ޕީއެސްއެމްގެ މީޑިއާ އިންސްޓިޓިއުޓު، މޯލްޑިވްސް މީޑިއާ އިންސްޓިޓިއުޓް، އެމް.އެމް.އައިއިން ކުރިއަށްގެންދާ އަންހެނުންގެ ހެދުން ފަހާ ކޯހުގެ ބައިވެރިން އުފައްދާ ތަކެތި ޖެންޑަރ މިނިސްޓްރީގެ ދަށުން ހުޅުމާލޭގައި ހިންގާ ކުޑަކުދިން ބަލަހައްޓާ މަރުކަޒު، "ފިޔަވައްޗަށް" ހަދިޔާކުރަން ނިންމައިފިއެވެ.
މި ފަހާކޯހަކީ އެމް.އެމް.އައިއާއި މެލޭޝިއާގެ ލިމްކޮކްވިންގ ޔުނިވަރސިޓީ ގުޅިގެން ކުރިއަށް ގެންދާ ޚާއްސަ ކޯހެކެވެ. މި ކޯހުގެ ބައިވެރިން އުފައްދާތަކެތި ފިޔަވަތި މަރުކަޒަށް ހަދިޔާކުރުމަށް ނިންމާފައިވާކަން އިޢުލާންކޮށްފައިވަނީ އަންހެންނަށް ޚާއްސަކޮށްގެން ކުރިއަށްގެންދާ މިކޯހުގެ 2ވަނަ ބުރު ފެށުމަށް މިއަދު ބޭއްވި އޮރިއެންޓޭޝަން ސެޝަންގައެވެ.
އެމް.އެމް.އައިގެ ކޯޑިނޭޓަރ އިންޓަރނޭޝަނަލް ރިލޭޝަންސް އެންޑް ޕީއާރު އައިޝަތު ނުޒުހާ ވިދާޅުވީ، މިތަކެތި ފިޔަވައްޗަށް ހަދިޔާކުރުމަށް ނިންމާފައިވަނީ، ސީއެސްއާރުގެ ދަށުން ކުރާ ކަމެއްގެ ގޮތުގައިކަމަށެވެެ.
"މީގެ ފުރަތަމަ ބެޗްގެ ބައިވެރިން އުފައްދާފައިވާ އެކިބާވަތުގެ ހެދުންތަކުގެ ތެރެއިން 200 ވަރަކަށް ހެދުން މިފަހަރު ހަދިޔާކުރެވޭނެ. އޭގެ ތެރެރޭގައި، ވަރަށް ތުއްތު އުމުރުފުރައިގެ ކުދިންގެ ސައިޒްތަކުންގެ ހެދުމުން ފެށިގެން އުމުރުން 11، 12 އަހަރުގެ ކުދިންނަށް ލެވޭވަރުގެ ހެދުންތައް ހިމެނޭ. މިތަކެއްޗަކީ، މިކޯހުގެ ބައިވެރިން ފުރިހަމަކުރަންޖެހޭ އެކިއެކި މޮޑިއުލްތަކުގައި ހަދާފައިވާ ތަކެތި" ނުޒުހާ ވިދާޅުވިއެވެ.
މި ކޯހަކީ، އެމް.އެމް.އައިއާއި ލިމްކޮކްވިންގ ޔުނިވަރސިޓީއާ ގުޅިގެން މިދިޔަ އަހަރުން ފެށިގެން ހިންގަންފެށި ކޯހެކެވެ. ހަތަރު މަސް ދުވަހުގެ މުއްދަތަށް ކުރިއަށް ގެންދާ މިކޯހުގެ ތެރެއިން ކެޝުއަލް ވެއަރ، ޓްރެޑިޝަނަލް ވެއަރ، ނައިޓް ޑްރެސް، ޗިލްޑްރަން ވެއަރ، މެޓަރނިޓީ ވެއަރ އަދި ހޭންޑްމޭޑް އެމްބްރޯއިޑަރީ ހަދާނެ ގޮތް ދަސްކޮށްދޭނެ. މިކޯހުގެ ދެވަނަ ބުރު މިއަދު ފަށާފައިވަނީ 24 ބައިވެރިންނާއެކުއެވެ.