މަސްޖިދުލް ސުލްޠާން މުޙައްމަދު ތަކުރުފާނުލް ޢައުޡަމް (އިސްލާމީ މަރުކަޒް)ގެ ވަސީލަތްތައް އާކޮށް، މަރާމާތުކުރުމުގެ މަސައްކަތް ފަށައިފިއެވެ. މި މަސައްކަތް ކުރަނީ ސަޢޫދީއަރަބިއްޔާގެ އަމިއްލަ ޖަމްޢިއްޔާއެއްކަމަށްވާ ޚަލީފާ ބިން ޒައިދު އަލް ނަޙްޔާން ފައުންޑޭޝަންގެ ހިލޭ އެހީގެ ދަށުންނެވެ.
އިސްލާމިކް މިނިސްޓްރީއިން ވިދާޅުވީ މި މަޝްރޫޢުގެދަށުން މިސްކިތުގެ ސައުންޑް ސިސްޓަމާއި، ހުރިހާ ބޮކިތަކާއި ފަންކާތައް މިހާރު ބަދަލުކޮށް ނިމިފައިވާކަމަށެވެ. އަދި މިސްކިތުގެ އެތެރޭގައި އެއްކޮށް ކުލަލުމާއި، ލަކުޑީގެ ބައިތައް ސާފުކޮށް އަލުން ވަރނިޝް ކުރުމަށް ހަމަޖެހިފައިވާކަމަށްވެސް އިސްލާމިކް މިނިސްޓްރީން ވިދާޅުވެއެވެ.
މި މަޝްރޫޢުގެ އެންމެ ބޮޑު މަސައްކަތެއްގެ ގޮތުގައި ކުރުމަށް ހަމަޖެހިފައިވަނީ މިސްކިތުގެ ޓިނު ބަދަލުކުރުމާއި، މިސްކިތުގެ ގުއްބާއި ކާޕެޓުތައް ބަދަލުކުރުމުގެ މަސައްކަތެކެވެ. މީގެއިތުރުން މިސްކިތުގައި ބޮޑު 2 ފަންކާ ހަރުކުރުމާއި، މިސްކިތުގެ 4 ޗާންދަލިއާވެސް ބަދަލުކުރުމަށް ހަމަޖެހިފައިވާކަމަށް އިސްލާމިކް މިނިސްޓްރީއިން ވިދާޅުވެއެވެ. މި މަސައްކަތް ކުރިނަމަވެސް މިސްކިތުގެ އެއްވެސް ޑިޒައިނަކަށް ބަދަލެއް ނުގެންނާނެއެވެ.
އިސްލާމިކް މިނިސްޓަރ މިއަދުވަނީ މަސައްކަތްތައް ވީހާވެސް ފެންވަރު ރަނގަޅުކޮށް، އަވަހަށް ނިންމުމާއި ގުޅޭގޮތުން މަސައްކަތުގެ ކޮންޓްރެކްޓަރާއިވެސް ބައްދަލުކޮށް ވާހަކަދައްކާފައެވެ. މިސްކިތް މަރާމާތުކުރުމުގެ މަސައްކަތް 6 މަސްތެރޭގައި އެއްކޮށް ނިންމާލާނެކަމަށް އިސްލާމިކް މިނިސްޓްރީއިން ވިދާޅުވެއެވެ. މި މަސައްކަތް ކުރަނީ އިސްލާމީ މަރުކަޒަށް ނަމާދަށްދާ ފަރާތްތަކަށް ދަތި ނުވާނެ ގޮތަކަށް ކަމަށްވެސް އިސްލާމިކް މިނިސްޓްރީން ވިދާޅުވެއެވެ.