ކުށުގެ ޙާދިސާތައް މަދުކޮށް އަމާން ވެއްޓެއް ޤާއިމްކުރުމުގެ ގޮތުން ކުރިއަށް އޮތް ރަމަޟާން މަހު ފުލުހުންގެ ޚިދުމަތް މިހާރު ޤާއިމްވެފައި ނެތް ރަށްރަށުގައި ފުލުހުން ހަރަކާތްތެރިވާން ފަށާނެ ކަމަށް ފުލުހުން ހާމަކޮށްފިއެވެ.ޑިވިޝަނަލް އޮޕަރޭޝަންސް ކޮމާންޑްގެ ފަރާތުން ނޫސްވެރިންނަށް މައުލޫމާތު ދެއްވަމުން ޗީފް ސުޕްރިންޓެންޑް އޮފް ޕޮލިސް މުޙައްމަދު ރިޔާޒް ވިދާޅުވީ، ފުލުހުންގެ ޚިދުމަތް މިހާރު ޤާއިމްވެފައި ހުރި 76 ޕޮލިސްޓޭޝަންގެ އިތުރަށް އެހެނިހެން ހިސާބުތަކުގައި ރޯދަމަހާ އަދި ޢީދު ނިމެންދެން ފުލުހުން ހަރަކާތްތެރިވާނެ ކަމަށެވެ.ރިޔާޒް ވިދާޅުވީ، ކުށްމަދުކުރުމުގެ ގޮތުން ޙޭލުންތެރިކުރުވުމުގެ ތަފާތު ޕްރޮގްރާމްތަކެއްވެސް، އެރަށްރަށުގެ ރައްޔިތުންނަށް ޚާއްސަކޮށްގެން ހިންގުމަށް ރާވާފައިވާ ކަމަށެވެ.މީގެއިތުރުންވެސް ފާއިތުވި ސްކޫލް ބަންދާ ދިމާކޮށް، ކުށުގެ މާހައުލުން ދުރުކޮށް ޒުވާނުންނަކީ މުޖުތަމަށް ފައިދާހުރި ބަޔަކަށް ހަދާ، ޙޭލުންތެރިކަން އިތުރުކުރުމަށް ރާއްޖޭގެ ވިހި އަތޮޅެއްގައި ހަތްދިހަ ހަތް ޕްރޮގްރާމް ހިންގާފައިވާ ކަމަށެވެ.މި ޕްރޮގްރާމްތަކުގައި ތެރޭގައި ރެޑީ ކޭމްޕާއި، ޓީމް ބިލްޑިންގއާއި، ސައިބަރ ކްރައިމް އާއި، ސްކޫލްކުދިން ޤާނޫނުތަކަށް އަޙުލުވެރިކުރުވުމާއި އަދި ޓްރެފިކާއި ގުޅޭ ތަފާތު އެކި މައުލޫމާތު ޙިއްސާކޮށްފައިވާ ކަމަށް ފުލުހުން މައުލޫމާތު ދެއެވެ.ޒުވާނުންނާއި ފުރާވަރުގެ ކުދިންނާއި ސްކޫލް ކުދިންނަށް އަމާޒުކޮށް ހިންގުނު އެކި ޕްރޮގްރާމްތަކުގައި 4639 ކުއްޖަކު ބައިވެރިވެފައިވާ ކަމަށްވެސް ފުލުހުން މައުލޫމާތު ދެއެވެ.