ހިއްސާ ވިއްކުމަށް ހުޅުވާލިތާ ތިން ދުވަސް ވީއިރު، 10 މިލިއަނަށްވުރެ ގިނަ ރުފިޔާ ލިބިއްޖެ - އެމްއައިބީ
މޯލްޑިވްސް އިސްލާމިކް ބޭންކްގެ ހިއްސާ ވިއްކުމަށް ހުޅުވާލިތާ ތިން ދުވަސް ވީއިރު، 10 މިލިއަނަށްވުރެ ގިނަ ރުފިޔާ ލިބިފައިވާކަމަށް އެ ބޭންކުން ހާމަކޮށްފިއެވެ.
މޯލްޑިވްސް އިސްލާމިކް ބޭންކް، އެމްއައިބީގެ ހިއްސާ ވިއްކަން ފަށާފައިވަނީ ޖުލައިމަހުގެ 28 ވަނަ ދުވަހުއެވެ. މިއީ އެކުންފުނިން ހިއްސާ އާއްމުނަށް ވިއްކަން ފެށި ފުރަތަމަ ފަހަރެވެ. ތިން ދުވަހުގެ ތެރޭގައި ހިއްސާ ވިއްކައިގެން ދިހަ މިލިއަނަށްވުރެ ގިނަ ރުފިޔާ ލިބިފައިވާއިރު، މިއީ ހިއްސާގެ މޫނުމަތީ އަގު 35 ރުފިޔާއިން ބަލާނަމަ، 285،714.2 ހިއްސާއެވެ. އެމްއައިބީން އަމާޒު ހިފާފައިވަނީ 6.9 މިލިއަން ހިއްސާ ވިއްކުމަށެވެ.
ޕީއެސްއެމް ނިއުސްއަށް މައުލޫމާތުދެއްވަމުން މޯލްޑިވްސް އިސްލާމިކް ބޭންކުގެ ޗީޕް އޮޕަރޭޓިންގ އޮފިސަރ އަޙްމަދު ރިޒާ ވިދާޅުވީ، އެ ބެންކުން ހިއްސާ ވިއްކަން ހުޅުވާލުމާއިއެކު އާންމުގެ ފަރާތުން ވަރަށް ބޮޑު ތަރުހީބެއް ލިބެމުން އަންނަކަމަށެވެ. ހިއްސާ ވިއްކަންފެށީ ބަންދު ދުވަހެއްގައިނަމަވެސް އެދުވަހުވެސް ވަރަށް ބޮޑު ތަރުހީބެއް ލިބިގެންދިޔަކަމަށް ރިޒާ ވިދާޅުވިއެވެ. ރިޒާ ވިދާޅުވީ، 3 ދުވަހުގެ ތެރޭގައި 10 މިލިއަނަށްވުރެ ގިނަ ރުފިޔާލިބިފައިވާކަމަށެވެ.
"އަޅުގަނޑުމެން ހިއްސާ ވިއްކަންފެށީ ބަންދުދުވަހެއްގައި. އެދުވަހުވެސް ވަރަށް ބޮޑު ތަރުހީބެއް ލިބިގެންދިޔަ. އޮންލައިންކޮށް އެކަނި އެދުވަހު ހުޅުވާލީ. މިހާތަނަށް އަޅުގަނޑުމެންނަށް 10 މިލިއަނަށްވުރެ ގިނަ ރުފިޔާގެ ހިއްސާ ވިކިފައިވަނީ މިދިޔަ 3 ދުވަސްތެރޭގައި."
ރިޒާ ވިދާޅުވީ އެ ބެންކުން ހިއްސާ ވިއްކަން ހަމަޖައްސާފައިހުރި އުސޫލުތައްވެސް ވަރަށް ފަސޭހަވާނެކަމަށެވެ. އެގޮތުން ދުނިޔޭގެ ކޮންމެ ތަނެއްގައި ހުރެގެންވެސް އިންފިނިޓީ ޕޯޓަލް މެދުވެރިކޮށް ހިއްސާ ގަނެވޭނެކަމަށެވެ. އަދި މާލޭގައި ހުރި އެ ކުންފުނީގެ އައިޕީއޯ ސެންޓަރަށް ވަޑައިގެން ނުވަތަ ރަށްރަށުގައި ހުންނަ އެ ބޭންކުގެ ބްރާންޗްތަކަށް ވަޑައިގެންވެސް ހިއްސާ ގަނެވޭނެކަމަށް ރިޒާ ވިދާޅުވިއެވެ. އިސްލާމިކް ބެންކުގެ ހިއްސާ ގަތުމަށް ކޮންމެހެން އެ ބޭންކުގެ އެކައުންޓެއް ހުންނާކަށް ނުޖެހޭނެކަމަށާއި އެހެން ބެންކެއްގެ އެކައުންޓުންވެސް ހިއްސާ ގަތުމަށް ފައިސާ ދެއްކޭނެކަމަށް ރިޒާ ވިދާޅުވިއެވެ.
އެމްއައިބީއިން މުޅިން އަލަށް ހިއްސާ ވިއްކަން ފަށާފައިވާއިރު ޖުމްލަ 6.9 މިލިއަން ހިއްސާ ވިއްކުމަށް ވަނީ ހަމަޖެހިފައެވެ. މިއީ ކުންފުނީގެ 31 އިންސައްތަ ހިއްސާއެވެ. ސެޕްޓެމްބަރު މަހުގެ 18ގެ ނިޔަލަށް ހިއްސާ ވިއްކުމަށް ވަނީ ހުޅުވާލާފައެވެ.
އެމްއައިބީގެ ހިއްސާއެއް 35 ރުފިޔާއަށް ވިއްކާއިރު މަދުވެގެން ގަނެވޭނީ 20 ހިއްސާއެވެ. އެއީ ހިއްސާއަކަށް 35 ރުފިޔާގެ ރޭޓުންކަމަށްވާނަމަ 700 ރުފިޔާއެވެ. އަދި މިއަދަދު 10 ހިއްސާއިން ބޭނުންވާ އަދަދަކަށް އިތުރުކުރެވޭނެކަމަށް ވެސް އެމްއައިބީއިން މަޢުލޫމާތުދެއެވެ.
އެ ބެންކުން ބުނީ އުންމީދަކީ 18 ސެޕްޓެމްބަރުގެ މާކުރިން ހިއްސާތައް ވިއްކާލުންކަމަށާއި، މިވަގުތު ލިބެމުންދާ ތަރުހީބަށް ބެލުމަށްފަހު ވަރަށް ބޮޑު ޔަޤީންކަމެއް އެބައޮތްކަމަށް އެމްއައިބީން ބުނެއެވެ. މޯލްޑިވްސް އިސްލާމިކް ބޭންކުން ހިއްސާ ވިއްކުމަށް ނިންމާ އިޢުލާނުކޮށްފައިވަނީ މިދިޔަ ޖޫން މަހުގެ ތެރޭގައެވެ.