މަސްވެރިކަމާއިބެހޭ ބައިނަލްއަޤްވާމީ ބައްދަލުވުންތަކެއްގައި ބައިވެރިވުމަށް މިނިސްޓަރ ޒަހާ ނިއުޒިލެންޑަށް

މަސްވެރިކަމާއިބެހޭ ބައިނަލްއަޤްވާމީ ދެ ބައްދަލުވުމެއްގައި ބައިވެރިވެވަޑައިގަތުމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ނިއުޒީލޭންޑަށް ފުރާވަޑައިގަނެފިއެވެ.

މިނިސްޓަރ ޒަހާ ބައިވެރިވެވަޑައިގަންނަވާ ބައްދަލުވުންތަކުގެ ތެރޭގައި ހިމެނެނީ "ޕެސިފިކް އައިލެންޑް ނޭޝަންސް މެރިން ކޮންސަރވޭޝަން އެންޑް މެރިޓައިމް ސެކިއުރިޓީ ސަމިޓް" އަދި މެރިން ސްޕެޝަލް ޕްލޭނިންގއާ ގުޅޭ މަސައްކަތު ބައްދަލުވުމެވެ. މި ބައްދަލުވުން ކުރިއަށްދާނީ މި ސެޕްޓެމްބަރުމަހުގެ 3 އިން 6 އަށް ނިއުޒީލޭންޑްގައެވެ.

މިއީ ބްލޫ ޕްރޮސްޕެރިޓީ ކޯލިޝަނާއި އެންވަޔަރަންމެންޓަލް ލޯ އިންސްޓިޓިއުޓް، ވައިޓް އިންސްޓިޓިއުޓް، އަދި އައިޔޫސީއެން އޯޝަނިއާއާ ގުޅިގެން ބާއްވާ ބައްދަލުވުމަކާއި ސަމިޓެކެވެ. މިގޮތުން ޖަޒީރާ ޤައުމުތަކުގެ މެދުގައި، މެރިން ސްޕެޝަލް ޕްލޭނިންއާ ގުޅޭގޮތުން މަޝްވަރާކުރެވި، މިމަސައްކަތް ތަރައްޤީކޮށް ހަރުދަނާކުރުމަށް ބޭނުންވާ ޤާނޫނީ ނިޒާމް ފަރުމާކުރުމުގައި ދުނިޔޭގެ ފެންވަރުގައި ބޭނުންކުރާ ރަނގަޅު އާދަތަކަށް ރިޢާޔަތްކޮށްގެން އެމަސައްކަތް ކުރުމާ ގުޅޭގޮތުން ބައިވެރިންނަށް މަޢުލޫމާތު ފޯރުކޮށްދެވޭނެއެވެ.

ފިޝަރީޒް މިނިސްޓްރީން ބުނާގޮތުން މިބައްދަލުވުންތަކުގައި ބައިވެރިވުމުން ރާއްޖޭގެ މެރިން ސްޕެޝަލް ޕްލޭނިންގ ދާއިރާއިން ކުރުމަށް ރޭވިފައިވާ ކަންތައްތަކުގެ ސިޔާސަތުތައް ކަނޑައެޅުމުގައާއި އެ ސިޔާސަތުތައް ތަންފީޒުކުރުމަށް ބޭނުންވާ އެހީތެރިކަން ހޯދުމަށް ފަސޭހަވެގެންދާނެއެވެ.

މިނިސްޓަރގެ ދަތުރުފުޅުގައި މިޖަމްޢިއްޔާތަކުގެ އިސްވެރިންނާއި ބައްދަލުކޮށް ރާއްޖޭގެ ކަނޑުގެ މާހައުލު ބޭނުންކޮށްގެން ކުރެވެން ހުރި މަސައްކަތްތަކާއި، އެމަސައްކަތްތައް ސަރުކާރާއި ގުޅިގެން ކުރުމަށް އެފަރާތްތަކުގެ ޝައުގުވެރިކަން އިތުރުކުރުމަށް މަސައްކަތްތަކެއް ކުރެވޭނެކަމަށް އެ މިނިސްޓްރީން ބުނެއެވެ.