި އަދި މެދުފަންތީގެ ވިޔަފާރިތަކަށް އަމާޒުކޮށްގެން ކޯޕަރޭޓް މޯލްޑިވްސްއިން ތަޢާރަފްކުރި އެވޯޑެކެވެ. މި އެވޯޑްގެ މަޤްޞަދަކީ ރާއްޖޭގައި ހިންގާ ކުދި ވިޔަފާރިތަކާއި މެދުފަންތީގެ ވިޔަފާރިތަކުގެ އަގުވަޒަންކޮށް އެ ވިޔަފާރިތައް ކުރިއެރުވުމަށް އެހީތެރިވުމެވެ. ކޯޕަރޭޓް މޯލްޑިވްސްއިން ބުނީ މި އެވޯޑް އަހަރަކު އެއްފަހަރު ދޭނެކަމަށެވެ.
މި އެވޯޑަށް ކުންފުނިތަކުގެ ނަންހުށައެޅުމުގެ ފުރުޞަތު ޑިސެމްބަރ މަހުގެ 31 ގެ ނިޔަލަށް ވަނީ ހުޅުވާލާފައެވެ. ކުންފުނިތައް ނޮމިނޭޓްކުރުމަށް އެކަމަށްޓަކައި ޚާއްސަކޮށްފައިވާ ވެބްސައިޓުން އޮންލައިންކޮށް ފޯމު ހުށައެޅޭނެއެވެ.
"ނެކްސްޓް 100" އަށްހޮވޭ ކުންފުނިތައް މެދުވެރިކޮށް ރާއްޖޭގައި ކުރިއަރަމުން އަންނަ ވިޔަފާރިތައް އެނގިގެންދާނެކަމަށް ކޯޕަރޭޓް މޯލްޑިވްސްއިން ބުނެއެވެ. ނެކްސްޓް 100 އަށް ކުރިމަތިލާ ކުންފުނިތަކުގެ ހުންނަންޖެހޭ ޝަރުތުތަކުގެ ތެރޭގައި ދިވެހި ވިޔަފާރިއަކަށްވުމާއި، 31 ޑިސެމްބަރ 2018 ގެ ކުރިން ރަޖިސްޓްރީކޮށްފައިވާ ވިޔަފާރިއަކަށްވުން ހިމެނެއެވެ. އަދި އަހަރުގެ އާމްދަނީ އެއް ލައްކަ ރުފިޔާއާއި 15 މިލިއަން ރުފިޔާގައި އުޅޭ ވިޔަފާރިއަކަށްވެސް ވާންޖެހޭނެއެވެ.
އެވޯޑް ދިނުމުގައި އެހެން ކަންކަމަށްވެސް ބަލާނެކަމަށް ކޯޕަރޭޓް މޯލްޑިވްސްއިން ބުނެއެވެ. އެގޮތުން ވިޔަފާރީގެ ހިންގުމުގެ ފުޅާމިނާއި، ވިޔަފާރި ކުރިއަރާފައިވާ މިންވަރާއި، އައު އުފެއްދުންތައް މާކެޓަށް ނެރޭ މިންވަރާއި، ސީއެސްއާރު ހަރަކާތްތައް ހިންގާ މިންވަރަށްވެސް ބަލާނެކަމަށް ކޯޕަރޭޓް މޯލްޑިވްސް އިން ބުނެއެވެ.
ނެކްސްޓް 100 އެވޯޑް ދިނުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. ކޯޕަރޭޓް މޯލްޑިވްސްއިން އަންނަނީ މިހާރުވެސް "ގޯލްޑް 100" ގެ ނަމުގައި ރާއްޖޭގައި އެންމެ ކުރިއަރާފައިވާ 100 ކުންފުނި ހޮވަމުންނެވެ.