ދިރާގު ދިވެހި ޕްރިމިއަރ ލީގުގައި ރޭ ކްލަބް ގްރީން ސްޓްރީޓްސް އާއި ކްލަބް އީގަލްސް ބައްދަލުކުރި މެޗު 1-1 އިން އެއްވަރުވެއްޖެ އެވެ.
ލީގުގައި ފުރަތަމަ ކުޅުނު މެޗުގައި ވެސް މޮޅުވާން ދަނިކޮށް އީގަލްސް އެއްވަރުވީ ފަހު ވަގުތު އެޓީމު ކޮޅަށް ވަތް ގޯލުން ނެވެ. މެޗު އެއްވަރުވުމުން ކުޅުނު ދެ މެޗުން އީގަލްސް އަށް ދެ ޕޮއިންޓް ލިބުނުއިރު ދެ މެޗުން ގްރީން ސްޓްރީޓްސް އަށް ލިބިފައިވަނީ އެއް ޕޮއިންޓް އެވެ.
މެޗު ފަށައިގެން ފުރަތަމަ 20 މިނެޓު އީގަލްސް އިން ވަނީ މޮޅަށް ކުޅެ ގްރީން ސްޓްރީޓްސްގެ ގޯލަށް ގިނަ ހަމަލާތަކެއް ފޮނުވާލާފަ އެވެ. މި މެޗުގައި އީގަލްސް އިން މޮޅަށް ކުޅެ ލީޑު ނެގީ 23 ވަނަ މިނެޓުގައި ރިޒޭ ޖެހި ގޯލުން ނެވެ. މެޗުގައި ގްރީންގެ ފުރަތަމަ ހަމަލާ 32 ވަނަ މިނެޓުގައި ފޮނުވާލީ އަލީ އަޝްފާގް (ދަގަނޑޭ) އެވެ. އަޝްފާގަށް ލިބުނު ބޯޅަ ފޮނުވާލުމުން ގޯލުގެ މަތިން ދިޔައިރު ފުރަތަމަ ހާފު ނިމުމުގެ ކުރިން މުހައްމަދު އުމެއިރު ނަގައިދިން ޖެހުމަކުން ޑިފެންޑަރު މަހުމޫދު ބޮލުން ފޮނުވާލި ބޯޅަ ކީޕަރު ސުޖަން ޕެރޭރާ ވަނީ މަތަކޮށްފަ އެވެ.
މެޗުގެ ފަހު މިނެޓުގައި އަޝްފާގު ގްރީން ސްޓްރީޓްސް އަށް ޕޮއިންޓެއް ކަށަވަރު ކޮށްދިނީ އުމެއިރު ފޮނުވާލި ހިލޭ ޖެހުމެއް ކީޕަރު ސުޖަން އަތުގައި ޖެހިފައި ނުކުތް ވަގުތު ގޯލުގެ ތެރެއަށް ފޮނުވާލައިގެން ނެވެ. އަޝްފާގުގެ މި ގޯލަށް ފަހު އިތުރު ވަގުތުގައި ދެޓީމުން އުފެއްދި ހަމަލާ ވެސް ކާމިޔާބުވާ ގޮތެއް ނުވި އެވެ.
ލީގުގައި ފުރަތަމަ ޕޮއިންޓް ހޯދުމަށްފަހު ގްރީން ސްޓްރީޓްސްގެ ކޯޗު އަލީ ސުޒޭން ބުނީ މެޗުގައި އީގަލްސް ވަރަށް ރަނގަޅަށް ކުޅުނު ކަމަށާއި، ފަހުވަގުތު ޕޮއިންޓެއް ހޯދުނީ ގްރީންގެ ތަޖުރިބާ ބޭނުންކޮށްގެންކަމަށެވެ. ތަޖުރިބާކާރު ކުޅުންތެރިންގެ އެހީގައި ޕޮއިންޓެއް ހޯދުމަކީ ވަރަށް ރަނގަޅު ފާލެއްކަމަށާއި، މިއީ މުހިންމު ޕޮއިންޓެއްކަމަށް ސުޒޭން ބުންޏެވެ.
"މި މެޗުގައި އީގަލްސް ވަރަށް ރަގަޅަށް ކުޅުން. ދެން ގްރީންއަށް ފަހު ވަގުތު ޕޮއިންޓެއް ހޯދުނީ ގްރީންގެ ތަޖުރިބާގެ ބޭނުން ހިފައިގެން. ވަރަށް މުހިއްމު ޕޮއިންޓެއް މި ލިބުނީ." ސުޒެއިން ބުންޏެވެ.
މެޗަށްފަހު ކްލަބް އީގަލްސްގެ މެނޭޖަރ މުހައްމަދު އިނާން އަލީ ބުނީ ޓީމުގައި ފިޓްނަސްގެ މައްސަލަ އުޅޭ ކަމަށާއި އެކަން މިމެޗުގައި ފާހަގަކުރެވުނު ކަމަށެވެ. އަދި، ޖެހިޖެހިގެން ދެ މެޗުގައި ފަހު ވަގުތު ގޯލު ވަނުމުން އެކަމާ ޓީމު ތެރޭގައި މަޝްވަރާ ކުރާނެކަމަށެވެ.
"މެޗުގައި ފިޓްނަސްގެ މައްސަލަ އުޅޭކަން ފާހަގަކުރެވުނު. ދެން މިމެޗުގައިވެސް އެންމެ ފަހު ވަގުުތު ގޯލެއް ވަދެގެން ތިން ޕޮއިންޓް ގެއްލިގެން މި ދިޔައީ. މިކަމާދެން ޓީމުގެ ތެރޭގައި މަޝްވަރާކުރާނެން." މެނޭޖަރ އިނާން ބުންޏެވެ.
ދިރާގު ދިވެހި ޕްރިމިއަރ ލީގުގައި މިއަދު ހަވީރު ކުޅޭ މެޗުގައި ބައްދަލުކުރާނީ ޗެމްޕިއަން ޓީސީ އާއި ޔުނައިޓެޑް ވިކްޓްރީ އެވެ. މިރޭގެ މެޗުގައި ބައްދަލުކުރާނީ މާޒިޔާ އާއި ނިލަންދޫ ސްޕޯޓްސް ކްލަބް އެވެ.