މޯލްޑިވްސް އިސްލާމިކް ބޭންކްގެ އައު އޭޓީއެމް ސެންޓަރެއް މާލޭގައި ހުޅުވައިފިއެވެ. މިއީ އިސްލާމިކް ބޭންކުން މާލޭގައި ހުޅުވި 5 ވަނަ އޭޓީއެމް ސެންޓަރެވެ.
މި އޭޓީއެމް ސެންޓަރު ހުންނަނީ މާފަންނު ފާމުދޭރިގޭގެ ގްރައުންޑް ފްލޯގައި، ބަނޑާރަ މިސްކިތް ކުރިމައްޗަށްވާގޮތަށެވެ. މި އޭޓީއެމް ސެންޓަރުގައި ޖުމްލަ 2 އޭޓީއެމް ހުރެއެވެ. މިވަގުތު މި އޭޓީއެމް ސެންޓަރުން ހަމައެކަނި ފައިސާ ނެގުނު ނަމަވެސް ކައިރި މުސްތަޤްބަލެއްގައި ފައިސާ ޖަމާކުރުމުގެ ޙިދުމަތްވެސް ލިބިގެންދާނެކަމަށް އިސްލާމިކް ބޭންކުން ބުނެއެވެ.
އިސްލާމިކް ބޭންކްގެ އައު އޭޓީއެމް ސެންޓަރު ހުޅުވުމަށްފަހު މީޑިއާއަށް މައުލޫމާތުދެއްވަމުން އެމްއައިބީގެ މެނޭޖިންގ ޑިރެކްޓަރ އަބްދުލް މުހައިމިން ވިދާޅުވީ، މިއީ އެ ބެންކުން ހުޅިވި 13 ވަނަ އޭޓީއެމް ކަމަށެވެ. އަދި ރާއްޖޭގެ އެކި ކަންކޮޅުތަކުގައި އެ ބޭންކުގެ އޭޓީއެމްތައް ހުޅުވުމުގެ މަސައްކަތް ކުރިއަށްކަމަށެވެ. ރާއްޖޭގެ ގިނަ ރަށްތަކެއްގައި އޭޓީއެމްތައް ހުޅުވައި ކަސްޓަމަރުންނަށް ލުއިފަސޭހަކޮށްދިނުމަކީ އެ ބޭންކުގެ އަމާޒެއްކަމަށް އޭނާ ވިދާޅުވިއެވެ. މީގެއިތުރުން ޑިޖިޓަލް ބޭންކިން ނުވަތަ ފައިނޭންސަލް ޓެކްނޮލޮޖީ ބޭނުންކޮށްގެން ރާއްޖޭގެ އެކި ސަރަހައްދުތަކަށް އިސްލާމިކް ބޭންކުގެ ޙިދުމަތްތައް ފޯރުކޮށްދިނުމަށް މަސައްކަތްކުރަމުންދާކަމަށް އެމްއައިބީގެ އެމްޑީ ވިދާޅުވިއެވެ.
އެމްއައިބީން 13 އޭޓީއެމްއެއްގެ ޙިދުމަތް ދެމުންއަންނައިރު މި އޭޓީއެމްތައް ހުންނަނީ މާލޭގެ އިތުރުން ހުޅުމާލެ، އައްޑޫސިޓީ ހިތަދޫ، ޏ.ފުވައްފުލައްސިޓީ، ހދ. ކުޅުދުއްފުށި، ގދ. ތިނަދޫ އަދި ހުޅުލޭގައެވެ.