ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަލަހައްޓާ ދެމަރުކަޒުކަމަށްވާ ކުޑަކުދިންގެ ހިޔާއާއި، ފިޔަވަތިގެ މުވައްޒަފުންނަށް އަމާޒުކޮށްގެން ތަމްރީނު ޕްރޮގްރާމްތަކެއް މިއަދު ފަށައިފިއެވެ.
މި ޕްރޮގްރާމްގެ މަޤްޞަދަކީ މުވައްޒަފުންގެ ހުނަރު ތަރައްޤީކޮށް، ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަލަހައްޓަމުންގެންދާ މަރުކަޒުތަކުން ދެވޭ ޚިދުމަތުގެ ފެންވަރު ރަނގަޅުކުރުންކަމަށް މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސްއިން ވިދާޅުވެއެވެ. އެގޮތުން މިތަމްރީން ޕްރޮގްރާމްތަކުގައި ކުޑަކުދިންގެ ހިޔާގެ ފަސްދޮޅަސް ހަތް މުވައްޒަފަކާއި، ފިޔަވަތިގެ ސަތޭކަ ބާރަ މުވައްޒަފުން ހިމެނޭހެން ޖުމްލަ ސަތޭކަ ހަތްދިހަ ނުވަ މުވައްޒަފަކު ބައިވެރިވާކަމަށް އެމިނިސްޓްރީން ވިދާޅުވެއެވެ.
3 ހަފުތާގެ މުއްދަތަށް ކުރިއަށްގެންދާ މި ޕްރޮގްރާމްގައި ޖުމުލަ 8 ދާއިރާއަކުން ސެޝަންތައް ކުރިއަށް ގެންދިޔުމަށް ވަނީ ހަމަޖެހިފައެވެ. އެގޮތުން މުވައްޒަފުންނަށް ބޭނުންވާ ޕޭރެންޓިންގ ސްކިލްސްއާއި، ކެއަރ ވަރކަރުންގެ ޒިންމާތަކާއި މައްސޫލިއްޔަތުތަކާއި، ޗައިލްޑް ސައިކޮލޮޖީ އެންޑް ސޯޝަލް ވަރކް ތިއަރީއާއި، ސައިކޯ ސޯޝަލް އެޕްރޯޗަސްއާއި، އެކުދިންނާއި މުޢާމަލާތުކުރުމަށް ބޭނުންވާ ތަފާތު ހުނަރުތަކާއި އުކުޅުތައް، ޙާއްސަ އެހީއަށް ބޭނުންވާ ކުދިންނަށް ކިޔަވައިދިނުމާއި އެހެންވެސް ކަންކަން ކޮށްދިނުމުގައި ވިސްނަންޖެހޭ ކަންކަމާގުޅޭ ގޮތުން މަޢުލޫމާތު ދެވިގެންދާނެކަށް ޖެންޑަރ މިނިސްޓްރީން ވިދާޅުވެއެވެ.
ދައުލަތުގެ ބެލުމުގެ ދަށުގައި މި ވަގުތު ޖުމުލަ ސަތޭކަ ފަންސާސް ކުދިން ދިރިއުޅެމުންދާއިރު، މީގެތެރެއިން ބާރަ އަހަރުން ދަށުގެ ސަތޭކަ ހަ ކުދިން ދިރިއުޅެމުން ދަނީ ފިޔަވަތިގައެވެ. އަދި ބާރަ އަހަރުން މަތީގެ ސާޅީސް ހަތަރު ކުދިން ދިރިއުޅެމުން ދަނީ ކުޑަކުދިންގެ ހިޔާގައެވެ.