ހުޅުމާލޭ ފްލެޓްތަކުގެ ކޮމަންއޭރިޔާ އާއްމުން ބޭނުންކުރާ ގޮތުގެ ސަރވޭއެއް ހައުންސިން ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ފަށަން ނިންމައިފިއެވެ.
މި ސަރވޭއެއް ކުރިއަށް ގެންދިއުމަށް ނިންމާފައިވަނީ ހުޅުމާލެއިން ދޫކޮށްފައިވާ ފުލެޓުތަކުގައި ދިރިއުޅޭ ފަރާތްތަކުން، ފުލެޓްތަކުގެ ކޮމަންއޭރިޔާ ޤަވާއިދާ ޚިލާފަށް ބޭނުންކުރަމުންދާ ކަމުގެ ޝަކުވާ އެ ކޯޕަރޭޝަނަށް ލިބެމުންދާތީކަމަށް އެޗް.ޑީ.ސީން ބުނެއެވެ.
މި ސަރވޭގެ ތެރެއިން ކޮމަންއޭރިޔާގައި އިމާރާތްކުރުމާއި، އެއްމެދު އިމާރާތަށް ގެއްލުންވާފަދަ ގަސްތައް އިންދާފައި ހުރުމާއި، ކޮމަންއޭރިޔާ ހިޔާކޮށް ދޮރު ހަރުކޮށްފައި ހުރުން ފަދަ ކަންކަމަށް ބަލާނެކަމަށް އެ ކުންފުނިން ބުނެއެވެ. އަދި ވިޔަފާރީ ބޭނުމަށް އެފަދަ ސަރަޙައްދުތައް ބޭނުންކުރުމާއި، އެޗް.ޑީ.ސީން ހުއްދަ ނުކުރާފަދަ ބަދަލެއް އިމާރާތުގެ ބޭރަށް ގެނެއުމާއި، ބެލްކަނީގައި ދޮރުކަނޑާފައި ހުރިތޯ ބަލާނެކަަމަށްވެސް ބެލުންފަދަ ކަންކަން މި ސަރވޭގެ ތެރެއިން އެޗް.ޑީ.ސީން ބުނެއެވެ.
އެޗް.ޑީ.ސީން ބުނީ ހުޅުމާލެއަކީ މީހުން ދިރިއުޅުމަށް ހިތްފަސޭހަ، އަދި އިޤްތިސާދީ އެކި މަސައްކަތްކުރުމަށް އެކަށޭނެ މާޙައުލެއް ޤާއިމުކުރުމުގެ ބޭނުމުގައި ވަކިގޮތަކަށް ޕްލޭން ކުރެވިފައިވާ ރަށެކެވެ. އަދި އެ ކޯޕަރޭޝަނުން މަސައްކަތްކުރަމުން ގެންދަނީ މިފަދަ މާހައުލެއް ހުޅުމާލޭގައި ޤާއިމުކުރެވޭތޯކަމަށާއި، ނަމަވެސް ހުޅުމާލެއިން ދޫކޮށްފައިވާ ފުލެޓުތަކުގައި ދިރިއުޅޭ ފަރާތްތަކުން ފުލެޓްތަކުގެ ކޮމަންއޭރިޔާ ޤަވާއިދާ ޚިލާފަށް ބޭނުންކުރަމުންދާ ކަމުގެ ޝަކުވާ އެ ކޯޕަރޭޝަނަށް ދޭތެރެ ދޭތެރެއިން ލިބެމުންދާކަމަށްވެސް އެޗްޑީސީންބުނެއެވެ.