މިއަހަރުގެ މިހާތަނަށް 11 މީހަކު ޝަހްސު އޮޅުވާލައިގެން ރާއްޖެ އެތެރެވާން މަސައްކަތްކުރި - އިމިގްރޭޝަން

މިއަހަރުގެ މިހާތަނަށް 11 މިހަކު ޝަޙްސު އޮޅުވާލައިގެން ރާއްޖެ އެތެރެވާން މަސައްކަތް ކުރިކަމަށް އިމިގްރޭޝަނުން ބުނެފިއެވެ.

މިގޮތަށް ރާއްޖެ އެތެރެވުމަށް މަސައްކަތް ކުރާ މީހުން ބޭނުންކުރަނީ ސިފަ ވައްތަރު މީހުންގެ ފޮޓޯ ޖެހި ޕާސްޕޯޓެވެ. އިމިގްރޭޝަނުންވަނީ މި 11 މީހުން ހުއްޓުވާފައެވެ.

ވޭތުވެދިޔަ ހަފްތާއެއްހާ ދުވަހުގެ ތެރޭގައިވެސް 2 މީހަކު ޝަހްސު އޮޅުވާލައިގެން ރާއްޖެ އެތެރެވުމަށް މަސައްކަތްކޮށްފައެވެ. މި މީހުން އިމިގްރޭޝަނުންވަނީ އަތުލައިގެންފައެވެ.

މިގޮތަށް ޤަވައިދާ ޚިލާފަށް ޤައުމަށް އެތެރެވާ މީހުން ހުއްޓުވުމާއި، މި ކަންކަން ރަނގަޅަށް ބެލެހެއްޓޭނެ ނިޒާމެއް ޤާއިމުކުރުމަށް، ދާދި ފަހުން ކަސްޓަމްސްއާއި، އިމިގްރޭޝަނާއި މިނިސްޓްރީ އޮފް ސައިންސް ކޮމިއުނިކޭޝަން އެންޑް ޓެކްނޮލޮޖީ ގުޅިގެންވަނީ ރާއްޖޭގެ ބޯޑަރ ކޮންޓްރޯލް ސިސްޓަމް ވަރުގަދަކޮށްފައެވެ.

މި ސިސްޓަމްތައް އަޕްގްރޭޑްކޮށް ރާއްޖެ އެތެރެވެ ބޭރުވާ މައި އެއަރޕޯޓްތަކާއި، ކަސްޓަމްސް ޕޯޓުތަކުގައިވެސް ވަނީ ބަހައްޓާފައެވެ.
އެގޮތުން ވެލާނާ އިންޓަރނޭޝަނަލް އެއަރޕޯޓާއި، އެމްޕީއެލް ޕޯޓާއި، އިންޓަރނޭޝަނަލް އެއަރޕޯޓްތަކުގައިވެސްވަނީ ސިސްޓަމްތައް އަޕްގްރޭޑްކޮށްފައެވެ.