ދިވެހި އުފެއްދުންތެރިކަމުގެ ޤައުމީ މައުރަޒުން އެންމެ ރަނގަޅު 5 ފަރާތަކަށް ވިޔަފާރި ފެށުމަށް އެހީތެރިވެދޭނެކަމަށް އިކޮނޮމިކް މިނިސްޓްރީން ބުނެފިއެވެ.
މިއަހަރު ބޭއްވުމަށް ހަމަޖެހިފައިވާ ދިވެހި އުފެއްދުންތެރިކަމުގެ ގައުމީ މައުރަޒު ނުވަތަ "ފަންނު އެކްސްޕޯ" ބޭއްވުމަށް ހަމަޖެހިފައިވަނީ ނޮވެމްބަރ 22 އިން 28 ގެ ނިޔަލަށެވެ. ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓްރީން ވިދާޅުވީ، މި މައުރަޒުން އެންމެ ރަނގަޅު 5 ފަރާތަކަށް ވިޔަފާރިއެއްފެށުމަށް އެއް މިލިއަން ރުފިޔާ ދިނުމަށް ހަމަޖެހިފައިވާކަމަށެވެ.
މި އެކްސްޕޯ ކުރިއަށްގެންދިއުމަށް ހަމަޖެހިފައިވަނީ ދަރުބާރުގެ އާއި، ކަލާފާނު ސްކޫލްގެ އިތުރުން ކުޑަކުދިންގެ ބަގީޗާގައެވެ. މީގެ ތެރެއިން ދަރުބާރުގޭގައި ކުރިއަށްދާނީ އެކި އުފެއްދުންތައް ޑިސްޕްލޭކުރުމާއި ވިއްކުމެވެ. އަދި ކަލާފާނު ސްކޫލްގައި ކުރިއަށްދާނީ ވަގުތުން ކުރިއަށްދާ އެކި ހަރަކާތްތަކެވެ. އެގޮތުން ލައިވް ކުކިންއާއި ފޮޓޯނެގުން ފަދަ ހަރަކާތްތައް ހިމެނެއެވެ. މީގެއިތުރުން ކުޑަކުދިންގެ ބަގީޗާގައި ކުރިއަށްދާނީ ކުޑަކުދިންނާއި ގުޅުންހުރި އެކި ހަރަކާތްތަކެވެ.
ދަރުބާރުގޭގައި ހަދާފައިހުންނަ ޕެވިލިއަންތައް ޙާއްސަކޮށްފައި ހުންނާނީ އެކި އަތޮޅުތައް ވަކިންކަމަށް އެކްސްޕޯ އިންތިޒާމްކުރާ ފަރާތުން ބުނެއެވެ. މި އެކްސްޕޯގައި ބައިވެރިވުމުގެ ފުރުސަތު އަދިވެސް ވަނީ ހުޅުވާލާފައެވެ. އެކްސްޕޯގައި ބައިވެރިވުމުގެ އެންމެ ފަހު ތާރީހަކީ ސެޕްޓެމްބަރު މަހުގެ 30 ވަނަ ދުވަހެވެ.
ދިވެހި އުފެއްދުންތެރިކަމުގެ މައުރަޒުގައި ބައިވެރިވުމުގެ ފޯމު ބަލައިގަންނަން ފަށާފައިވަނީ އޭޕްރީލް 21 ވަނަ ދުވަހުން ފެށިގެންނެވެ. އިކޮނޮމިކް މިނިސްޓްރީން ވިދާޅުވީ، މައުރަޒުގައި ބައިވެރިވުމަށް މިހާތަނަށް ގިނަ ބަޔަކު ފޯމު ހުށައަޅާފައިވާކަމަށެވެ.
މައުރަޒުގައި ޖުމްލަ 6 ދާއިރާއަކުން ބައިވެރިވުމުގެ ފުރުސަތު އިކޮނޮމިކް މިނިސްޓްރީން ވަނީ ހުޅުވާލާފައެވެ. ދާއިރާތަކުގެ ތެރޭގައި ވަކިވަކި ފަރުދުންގެ ދާއިރާއާއި، ރަށު ފެންވަރުގައި ތަކެތި ބައިވެރިކުރުމުގެ ދާއިރާއާއި، ވިޔަފާރިތަކުގެ ދާއިރާ ހިމެނެއެވެ. މީގެއިތުރުން ތަޢުލީމު ދޭ މަރުކަޒުތަކުގެ ދާއިރާއާއި، ޚާއްސަ އެހީއަށް ބޭނުންވާ ފަރާތްތަކުގެ ދާއިރާގެ އިތުރުން ކްލަބު ޖަމިއްޔާތަކުގެ ދާއިރާއިން ބައިވެރިވުމުގެ ފުރުސަތު ހިމެނެއެވެ.
އިކޮނޮމިކް މިނިސްޓްރީން ބުނީ މި މައުރަޒުގެ މައިގަނޑު މަޤްޞަދަކީ ދިވެހި ރާއްޖޭގެ އިޤްތިޞާދުގައި ޙިއްޞާކުރާ ސިނާއަތްތަކަށް ބޭނުންވާ ދިވެހި އުފެއްދުންތައް މާކެޓަށް ނެރެ، އެފަދަ އުފެއްދުންތަކަށް އެކަށީގެންވާ މާކެޓެއް ހޯދައިދީ، ދިވެހި އުފެއްދުންތައް ކުރިއެރުވުންކަމަށެވެ. މީގެ އިތުރުން ރާއްޖެއަށް ޒިޔާރަތްކުރާ ފަތުރުވެރިންނާއި، އާއްމުންނަށް އެއްތަނަކުން ދިވެހި އުފެއްދުންތައް ފެނިގެންދާނެ މާހައުލެއް ޤާއިމްކޮށްދީ، ނެތެމުންދާ ދިވެހި އުފެއްދުންތަކާއި އަދި މާކެޓަށް އަލަށް ނެރެވޭ އުފެއްދުންތައް ކުރިއެރުވުމަށް ހިއްވަރުދީ، ދިވެހި މަސައްކަތްތެރިން ކުރިއެރުވުމަށް އިތުރު ފުރުޞަތުތައް ހޯދައިދިނުންވެސް ހިމެނެއެވެ.