އައު ސީޒަނަށް ޕީ.އެސް.ޖީގެ ފަރިތަކުރުންތަކަށް އެ ޓީމުގެ ފޯވަރޑް ނޭމާ ހާޒިރުވެފައި ނުވުމުން އޭނާއާމެދު ފިޔަވަޅުއަޅަން އެ ކްލަބުން ނިންމައިފިއެވެ.
މިކަމާ ގުޅިގެން ޕީ.އެސް.ޖީން ނެރުނު ބަޔާނެއްގައި ބުނެފައިވަނީ، ނޭމާ އަށް އެކަށީގެންވާ ފިޔަވަޅު އަޅާނެކަމަށެވެ. 27 އަހަރުގެ ނޭމާ ޕީ.އެސް.ޖީގެ ފަރިތަކުރުންތަކުގައި އިއްޔެ ބައިވެރިވެފައި ނުވާކަން އެ ކްލަބުން ހާމަކޮށްފައިވާއިރު ނޭމާ އާއި ބާސެލޯނާ އާ ގުޅުވައިގެން ދެކެވޭ ވާހަކަތަކުގެ އަޑުވެސް ވަނީ ގަދަވެފައެވެ.
ނޭމާ ފަރިތަކުރުންތަކުގައި ބައިވެރި ނުވެވޭނެކަން ކުރިން އަންގައިފައި ނުވާ ކަމަށް ޕީއެސްޖީން ބުނި ނަމަވެސް، ބްރެޒިލްގެ ބައެއް މީޑިއާތަކުން ނޭމާގެ ބައްޕައާއި ހަވާލާދީ ރިޕޯޓްކޮށްފައިވާ ގޮތުގައި ޗެރިޓީ ހަރަކާތްތަކެއްގައި ނޭމާއަށް އުޅެންޖެހުމާ ގުޅިގެން ފަރިތަކުރުންތަކުގައި އޭނާއަށް ބައިވެރި ނުވެވޭނެކަން ކްލަބަށް ވަނީ އަންގާފައެވެ.
ކުރިން ސްޕެއިންގެ ބާސެލޯނާއަށް ކުޅުނު ނޭމާ 2017 ވަނަ އަހަރު ޕީއެސްޖީއަށް ބަދަލުވީ 200 މިލިއަން ޕައުންޑަށެވެ. އެއަށް ފަހު ފްރެންޗް ލީގުގައި ނޭމާ ކުޅުނު 37 މެޗްގައި އޭނާ ވަނީ 34 ލަނޑުޖަހައި މިދިޔަ ދެ ސީޒަންގައިވެސް ފްރެންޗް ލީގް ކާމިޔާބުކުރުމަށް ޕީއެސްޖީ އަށް އެހީތެރިވެދީފަ އެވެ. އެހެންނަމަވެސް ޕީއެސްޖީގައި ނޭމާ މިހާތަނަށް ހޭދަކުރި ދެ ސީޒަންގައި އޭނާގެ ފަރާތުން އަޙުލާޤީ ގިނަ މައްސަލަތަކެއް ވަނީ ފެނިފައެވެެ.