ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އޭޝިއަން ޑިވެލޮޕްމަންޓް ބޭންކް، އޭ.ޑީ.ބީގެ ރައީސް ޓަކަހިކޯ ނަކައޯ އިޙްތިރާމުގެ ޒިޔާރަތެއް ކުރައްވައިފިއެވެ.
މި ބައްދަލުވުމުގައި ރައީސުލްޖުމްހޫރިއްޔާ ވަނީ 1978 ވަނަ އަހަރުން ފެށިގެން އޭ.ޑީ.ބީގެ އެހީތެރިކަން ރާއްޖެއަށް ލިބެމުން އަންނަކަން ފާހަގަކުރައްވައި އެކަމަށްޓަކައި އޭ.ޑީ.ބީގެ ރައީސަށް ޝުކުރު އަދާކުރައްވާފައެވެ. މީގެ އިތުރުން އޭ.ޑީ.ބީއަކީ ރާއްޖޭގެ ތަރައްޤީގެ މުހިންމު ބައިވެރިއެއްކަން ފާހަގަކުރައްވައި އެ ބޭންކުގެ ސަބަބުން ރާއްޖޭގެ އިޖްތިމާޢީ، އިޤްތިޞާދީ ތަރައްޤީއަށް ކުރިއެރުންތައް ލިބެމުން އަންނަކަން ފާހަގަކުރެއްވިއެވެ.
ރައީސުލްޖުމްހޫރިއްޔާއާއި އޭ.ޑީ.ބީގެ ރައީސް ވަނީ އެ ބޭންކާއި، ރާއްޖެއާ ދެމެދު އޮތްގުޅުން އިތުރަށް ބަދަހިކުރުމާއި ގުޅޭގޮތުންނާއި ރާއްޖޭގެ އެންމެ މުހިންމު ދާއިރާތައްކަމަށްވާ ފަތުރުވެރިކަމާއި، މަސްވެރިކަން ފަދަ ދާއިރާތައް ތަރައްޤީކުރުމުގައި ސްމޯލްގްރާންޓް އަދި ލޯނުގެ އެހީތެރިކަން ހޯދުމާބެހޭގޮތުންވެސް މަޝްވަރާކުރައްވާފައެވެ.
މި ބައްދަލުވުމުގައި އޭ.ޑީ.ބީގެ ރައީސް ދެއްކެވި ވާހަކަފުޅުގައި ރާއްޖޭގެ ފަތުރުވެރިކަމުގެ ދާއިރާގެ ނަފާ ވީހާވެސް ގިނަ ރައްޔިތުންނަށް ބެހިގެންދާނެ ގޮތެއްގެ މަތީން ކަންކަން އިންތިޒާމުވެފައި އޮތުމުގެ މުހިންމުކަން ފާހަގަކުރެއްވިއެވެ. މީގެ އިތުރުން ރާއްޖޭގެ ފަތުރުވެރިކަމުގެ ސިނާޢަތުގައި ހިމެނޭ ގެސްޓްހައުން ވިޔަފާރި މިހާރަށްވުރެ ފުޅާކުރުމުގެ މުހިންމުކަންވެސް އޭ.ޑީ.ބީގެ ރައީސް ފާހަގަކުރެއްވިއެވެ.
ދެބޭފުޅުންގެ ވާހަކަފުޅުގައި، ކުރިޔަށްހުރި ތަރައްޤީގެ މަޝްރޫޢުތައް ހިންގުމުގައި ދެމެހެއްޓެނިވި ގޮތެއްގައި ޒިންމާދާރުކަމާއެކު ތިމާވެއްޓާ ރައްޓެހިގޮތަކަށް ކަންކަން ކުރިޔަށްގެންދެވޭނެ ގޮތްތަކާބެހޭ ގޮތުން މަޝްވަރާކުރެއްވިއެވެ. މި ބައްދަލުކުރެއްވުމުގައި އޭ.ޑީ.ބީގެ ރައީސް ވަނީ ރާއްޖޭގެ އިޤްތިޞާދީ ސިޔާސަތު ބައްޓަންކުރެވި ހަރުދަނާ ގޮތެއްގައި ކުރިއަށް ދާކަން ފާހަގަކުރައްވާފައެވެ.