6 ވަނަ "އެސްޑީއެފް ކައުންޓަރ ޕާޓް މީޓިން" ކާމިޔާބުކަމާއިއެކު ނިންމާލައިފިއެވެ.
އެސްޑީއެފް ކައުންޓަރ ޕާޓް މީޓިންއަކީ ސާކްގެ ޤައުމުތަކުގެ މެދުގައި ކޮންމެ އަހަރަކު ބާއްވާ ބައްދަލުވުމެކެވެ. މިއަހަރުގެ މި ބައްދަލުވުން ބޭއްވީ ރާއްޖޭގައެވެ.
މި ބައްދަލުވުމަކީ ސާކް ޤައުމުތައް އުމުރާނީ ގޮތުންނާއި އިޤްތިސާދީގޮތުން ކުރިއެރުވުމަށްޓަކައި އެސްޑީއެފްގެ އެހީތެރިކަން ހޯދޭނެ ދާއިރާތަކާ ބެހޭގޮތުން ދެ ފަރާތުން ބައްދަލުވެ، ފުޅާ ދާއިރާއެއްގައި މަޝްވަރާކުރުމަށް ބާއްވާ ބައްދަލުވުމެކެވެ.
އޮކްޓޯބަރު 23 އިން 25 ވަނަ ދުވަހުގެ ނިޔަލަށް ކުރިއަށްގެދިޔަ މި ބައްދަލުވުން ފައްޓަވައިދެއްވީ އިކޮނޮމިކް މިނިސްޓަރ ފައްޔާޟް އިސްމާޢިލްއެވެ. މި ބައްދަލުވުމުގައި އެސްޑީއެފްގެ ސީއީއޯ ސުނިލް މޯތިވަލްގެ އިތުރުން ފިނޭންސް މިނިސްޓްރީގެ ބޭފުޅުންނާއި ސާކް ޤައުމުތަކުގެ އިސް ފަރާތްތަކުން ވަނީ ބައިވެރިވެފައެވެ.
"އެސްޑީއެފް ކައުންޓަރ ޕާޓް މީޓިން" ގެ ބައްދަލުވުމުގައި މިނިސްޓަރ ފައްޔާޟް ވަނީ އެސްޑީއެފްގެ އެހީއާއެކު ރާއްޖެއަށް އިތުރު ޕްރޮޖެކްޓްތަކަށް ފައިނޭންސް ހޯދުމަށް މަސައްކަތްކުރައްވާނެކަމަށް ވިދާޅުވެފައެވެ.
މި ބައްދަލުވުމުގައި ރާއްޖެއިން ވަނީ ކުރިއަށްއޮތް ފަސް އަހަރަށް ރާއްޖޭގެ އެކްޝަން ޕްލޭނާއި ކުރިއަށްގެންދިއުމަށް ހަމަޖެހިފައިވާ ޕްރޮޖެކްޓްތަކުގެ މަޢުލޫމާތު ސާކްގެ މެމްބަރު ޤައުމުތަކުގެ މެދުގައި ހިއްސާކޮށްފައެވެ.
ސާކްގެ ޤައުމުތަކުގެ ތެރޭގައި ރާއްޖެ ފިޔަވާ ދެންހިމެނެނީ އަފްޤާނިސްތާން، ބަނގްލަދޭސް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީލަންކާއެވެ.