ޚިޔާނާތުގެ ފައިސާ އެސްއޯއެފް އެކައުންޓަށް ޖަމާކުރުމުގައި ބީއެމްއެލްގެ 38 މުވައްޒަފުން ޝާމިލްވޭ
އެމްއެމްޕީއާރްސީގެ ނަމުގައި އެކިފަރާތްތަކުން ދޫކޮށްފައިވާ ޗެކްތައް އެސްއޯއެފްގެ އެކައުންޓަށް ޖަމާކުރި މައްސަލާގައި ބޭންކް އޮފް މޯލްޑިވްސް (ބީއެމްއެލް)ގެ 38 މުވައްޒަފުން ޝާމިލްވާ ކަމަށް އެންޓި ކޮރަޕްޝަން ކޮމިޝަން (އޭސީސީ)ގެ ރައީސް މުޢައްވިޒް ރަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަ ދައްކަވަމުން އޭސީސީގެ ރައީސް މުޢައްވިޒު ވިދާޅުވީ، އެމްއެމްޕީއާރުސީގެ ޗެކުތައް އެސްއޯއެފްގެ އެކައުންތަކަށް ޖަމާކުރުމުގައި ޝާމިލްވި މުވައްޒަފުންގެ ތެރޭގައި ބީއެމްއެލްގެ އެންމެ ދަށް ފަންތީގެ މުވައްޒަފުން ފެށިގެން ގޮސް މެނޭޖުމަންޓާއި ބޯޑު މެންބަރުންވެސް ހިމެނޭ ކަމަށެވެ.
މުއައްވިޒު ވިދާޅުވީ މި މައްސަލާގައި ޝާމިލްވާ 38 މުވައްޒަފުންނާއި ސުވާލުކޮށް ބަޔާން ނަގަމުން އަންނަ ކަމަށެވެ. އޭސީސީގެ ރައީސް ވިދާޅުވީ، މި މައްސަލަ ބީއެމްއެލްއިން އެމްއެމްއޭގެ ސަމާލުކަމަށް ގެނައި ކަމަށެވެ. ނަމަވެސް އެމްއެމްއޭގެ ސަމާލުކަމަށް އެކަން ގެނައީ އެ ޗެކްތައް އެސްއޯއެފްގެ އެކައުންޓަށް ޖަމާކުރުމަށްފަހު ކަމަށް މުއައްވިޒު ވިދާޅުވިއެވެ.
"ޗެކްތައް ބޭންކްގެ ކައުންޓަރުން ބަލައިގަތް މުވައްޒަފުންފެށިގެން މެނޭޖްމަންޓް އަދި ބޯޑް މެންބަރުންނާއި ހަމައަށް 38 ފަރާތެއް ޝަމިލްވޭ. އެ ހުރިހާ ފަރާތްތަކުގެ ބަޔާން ނަގަމުން މިދަނީ. މިހާރު ބައެއް މުވައްޒަފުންގެ ބަޔާންތައް ވަނީ ނަގާފައި. އެސްއޯއެފް އެކައުންޓަށް ޗެކް ޖަމާކުރި މައްސަލަ ބީއެމްއެލްއިން އެމްއެމްއޭއަށް ހުށައެޅުމުން އެމްއެމްއޭއިން އެ މައްސަލަ ތަޙްޤީޤްކޮށް ޕީޖީ އޮފީހަށް ވަނީ ފޮނުވާފައި. މިހާރު މިކަމުގަިއ ހިމެނޭމަނީލޯންޑަރިންގެ މައްސަލަ ފުލުހުން އަންނަނީ ތަޙްޤީޤްކުރަމުން." މުއައްވިޒު ވިދާޅުވިއެވެ.
އޭސީސީން މީގެކުރިންވެސް ވަނީ އެސްއޯއެފް އެކައުންޓަށް ބީއެމްއެލްއިން ޗެކްތައް ޖަމާކޮށްފައިވަނީ "އެންޑޯސްމަންޓް" ފުރިހަމަ ނުވަނީސް ކަމަށް ވިދާޅުވެފައެވެ. މިއަދުގެ ކޮމެޓީގައި އޭސީސީގެ ރައީސްވެސް ވަނީ އެކަން އެގޮތަށް ބީއެމްއެލްއިން ކޮށްފައިވާ ކަމަށް ވިދާޅުވެފައެވެ.
ނަމަވެސް އެކަމުގައި ބީއެމްއެލްއިން މިއަހަރުގެ ފެބުރުއަރީ މަހުގެ ތެރޭގައި ބުނެފައިވަނީ އެމްއެމްޕީއާރުސީގެ ޗެކްތައް އެސްއޯއެފްގެ އެކައުންޓަށް ޖަމާކުރީ އެ ޗެކުތައް އެންޑޯސްކޮށްފައި ހުރުމުން ކަމަށެވެ.
މިދިޔަ ޖޫންމަހުގެ 27 ވަނަ ދުވަހު މާލިއްޔަތު ކޮމިޓީގައި ވާހަކަ ދައްކަވަމުން އެމްއެމްޕީއާރުސީ އޮޑިޓްކުރި ޓީމްގެ އެންމެ އިސްކޮށް ހުންނެވި އެސިސްޓަންޓް އޮޑިޓަރ ޖެނެރަލް އިބްރާހީމް އައިމަން ދާދިފަހުން ވިދާޅުވެފައިވަނީ، އެމްއެމްޕީއާރުސީގެ ޗެކްތައް އެެހެން އެކައުންޓަކަށް ޖަމާކުރާނަމަ ކުންފުނީގެ ބޯޑުގެ ދެ ބޭފުޅެއްގެ ސޮއި ބޭނުންވާއިރު، ހުރިހާ ޗެކެއްގައިވެސް ސޮއިކޮށްފައިވަނީ ކުރީގެ މެނޭޖިން ޑިރެކްޓަރ ޢަބްދުﷲ ޒިޔަތު އެކަނި ކަމަށެވެ. އެހެންކަމުން "އެންޑޯސްމަންޓް" ފުރިހަމަ ނުވާއިރު ބީއެމްއެލްއިން އެ ޗެކްތައް ޖަމާކުރުމަކީ މައްސަލައެއް ކަމަށް އޭނާ ވިދާޅުވިއެވެ. އަދި އެކަމާއި ގުޅިގެން ބޭންކް އޮފް މޯލްޑިވްސްއިން އެއްވެސް ފިޔަވަޅެއް އެއިރު އަޅުއްވާފައި ނުވާކަމަށްވެސް އައިމަން ވިދާޅުވެފައިވެއެވެ.
އެމްއެމްޕީއާރުސީގެ މައްސަލަ ތަޙްޤީޤުކޮށް އޭސީސީން ޢާންމުކުރި ރިޕޯޓުގައި 57 ރަށަކުން އެކުއިޒިޝަން ކޮސްޓްގެ ގޮތުގައި ލިބުނު 60 މިލިއަނަށްވުރެ ގިނަ ޑޮލަރު އެމްއެމްޕީއާރުސީގެ އެކައުންޓްތަކަށް ޖަމާނުކޮށް ޗެކް އެންޑޯސްކޮށްގެން އެކިއެކި އަމިއްލަ ފަރާތްތަކުގެ އެކައުންޓްތަކަށް ޖަމާކޮށްފައިވާކަމަށް ވަނީ ބުނެފައެވެ.
އެމްއެމްޕީއާރްސީ އަށް ލިބެންޖެހޭ ފައިސާގެ ޗެކުތައް އެސްއޯއެފް އެކައުންޓަށް ސުވާލެއް ނެތި ޖަމާ ކުރުމާއި ވަގަށް ނެގި ފައިސާ އެސްއޯއެފުން އެކި މީހުންނަށް ޓްރާންސްފާ ކުރިއިރު ބޭންކުން އެއްވެސް ފިޔަވަޅެއް އަޅާފައި ނެތް ކަމަށް ބުނެ ގިނަބައެއްގެ ފާޑުކިއުން ބީއެމްއެލަށް ވަނީ އަމާޒުވެގެން ގޮސްފައެވެ.
ރާއްޖޭގެ ތާރީޚުގައި ހިނގި އެންމެ ބޮޑު ޚިޔާނާތްކަމަށްވާ އެމްއެމްޕީއާރުސީގެ ޚިޔާނާތް 1.4 މިލިއަން ޑޮލަރަށް އަރާއިރު، ރައީސް ޔާމީންގެ ސަރުކާރުގެ އިސްވެރިންނަށް މިކަމުގައި ބޮޑެތި ތުހުމަތުތަކެއް ދަނީ ކުރެވެމުންނެވެ.