ބޭންކް އޮފް މޯލްޑިވްސްގެ ޗެއަރޕަސަންގެ މަގާމަށް ހެންވޭރު ޔެލޯ ރޯޒް، ފަރީހާ ޝަރީފް ހޮވައިފިއެވެ.މިދިޔަ އަހަރުން ފެށިގެން ހުސްކޮށް އޮންނަ ބީއެމްއެލްގެ ޗެއަރޕަސަންގެ މަޤާމަށް ފަރީހާ ޝަރީފް ހޮވީ، މިއަދު ބޭއްވި ބީއެމްއެލްގެ އާ ޑިރެކްޓަރުންގެ ބޯޑުގެ ފުރަތަމަ ބައްދަލުވުމުގައެވެ. ނިއުޒިލޭންޑްގެ ޔުނިވަރސިޓީ އޮފް ވައިކަޓޯ، ކްރައިސްޓްޗާރޗް އިން މާސްޓަރސް އޮފް މެނޭޖްމަންޓް ސްޓަޑީސް (ފަސްޓް ކްލާސް) ހާސިލުކުރައްވާފައިވާ ފަރީހާއަކީ ތަފާތު އެކި ދާއިރާތަކުން ތަޖުރިބާ ހޯއްދަވާފައިވާ ބޭފުޅެކެވެ. މީގެތެރޭގައި އޮޑިޓް، އެކައުންޓެންސީ، ފައިނޭންޝަލް މެނޭޖްމަންޓް އަދި ގަވަރނެންސްގެ ދާއިރާއިން ފަރީހާ ވަނީ ހާއްސަ ޕްރޮފެޝަނަލް ތަޖުރިބާ ހޯއްދަވާފައެވެ. އަދި ފައިނޭންޝަލް މޮޑެލިންގގެ ގިނަގުނަ ތަޖުރިބާ ލިބިވަޑައިގެންފައިވެއެވެ. މީގެތެރޭގައި ބޭންކިންގ، ކުދި ވިޔަފާރީގެ ދާއިރާ، އަދި މެދު ފަންތީގެ ވިޔަފާރީގެ އިތުރުން ތަފާތު އެކި އެކި އިޖްތިމާއީ އަދި އިޤްތިޞާދީ ދާއިރާތަކާއި ފަތުރުވެރިކަން ހިމެނެއެވެ.މީގެ އިތުރުން ފަރީހާ ވަނީ އިންޓަނޭޝަނަލް އޮޑިޓިންގ ސްޓޭންޑަރޑްސް އާއި އިންޓަނޭޝަނަލް ސްޓޭންޑަރޑްސް ފޯރ ޕްރޮފެޝަނަލް ޕްރެކްޓިސް އޮފް އިންޓަރނަލް އޮޑިޓިންގ އާއި އައި.ޕީ.އެސް.އޭ.އެސް އަދި އައި.އެފް.އާރް.އެސް އިން ފުރިހަމަ ޢިލްމާއި ތަޖުރިބާ ހޯއްދަވާފައެވެ.ބީއެމްއެލްގެ ޗެއަރޕަރސަންގެ މަގާމަށް ހޮވުމުގެ ކުރިން، ފަރީހާ ވަނީ މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑު މެންބަރެއްގެ ގޮތުގައި 6 އަހަރު ހޭދަކުރައްވާފައެވެ.