އަމިއްލަ ނަފްސަށް ގެއްލުން ދިނުމާއި، މާޔޫސްވުމުގެ ބަލިން ދުރުވުމަށް އާއިލާއާއި މުޖުތަމަޢުގެ އެއްބާރުލުމާއި އެހީތެރިކަން ބޭނުންވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ދުނިޔޭގެ ނަފްސާނީ ސިއްޙަތުގެ ދުވަހާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކުރެއްވި ޓުވީޓެއްގައި ވިދާޅުވީ، އަމިއްލަ ނަފްސަށް ގެއްލުން ދިނުމާއި، ޑިޕްރެޝަން ނުވަތަ މާޔޫސްވުމުގެ ބައްޔަކީވެސް ޞިއްޙީ އެހީތެރިކަން ބޭނުންވާ ކަމެއްކަމަށެވެ. އަދި އެފަދަ ކަންކަން ތަޙައްމަލު ކުރާ ފަރާތްތަކަށް، އެފަރާތްތަކުގެ އާއިލާތާކާއި މުޖުތަމަޢުގެ އެހީތެރިކަމާއި އެއްބާރުލުން ބޭނުންވާކަން އެމަނިކުފާނު ފާހަގަކުރެއްވިއެވެ. އަދި ނަފްސާނީ ބަލި ނުވަތަ ނަފްސާނީ ބައްޔާއި ގުޅުން ހުންނަ ފަދަ ކަންތައްތައް އެކަނިވެރިކޮށް ތަޙައްމަލުކުރަމުންދާ ފަރާތްތަކަށް އެހެން މީހުންގެ ފަރާތުން ލިބޭ ކުޑަނަމަވެސް ހިތްހެޔޮކަމާއި އޯގާތެރިކަމަކީ، އެމީހުންނަށް އެކަންކަމުން އަރައިގަތުމަށް ލިބިގެންދާނެ އެހީތެރިކަމެއްކަމަށްވެސް ރައީސް ޞާލިޙު ވިދާޅުވެފައިވެއެވެ.
ބައިނަލްއަޤްވާމީ ގޮތުން ދުނިޔޭގެ ހުރިހާ ޤައުމެއްގައިވެސް ކޮންމެ އަހަރެއްގެ އޮކްޓޯބަރު 10 ވަނަ ދުވަސް ފާހަގަކުރަމުންދަނީ ދުނިޔޭގެ ނަފްސާނީ ސިއްޙަތު ދުވަހުގެ ގޮތުގައެވެ. މިއަހަރު މިދުވަހުގެ ޝިޢާރުގެ ގޮތުގައި ދިވެހި ރާއްޖޭގައި ބޭނުން ކުރަނީ " ނަފްސާނީ ދުޅަހެޔޮކަން" މި ޝިޔާރެވެ.
ބައިނަލް އަގްވާމީ ފެންވަރުގައި މި ދުވަސް ފާހަގަކުރުމުގެ މަޤްޞަދަކީ ނަފްސާނީ ބައްޔާމެދު ހޭލުންތެރިކަން އިތުރުކޮށް، މިކަމަށް ދުނިޔޭގެ ފެންވަރުގައި ސަމާލުކަން ގެނެސް މުޅި މުޖުތަމަޢާއި ދޭދޭ ޤައުމުތަކާއި ސަރުކާރާއި އަމިއްލަ ފަރާތްތަކާއި މަދަނީ ޖަމްޢިއްޔާ ޖަމާޢަތްތަކުން ނަފްސާނީ ދުޅަހެޔޮކަން އިތުރުކުރުމަށް އެއްބާރުލުމާއި ބައިވެރިވުން އިތުރު ކުރުމަށެވެ.
މިއަހަރަކީ ނަފްސާނީ ސިއްޙަތު ކުރިއަރުވަން ކުރަމުންދާ މަސައްކަތްތަކަށް ވަރަށް ގިނަ ކުރިއެރުންތަކެއް ލިބިގެން ދިޔަ އަހަރެއްކަން ސަރުކާރުން ފާހަގަކުރެއެވެ. އެގޮތުން ނޭޝަނަލް މެންޓަލް ހެލްތު އިންސްޓިޓިއުޓް އުފައްދާ ނަފްސާނީ ބަލިތަކަށްދެވޭ ފަރުވާއަށް އާސަންދަ ލިބޭނޭ އިންތިޒާމު ވަނީ ހަމަޖައްސާފައެވެ. އައި.ޖީ.އެމް.އެޗްގެ މެންޓަލް ހެލްތު ސެންޓަރއިން މެދުނުކެނޑި ނަފްސާނީ އެކި ބަލިތަކަށް އަންނަީ ފަރުވާދެމުންނެވެ. އަދި މި ސެންޓަރ މެދުވެރިކޮށް މިހާތަނަށް 4 ހާހެއްހާ މީހުންނަށް ޚިދުމަތް ދީފައެވެ.
މެންޓަލް ހެލްތު ސެންޓަރުން ފޯރުކޮށްދޭ ހިދުމަތްތަކު ތެރޭގައި އޯޕީޑީގައި ބަލިމީހުން ބެލުމާއި، އެނދުމަތިކޮށްގެން ދެވޭ ފަރުވާ ދިނުން ހިމެނެއެވެ. އަދި އަވަސް ފަރުވާއަށް ބޭނުންވާ ބަލި މީހުންނަށް ފަރުވާދިނުމުގެ އިތުރުން ނަފްސާނީ ބަލިތައް ވަޒަންކުރުމާއި ބަލި ދެނެގަތުމާއި ބޭހުގެ އެހީގައި ފަރުވާދިނުމާއި ސައިކޮލޮޖިކަލް ޚިދުމަތްތަކާއެކު ފަރުވާ ދިނުމާއި ރީހެބިލިޓޭޝަން އަދި އޮކިއުޕޭޝަނަލް ތެރަޕީ ދިނުން ފަދަ ތަފާތު ޚިދުމަތްތައް ހިމެނެއެވެ.