ޓްރިވެންޑްރަމްގައި މޯލްޑިވިއަންގެ އޮފީހެއް ހުޅުވައިފިއެވެ. މި އޮފީސް ހުޅުވައިދެއްވީ ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އައިޝަތު މުޙައްމަދު ދީދީއާއި، މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު ޖެނިފާއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އައިލެންޑް އޭވިއޭޝަންގެ ޕަބްލިކް ރިލޭޝަންސް މެނޭޖާ މޫސާ ވަސީމް ވިދާޅުވީ، 2008 ވަނަ އަހަރުން ފެށިގެން މޯލްޑިވިއަން އިން ޓްރިވެންޑްރަމަށް ދަތުރުތައް ކުރަމުންއަންނަކަމަށެވެ. މިދިޔަ 11 އަހަރު ޓްރިވެންޑްރަމުން ހިދުމަތްތައް ދެމުން އައީ އޭޖެންޓުން މެދުވެރިކޮށްކަމަށާއި، އަލަށް މި ހުޅުވި އޮފީހުގެ ސަބަބުން ޙިދުމަތް ލިބިގަތުމަށް ކަސްޓަމަރުންނަށް އިތުރު ފަސޭހަތަކެއް ލިބިގެންދާނެކަމަށެވެ.
މި އޮފީސް ހުންނާނީ ޓްރިވެންޑްރަމްގެ ޕޫތީ ރޯޑްގައެވެ. މި އޮފީސް މެދުވެރިކޮށް ޓިކެޓް ނެގުމާއި ފްލައިޓްތަކާ ގުޅޭ މައުލޫމާތު ސާފުކުރެވޭނެ އެވެ. މޯލްޑިވިއަން އިން އަންނަނީ ޓްރިވެންޑްރަމަށް ކޮންމެ ދުވަހަކު ދަތުރު ކުރަމުންނެވެ.
މޯލްޑިވިއަނުން އަންނަނީ އެ ކުންފުނީގެ ޙިދުމަތް ފުޅާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އަންނަ މަހުގެ ތެރޭގައި އިންޑިއާގެ ކޮޗިންއަށް ދަތުރުފެށުމަށްވެސް އެ ކުންފުނިން އަންނަނީ ތައްޔާރުވަމުންނެވެ.