ތ. ހިރިލަންދޫ ކައިރީގައި ކަނދުފަތި އެޅުމުގެ މަސައްކަތް ނިމިފައިވާކަމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗާއިން ވިދާޅުވެއްޖެއެވެ.
މި ކަނދުފަތި އަޅާފައިވަނީ ހިރިލަންދޫ ހުޅަނގު ދެކުނުން 15 މޭލު ބޭރުގައެވެ.
މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ވިދާޅުވީ، މި ކަނދުފައްޗަކީ ދިވެހިރާއްޖޭގައި ދޮށީގެ މަސްވެރިކަމަށް ޤާއިމްކޮށްފައިވާ ކަނދުފަތީގެ ވިއުގަޔަށް ކަނދުފައްޗެއް އިތުރުކޮށް އަޖުމަބެލުމަށްޓަކައި ބޭރުކަނޑުގައި އެޅި ކަނދުފައްޗެއްކަމަށެވެ.
ފިޝަރީޒް މިނިސްޓްރީން ރާއްޖޭގެ އެކި ހިސާބުތަކުގައި އޮއިވާލި ކަނދުފަތިތައް އަޅާފައިވާއިރު، ކަނދުފަތިތައް ކައިރިން ދޮށީގެ މަސްވެރިކަންކުރާ ފަރާތްތަކުން ބާނާ މަހުގެ ތަފާސް ހިސާބު ޤަވާއިދުން ފިޝަރީޒް މިނިސްޓްރީއަށް ފޮނުވަންޖެހެއެވެ.
މަސްވެރިކަމުގެ ލާބަޔާއި މަންފާއަށް އެންމެ ފުރަތަމަ ސަރުކާރުން އޮއިވާލި ކަނދުފަތި ހަރުކުރީ 1980 ވަނަ އަހަރުއެވެ. މީގެސަބަބުން މަސްވެރިކަމަށް ވަރަށް ބޮޑު ކުރިއެރުމެއް ލިބުނެވެ. މަސްވެރިކަމަށް ކޮންމެ ދުވަހަކު ކުރަންޖެހޭ ހޭދަ ކުޑަވެގެންދިޔައެވެ.
ރާއްޖޭގައި އެންމެ ފުރަތަމަ ހަރުކުރި ދިހަ ކަނދުފަތި ހަރުކޮށްފައިވަނީ ދުނިޔޭގެ ކާބޯތަކެއްޗާއި ދަނޑުވެރިކަމާބެހޭ ޖަމުޢިއްޔާ އެފްއޭއޯގެ އެހީގައެވެ. އޭގެފަހުން ހަރުކުރި ދިހަ ކަނދުފަތި ހަރުކުރީ ޔޫއެންޑީޕީގެ އެހީގައެވެ. އޭގެފަހުން މި މަޝްރޫޢު ކުރިއަށްގެންދިޔައީ ދަޢުލަތުގެ ބަޖެޓުން ޚަރަދުކޮށްގެންނެވެ.
އެއްވެސް ކަނދުފައްޗަކާއި 3 މޭލު ކައިރީގައި ދިރޭ އެންޖަހައި އަޑިއަށް ފެއްތުމާއި، މިޔަރު ނެގުމާއި، ލޭނު އެޅުމާއި، އެމުގެ ގޮތުގައި ތާވަޅަ ބޭނުންކުރުމަކީ ޤާނޫނީގޮތުން މަނާކަމެކެވެ. އަދި ކަނދުފަތީގެ ބޮލަށް ވައު އައްސައި އޭގައި ދޯނިފަހަރު އަޅައިގެން ތިބުންފަދަ، އޮއިވާލި ކަނދުފަތީގެ މަސްވެރިކަމަށް ގެއްލުންވާ އެއްވެސް ޢަމަލެއް ކުރުމަކީވެސް މަނާކަމެއްކަމަށެވެ.