މަމްސް އެކްސްޕޯގެ ނަމުގައި އަންހެނުންނަށް ޙާއްސަ އެކްސްޕޯއެއް، މަމްސް އެންޖީއޯއިން ބޭއްވުމަށް ނިންމައިފިއެވެ.
މި އެކްސްޕޯ އޮންނާނީ އަންނަ މަހުގެ 4 އިން 5 ބިލަބޮން ހައި އިންޓަނޭޝަނަލް ސްކޫލްގައެވެ.
ޕީއެސްއެމް ނިއުސްއަށް މައުލޫމާތުދެއްވަމުން މަމްސް އެންޖީއޯއިން ބުނީ މިއީ އެ ޖަމުއިއްޔާ ރަޖިސްޓްރީ ކުރިފަހުން މިގޮތަށް ބާއްވާ ފުރަތަމަ ހަރަކާތްކަމަށެވެ.
މަމްސް އެކްސްޕޯ ބޭއްވުމުގެ މައިގަނޑު މަޤްސަދަކީ އެ ޖަމިއްޔާއިން ހިންގާ އެކި ހަރަކާތްތަކަށް ފައިސާ ހޯދުމާއި، ވިޔަފާރިކުރާ އަންހެނުންނަށް އެމީހުންގެ ވިޔަފާރި ކުރިއަރުވައި މާކެޓް ހޯދައިދިނުމަށް އެހީވުމެވެ. މި އެކްސްޕޯގައި ބައިވެރިވެވޭނީ ހަމައެކަނި އަންހެނުންނަށެވެ. ވިޔަފާރިއެއްގެ ގޮތުގައި ރަޖިސްޓްރީކޮށްފައިވާ ފަރާތްތަކާއި ރަޖިސްޓްރީ ނުކުރާ ފަރާތްތަކަށްވެސް މި އެކްސްޕޯގައި ބައިވެރިވެވޭނެކަމަށް އެ ޖަމިއްޔާއިން ބުނެއެވެ. މި އެކްސްޕޯގައި ބައިވެރިވުމުގެ އެންމެ ފަހުގެ ތާރީޙަކީ މިމަހުގެ 15 ވަނަ ދުވަހެވެ.
އެކްސްޕޯގައި 100 ސްޓޯލް ބެހެއްޓުމަށް މަމްސް އެންޖީއޯއިން އަންނަނީ މަސައްކަތް ކުރަމުންނެވެ. އެ ޖަމިއްޔާއިން ބުނީ އެކްސްޕޯއަށް ލިބެމުން އަންނަ ތަރުހީބު ބޮޑުކަމަށާއި، މިހާރުވެސް ގިނަ ސްޓޯލްތަކެއް ވިކިފައިވާކަމަށެވެ. މި އެކްސްޕޯގައި ބައިވެރިވުމަށް ސްޓޯލް ދޫކުރަނީ 1000 ރުފިޔާއަށެވެ.
މަމްސް އެންޖީއޯއަކީ މީގެ 3 އަހަރުކުރިން ހިންގަމުންއައި ޖަމިއްޔާއެކެވެ. މަމްސް އެންޖީއޯ ރަޖިސްޓްރީކޮށްފައިވަނީ މިއަހަރުގެ ޖަނަވަރީ މަހުގެ ތެރޭގައެވެ. މަމްސް އެންޖީއޯގެ ނަމުގައި ފޭސްބުކް ފޭޖެއް ހިންގަމުން އަންނައިރު މިއީ މަންމައިންނަށާއި، ކައިވެނިކޮށްގެން އުޅޭ އަންހެނުންނަށް ދިމާވާ އެކި ކަންކަމަށް އެހީވުމަށް އުފައްދާފައިވާ ޖަމުއިއްޔާއެކެވެ. މި ޖަމުއިއްޔާގެ ފޭސްބުކް ޕޭޖްގެ މެންބަރުންގެ އަދަދު 29 ހާހަށްއަރައެވެ.